Qusar Olimpiya İdman Kompleksində 16 yaşadək yeniyetmələr arasında Respublika Şahmat Olimpiadasının bağlanış mərasimi keçirilib.
Ölkənin dörd bir yanından Qusara toplaşan 16 yaşadək istedadlı şahmatçılar 9 gün ərzində gərgin və maraqlı mübarizə aparıblar. 330-a yaxın yeniyetmə şahmatçının iştirak etdiyi yarış 11 turdan ibarət olub və "İsveçrə sistemi" ilə keçirilib. İştirakçılar yaş kateqoriyalarına görə 2 qrupa bölünüblər. A qrupunda 12, 14 və 16 yaşlı, B qrupunda isə 8 və 10 yaşlı yeniyetmələr öz güclərini sınayıblar. A qrupunda I yer tutan bir oğlan və bir qız şahmatçı Avropa çempionatında Azərbaycanı təmsil etmək hüququ qazanıblar.
Bağlanış mərasimində rayon icra hakimiyyətinin başçısı Sahir Məmmədxanov vurğulayıb ki, Qusarda ilk dəfə belə genişmiqyaslı şahmat yarışı keçirilirdi: "Qusar bu gün təkcə təbiəti və turizmi ilə deyil, həm də intellektual idmanın inkişafı ilə seçilən rayonlardan biridir. Bu Olimpiadada mübarizə aparan hər bir yeniyetmə bizim üçün qalibdir. Çünki onlar özlərini sınadılar, yeni bilik və bacarıqlar, yeni təcrübələr qazandılar. Onlar gələcəkdə Azərbaycan bayrağını beynəlxalq arenalarda yüksəklərə qaldıracaqlar”. Sonda S.Məmmədxanov yarışın yüksək səviyyədə təşkilinə görə Azərbaycan Şahmat Federasiyasının rəhbərliyinə təşəkkür edərək bütün qalibləri təbrik edib.
Tədbirdə çıxış edən Azərbaycan Şahmat Federasiyasının birinci vitse-prezidenti Faiq Həsənov Olimpiadanın təşkilatçılıq səviyyəsini yüksək qiymətləndirib. Qeyd edib ki, regionlarda şahmatın kütləviləşməsi federasiyanın prioritet istiqamətlərindən biridir və Qusarda keçirilən bu yarış həmin strategiyanın uğurlu nümunəsidir.
Sonra mükafatlandırma mərasimi keçirilib. Beynəlxalq dərəcəli hakim, yarışların baş hakimi Azər İbrahimov qaliblərin adlarını elan edib. 8, 10, 12, 14 və 16 yaşlı oğlanlar və qızlar arasında, eləcə də A və B qrupları üzrə I, II və III yerlərin sahibləri diplom, medal və kuboklarla təltif olunublar. Qusar şəhərindən olan ən fəal yeniyetmə şahmatçı da mükafata layiq görülüb.
Mərasim rayon Mədəniyyət Mərkəzinin əməkdaşlarının təqdim etdiyi rəngarəng konsert proqramı ilə yekunlaşıb.
Akif ƏLİYEV,
“Azərbaycan”
