Bu münasibətlə rayonda açılış mərasimi keçirilib
Məlum olduğu kimi, Qazax şəhəri 2026-cı il üçün Azərbaycanın “İdman paytaxtı” elan edilmişdir. Bu münasibətlə rayonda "Qazax İdman Paytaxtı-2026"nın açılış mərasimi keçirilmişdir.
Mərasimdə rayon cra hakimiyyətinin başçısı Rəcəb Babaşov, gənclər və idman naziri Fərid Qayıbov, keçən il “İdman Paytaxtı” olmuş Qəbələnin RİH başçısı Səbuhi Abdullayev, Respublika Ağırlıqqaldırma Federasiyasının vitse-prezidenti Firdovsi Umudov, idman federasiyalarının əməkdaşları, rayonun təhsil, səhiyyə və mədəniyyət müəssisələrinin kollektivləri, şəhid ailələri, gənclər, ictimaiyyət nümayəndələri iştirak etmişlər.
Açılış mərasimi “Qarabağ Azərbaycandır” abidə kompleksinin ziyarəti ilə başlamışdır. İştirakçılar Vətən müharibəsi şəhidlərinin xatirəsinə ucaldılmış abidə kompleksini ziyarət edərək xatirələrinə ehtiramlarını bildirmişlər. Sonra qonaqlar Ümummilli Lider Heydər Əliyevin adını daşıyan parkda təşkil olunmuş sərgiyə baxış keçirmiş, Qazax rayon Heydər Əliyev Mərkəzi tərəfindən Ulu Öndərin və Prezident İlham Əliyevin dövlətçilik siyasətindən bəhs edən kitabların və ölkəmizdə idman siyasətindən bəhs edən nəşrlərin sərgisi ilə tanış olmuşlar. Qazax Dövlət Rəsm Qalereyasının təşkil etdiyi rəsm sərgisi də maraqla qarşılanmışdır. “Avey” Dövlət Tarix-Mədəniyyət Qoruğunun təşkil etdiyi sərgidə isə müxtəlif dövrləri əks etdirən eksponatlar, eləcə də Molla Pənah Vaqif və Molla Vəli Vidadi muzeylərinin birgə təşkil etdikləri sərgidə xalça və misgərlik məmulatları nümayiş etdirilmişdir. Sonra idmanın sərbəst güləş, cüdo, ağırlıqqaldırma, qol güləşi, boks, karate, futbol, şahmat, voleybol idman növləri üzrə nümunəvi çıxışlar olmuşdur. Açılış mərasimi çərçivəsində qonaqlar həmçinin Heydər Əliyevin abidəsini ziyarət etmişlər.
Gənclər və İdman Nazirliyi, Azərbaycan Həmkarlar İttifaqları İdman Təşkilatları Assosiasiyası, Azərbaycan Güləş Federasiyası və "Arkoz Qazax Sement Zavodu” MMC arasında əməkdaşlıq memorandumu imzalandıqdan sonra Qazax Ədəbiyyat Muzeyinin qarşısından idman paradı olmuşdur.
Açılış mərasimində rayon icra hakimiyyətinin başçısı Rəcəb Babaşov çıxış edərək tədbir iştirakçılarını, qonaqları, şəhid ailələrini, qaziləri, idmançıları, idmansevərləri salamlamış, əlamətdar gün münasibəti ilə ürək sözlərini söyləmişdir. Bildirmişdir ki, son illər Qazax bir sıra respublika yarışlarına, turnirlərə evsahibliyi etmişdir. Rayon idmançıları 2025-ci il ərzində beynəlxalq yarışlarda 15-i qızıl, 10-u gümüş, 14-ü bürünc olmaqla, 39, respublika səviyyəli yarışlarda 27-si qızıl, 14-ü gümüş, 21-i bürünc olmaqla 62 medal qazanmışlar.
Gənclər və idman naziri Fərid Qayıbov və keçən il Azərbaycanın “İdman Paytaxtı” olmuş Qəbələnin RİH başçısı Səbuhi Abdullayev çıxış edərək “Qazax İdman Paytaxtı-2026”nın açılış mərasiminin yüksək səviyyədə təşkil olunmasını diqqətə çatdırmışlar. Sonra “İdman Paytaxtı” layihəsinin rəmzi açarı Qəbələdən təhvil alınaraq Qazax rayonuna təqdim edilmişdir. Əməkdar idman ustası və Əməkdar məşqçi, respublika Ağırlıqqaldırma Federasiyasının vitse-prezidenti Firdovsi Umudov çıxış edərək Qazax ictimaiyyətini, idmançıları əlamətdar gün münasibətilə təbrik etmiş, qazaxlı idmançılara gələcək idman karyeralarında uğurlar arzulamışdır.
Sabir ƏLİYEV,
“Azərbaycan”
png_1777362658.png)
