8 Noyabr hər birimiz üçün əziz gündür. Çünki həmin gün xalqımız illərdən bəri intizarında olduğu Zəfərinə qovuşdu. Vətən müharibəsində Azərbaycan Ordusu Müzəffər Ali Baş Komandan İlham Əliyevin sərkərdəliyi ilə torpaqlarımızı erməni işğalından azad etdi. Buna görə də qürur və iftixarla deyə bilərik ki, 8 Noyabr Zəfər Günü tariximizin ən şərəfli səhifələrindən biri yox, birincisidir.
Bu əlamətdar gün münasibətilə Bakı şəhər Tofiq Məmmədov adına 239 nömrəli orta məktəbdə tədbir keçirilib. "Əsir torpağın göz yaşı Zəfərlə silinər!" adlı tədbir şəhidlərin ruhunun birdəqiqəlik sukutla yad edilməsi və Dövlət himni ilə başladı.
Məktəbin direktoru Nisə Fərəcova çıxış edərək bildirdi ki, Zəfər Günü hamımız üçün yaddaqalan, müqəddəs bir gündür. Çünki 2020-ci ildə rəşadətli Azərbaycan Ordusu Qarabağda və Şərqi Zəngəzurda Ermənistan silahlı qüvvələrini darmadağın edərək xalqımıza qələbə sevinci yaşatdı. Ordumuz 30 ilə yaxın davam edən erməni işğalına son qoydu. Torpaqlarımızın azadlığı uğrunda gedən döyüşlərdə hərbçilərimiz böyük qəhrəmanlıq və hünər göstərdilər. Bir zamanlar məktəbimizin şagirdi olmuş oğullar da yurdumuzun azadlığı uğrunda gedən döyüşlərdə ön sıralarda vuruşdular. Təəssüflər olsun ki, onların bir neçəsi şəhid oldu. Biz həmişə onların adlarını əziz tutur, xatirələrini hörmətlə anırıq. 6-cı ildir ki, xalqımız Zəfər Gününü böyük qürur və iftixar hissi ilə qeyd edir. Belə xoş və sevinc dolu anları, günləri xalqımıza yaşatdıqlarına görə Silahlı Qüvvələrin Müzəffər Ali Baş Komandanı İlham Əliyevə, şəhidlərimizə və qazilərimizə dərin minnətdarlığımızı bildiririk.
Doğmalarını, əzizlərini Qarabağ müharibəsində itirmiş Mərifət Həsənova, Nahidə Teymurova, Gülsüm Əhədzadə və başqaları çıxış edərək Azərbaycanın tarixinə qızıl hərflərlə yazılmış Zəfər Günündən danışdılar, bu tarixi günün əhəmiyyətini qürur hissi ilə tədbir iştirakçılarına çatdırdılar.
Çıxışlar başa çatdıqdan sonra tədbir bayram ovqatı ilə davam etdi. Şagirdlərin ifasında tədbir iştirakçılarına gözəl anlar, xoş duyğular yaşadan ədəbi-bədii kompazisiya nümayiş olundu. Şagirdlərdən Məryəm Süleymanlı, Tamerlan Niftəliyev, Məryəm Məmmədli, Süleyman Məmmədli, Zəhra Həsənova, Ayam Sadıqova, Ayxan Musayev, Zəhra Baxışzadə, şəhid övladları Uğur və Ləman Əhədzadə və başqaları Zəfəri, qəhrəmanlığı və vətənpərvərliyi tərənnüm edən şeirlər söylədilər. Məktəbin 6-cı sinif şagirdi Arzu Məhərrəmli isə "Qarabağ can, Qarabağ" mahnısını ifa etdi.
Vahid MƏHƏRRƏMOV,
"Azərbaycan"
31 - Copyjpg_1794009722.jpg)
314444444 - Copyjpg_1793831795.jpg)
jpg_1794011430.jpg)
