Rumıniyanın “iAMSport” nəşri sentyabr ayında Bakıda keçiriləcək Formula 1 Azərbaycan Qran-Prisi ilə bağlı məqalə dərc edib.
AZƏRTAC xəbər verir ki, yazıda yarışın builki təqvimdə ən diqqətçəkən idman tədbirlərindən biri olacağı qeyd olunub. Bildirilib ki, 2026-cı il Qran-Prisi Bakıda Formula 1-in keçirilməsinin 10 illiyi ilə üst-üstə düşdüyü üçün təşkilatçılar xüsusi proqram hazırlayıblar.
Nəşrin yazdığına görə, təşkilatçılar yarış həftəsonunda tribunalarda yüksək tamaşaçı marağı gözləyirlər. Məqalədə qeyd olunub ki, yubiley münasibətilə beynəlxalq şou proqramları və böyük musiqi tədbirləri də təşkil ediləcək.
Məşhur musiqiçilər Kelvin Harris və Keti Perrinin yarış həftəsonunda konsert proqramı ilə çıxış edəcəkləri vurğulanıb. Qeyd olunub ki, Formula 1 artıq yalnız idman yarışı deyil, eyni zamanda turizm, əyləncə və beynəlxalq imic platformasına çevrilib.
Məqalədə Azərbaycan Qran-Prisinin Formula 1 təqvimində ən maraqlı şəhər traslarından biri hesab olunduğu bildirilib. Sürətli düzlüklər, dar döngələr və tarixi İçərişəhər fonunda keçirilən yarışların hər il dramatik və gözlənilməz nəticələrlə yadda qaldığı qeyd olunub.
Rumıniya nəşrinin təhlilinə görə, Azərbaycan son illərdə beynəlxalq idman tədbirləri vasitəsilə özünün qlobal imicini və turizm potensialını gücləndirməyə çalışır: “Formula 1 yarışları Bakının beynəlxalq səviyyədə tanıdılmasında mühüm rol oynayır və şəhərin müasir infrastrukturu ilə tarixi memarlığını bir araya gətirən simvolik tədbir kimi qiymətləndirilir”.
Məlumatda vurğulanıb ki, Formula 1 rəhbərliyi Azərbaycan Qran-Prisinin 2030-cu ilə qədər təqvimdə qalacağını açıqlayıb. Analitiklər hesab edirlər ki, bu qərar Bakının beynəlxalq idman mərkəzi kimi mövqeyini daha da gücləndirəcək və ölkəyə əlavə turist axınının artmasına şərait yaradacaq.
