Rumıniyanın “Gandul” xəbər portalında siyasi şərhçi Kristian Lisandrunun müəllifliyi ilə geniş məqalə dərc olunub.
AZƏRTAC xəbər verir ki, məqalədə Azərbaycan Prezidenti İlham Əliyevin Rusiya ilə münasibətdə apardığı balanslı və prinsipial siyasət təhlil olunur.
Kristian Lisandru yazır ki, Azərbaycan–Rusiya münasibətlərində son aylarda müşahidə edilən qısamüddətli gərginliklər, əslində, Bakının geosiyasi statusunun dəyişdiyini göstərir. “Prezident İlham Əliyev artıq təkcə regional deyil, beynəlxalq səviyyəli lider kimi çıxış edir və Moskva ilə münasibətləri də bu kontekstdə yenidən formalaşdırır”, - deyə o əlavə edir.
Məqalədə bildirilir ki, Azərbaycan diplomatiyası son illərdə Türkiyə, Avropa İttifaqı və Mərkəzi Asiya ölkələri ilə qurduğu strateji tərəfdaşlıqlar sayəsində həm siyasi, həm də iqtisadi müstəvidə müstəqil kurs formalaşdırıb. Bunun fonunda Bakı Rusiya ilə münasibətlərdə də əvvəlkindən daha sərbəst və çevik davranır.
K.Lisandru əlavə edir ki, Azərbaycan 2020-ci ildə Qarabağ müharibəsində qazandığı Qələbədən sonra yalnız regionda deyil, beynəlxalq arenada da nüfuzunu əhəmiyyətli dərəcədə artırıb. Prezident İlham Əliyevin yürütdüyü uğurlu diplomatik kurs sayəsində Azərbaycan Ermənistanla danışıqlarda üstün tərəfə çevrilib.
“Azərbaycan Cənubi Qafqazda, sadəcə, iştirakçı deyil, oyunun qaydalarını dəyişən və diktə edən ölkədir. Bu reallıq Moskva tərəfindən də nəzərə alınmağa başlayıb”, - deyən Kristian Lisandru hesab edir ki, Azərbaycanın yürütdüyü çoxvektorlu və balanslaşdırılmış xarici siyasət modeli ölkəyə həm Qərblə, həm də Şərqlə paralel şəkildə strateji münasibətlər qurmağa imkan verir. Bu yanaşma Azərbaycanı regional gücdən qlobal gücə çevirir.
