Son illərə nəzər yetirdikdə Azərbaycanın xarici siyasətində davamlı uğurların şahidi oluruq. Bu sahədə dövlətimiz milli maraqlara nail olmaq üçün qarşıya məqsədlər qoyur, istiqamətlər və alətlər məcmusu formalaşdırır. Məqsəd regional təhlükəsizlik arxitekturasını təmin etmək, hədəflərə çatmaq və iqtisadi inkişafı dəstəkləməkdir. Qarşıya qoyulan məqsədlərə çatmaqla bu prosesin əhatəsini genişləndiririk.
Bu gün Azərbaycan təkcə regionla kifayətlənmir, beynəlxalq təhlükəsizlik arxitekturasının yenidən qurulmasında da fəal iştirak edir. Nəqliyyat və kommunikasiya xətlərinin açılması, iqtisadi inkişaf və region xalqlarının rifahının yaxşılaşdırılması kimi tarixi missiyanı məhz Azərbaycan üzərinə götürüb. Bu çətin tapşırıqların öhdəsindən gəldiyimiz üçün dünyanın müxtəlif yerlərində Azərbaycanın təcrübəsi öyrənilir.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, Azərbaycan Prezidenti İlham Əliyevin ABŞ Prezidenti Donald Tramp tərəfindən “öz işini bilən güclü lider” kimi xarakterizə olunması tamamilə layiqli qiymətləndirmədir. Böyük dövlət liderinin bu sözləri bütün xalqımız üçün qürur mənbəyidir. Mürəkkəb region olan Cənubi Qafqazda uğur qazanmaq, önə çıxmaq və bölgənin inkişafına istiqamət vermək asan məsələ deyil. Bütün bunlar Azərbaycan Liderinin səylərinin və uzaqgörən siyasətinin nəticəsidir.
“Qloballaşma ilə əlaqədar yeni dövrdə məsafələr azalır və bu, siyasi, iqtisadi maraqların təmin olunmasında fəal xarici siyasət tələb edir. Dünya siyasəti artıq qapanma deyil, açılma tələb edir. Gücün konsolidasiyası təhlükəsizliyə nail olmağın vacib yoludur. Qlobal siyasi-iqtisadi münasibətlərdə və xarici siyasət prinsiplərində baş verən dəyişikliklər dövlətin xarici siyasət strategiyalarının iqtisadi güc üzərindəki təsirini göstərir.
Azərbaycan iqtisadiyyatını inkişaf etdirmək və qlobal iqtisadi mövqeyini möhkəmləndirmək üçün mühüm addımlar atır. Suriyaya qaz nəql etməyimiz təchizat marşrutlarını şaxələndirməkdə ölkəmizin qabaqcıl mövqedə olduğunu göstərir”, - deyə A.Badamov vurğulayıb.
O qeyd edib ki, Azərbaycan Lideri praqmatik, təşəbbüskar və inkişafyönümlü xarici siyasət strategiyalarına açıqdır. Bu səbəbdən Prezident İlham Əliyev fərqli coğrafiyalarda və müxtəlif formatlı beynəlxalq görüşlərdə iştirak edir. Bu iştiraklar xüsusi dəvətlərin nəticəsidir. Məsələn, oktyabrın 1-2-də “Avropa Siyasi Birliyi”nin Kopenhagendə keçirilən 7-ci Zirvə Görüşündə, oktyabrın 6-7-də Türk Dövlətləri Təşkilatının (TDT) Qəbələ Sammitində, oktyabrın 9-10-da Müstəqil Dövlətlər Birliyi Dövlət Başçıları Şurasının Düşənbədə keçirilən Sammitində və oktyabrın 12-də ABŞ Prezidenti Donald Trampın, həmçinin Misir, Qətər və Türkiyə liderlərinin iştirak etdikləri Şarm əl-Şeyx şəhərindəki Yaxın Şərq Sülh Sammittində Azərbaycan Prezidentinin iştirakı ölkəmizin artan qlobal nüfuzunu göstərir. Oktyabr ayı ərzində Prezident İlham Əliyevin dörd fərqli coğrafiyada iştirak etdiyi dördüncü sammit Azərbaycanın beynəlxalq arenada fəal və etibarlı tərəfdaş kimi qəbul edildiyinin sübutudur. Azərbaycan Liderinin müharibədən əvvəl və sonra tətbiq etdiyi strategiyaların öyrənilməsi və onlardan bəhrələnmək istəyi digər dövlətlərin təşəbbüskarlığında da öz əksini tapır
Deputatın sözlərinə görə, Rusiya Prezidenti Vladimir Putin və Fransa Prezidenti Emmanuel Makronla keçirilən görüşlər mürəkkəb məsələlərin həllində Azərbaycan Liderinin siyasi savadını və şəxsi keyfiyyətlərini ortaya qoyur. Dünya liderləri Azərbaycan Prezidentinə böyük ehtiram göstərirlər. Bu baxımdan da beynəlxalq arenada dövlətimizin başçısı mövqeyi və sözünün çəkisi olan dünyamiqyaslı siyasi xadim kimi qəbul olunur. Azərbaycan xarici siyasətdə aqressiv strategiyalardan uzaq, qurucu və tarixi əhəmiyyət daşıyan addımlar atır. Əminliklə söyləmək olar ki, qarşılıqlı hörmət prinsipinə əsaslanan tərəfdaşlarla münasibətlərin daha da dərinləşdirilməsi və səylərin möhkəmləndirilməsi bundan sonra da davam etdiriləcək.
jpg_1785587612jpg_1785738592jpg_1787763249.jpg)
