Prezident İlham Əliyevin Naxçıvan Muxtar Respublikasına son səfəri ilk baxışdan sosial-iqtisadi inkişaf, infrastruktur və yeni layihələrin təqdimatı ilə müşayiət olunan növbəti səfərlərindən biri kimi görünə bilər. Lakin səfərin proqramına, Prezidentin Azərbaycan Televiziyasına verdiyi müsahibəyə və səfərdən dərhal sonra qəbul edilmiş qərarlara kompleks şəkildə nəzər saldıqda, bunun daha geniş siyasi və geostrateji məzmun daşıdığı görünür. Bu, dövlətimizin başçısının Naxçıvana Prezident kimi 17-ci səfəri idi. Prezident özü də müsahibəsində vurğuladı ki, hər bir səfər konkret nəticələrlə müşayiət olunub və muxtar respublikanın inkişafı bundan sonra da davam etdiriləcək.
Bu sözləri AZƏRTAC-a açıqlamasında politoloq Yalçın Hacızadə söyləyib.
O bildirib ki, müstəqillik tariximizdə Naxçıvanın xüsusi siyasi və strateji əhəmiyyəti həmişə olub. Azərbaycanın əsas hissəsindən coğrafi baxımdan ayrı düşməsi muxtar respublikanı həm təhlükəsizlik, həm enerji, həm də nəqliyyat baxımından xüsusi yanaşma tələb edən əraziyə çevirib. Prezident İlham Əliyevin səfər zamanı verdiyi mesajlardan görünür ki, artıq əsas məqsəd Naxçıvanın mövcud problemlərinin aradan qaldırılması ilə kifayətlənmək deyil. Məqsəd Naxçıvanı gələcək regional proseslərin fəal iştirakçısına çevirməkdir. Bu baxımdan səfər çərçivəsində hərbi təhlükəsizlikdən enerjiyə, sənayedən nəqliyyata, sosial siyasətdən şəhərsalma və mədəni irsə qədər bütün sahələrin eyni proqram daxilində təqdim edilməsi təsadüfi deyil. Bu, vahid inkişaf konsepsiyasının formalaşdırıldığını göstərir.
Y.Hacızadə qeyd edib ki, səfərin ən mühüm istiqamətlərindən biri muxtar respublikanın enerji təhlükəsizliyi məsələsi idi. Naxçıvanın enerji sisteminin inkişafı artıq sadəcə daxili tələbatın ödənilməsi məsələsi deyil. Dövlətimiz Naxçıvanı gələcəkdə elektrik enerjisi istehsal edən və müəyyən həcmdə enerji ixrac edən mərkəzə çevirməyə çalışır. Buna görə Prezident İlham Əliyev Naxçıvan Sənaye Parkının tərkibində 300 meqavat gücündə istilik elektrik stansiyasının və 600 hektardan artıq ərazidə gələcəkdə yüzlərlə meqavat gücündə Günəş elektrik stansiyalarının yaradılmasının nəzərdə tutulduğunu açıqladı. Çünki burada söhbət yalnız Naxçıvanın elektriklə təmin edilməsindən getmir. Məqsəd Naxçıvanı regional enerji sisteminə inteqrasiya etməkdir.
Politoloqun fikrincə, səfərin ən böyük geosiyasi mesajı isə Zəngəzur dəhlizi ilə bağlı Prezidentin açıqlamaları olub. Dövlətimizin başçısı Azərbaycanın əsas hissəsini Naxçıvanla birləşdirəcək nəqliyyat bağlantısının yaradılmasının çoxdankı məqsəd olduğunu qeyd etdi. Həmçinin 2025-ci il avqustun 8-də Vaşinqtonda əldə edilmiş razılaşmalardan sonra TRIPP layihəsinin icrasına başlanıldığını, bu layihənin tezliklə həyata keçirilməsinin gözlənildiyini və Naxçıvanın Şərq-Qərb nəqliyyat dəhlizinin bir qolu olmaqla yanaşı, gələcəkdə Şimal-Cənub marşrutunun da əlavə bağlantısına çevrilə biləcəyini diqqətə çatdırdı. Bu məqam Naxçıvanın artıq yalnız Azərbaycan-Ermənistan-Türkiyə üçbucağında nəzərdən keçirilmədiyini göstərir. Naxçıvan layihəsi Orta Dəhliz marşrutunun davamı olaraq Uzaq Şərqin Avropaya çıxışı üçün ən etibarlı, qısa və şaxələnmiş yoluna çeviriləcəyindən xəbər verir.
jpeg_1787511486.jpeg)
jpg_1787511121.jpg)
