İnsan ləyaqətinin, ağrının, həqiqəti bilmək hüququnun milliyyəti yoxdur.
AZƏRTAC xəbər verir ki, bunu Bosniya və Herseqovinanın insan hüquqları və qaçqınlar üzrə naziri Sevlid Hurtiç Əsir və itkin düşmüş, girov götürülmüş vətəndaşlarla əlaqədar Dövlət Komissiyasının (DK) təşkilatçılığı ilə keçirilən “İtkin düşmüş şəxslər probleminin həllində etimadın gücləndirilməsi və effektiv mexanizmlərin inkişaf etdirilməsi” mövzusunda Bakı Dialoqu formatında IV beynəlxalq konfransın plenar sessiyasında çıxışı zamanı deyib.
Sevlid Hurtiç bildirib ki, itkin düşmüş şəxslər məsələsi yalnız statistika, hesabatlar və beynəlxalq sənədlərdən ibarət deyil. Bu məsələnin arxasında ailə süfrələrindəki boş stullar, ailələrin qoruyub saxladıqları fotoşəkillər, cavab gözləyə-gözləyə qocalan analar və valideynləri olmadan böyüyən uşaqlar dayanır. O vurğulayıb ki, ailənin itkin düşmüş üzvünün taleyini bilmək hüququ siyasi şəraitdən, zamanın keçməsindən, dövlətlər arasındakı sərhədlərdən və ayrı-ayrı şəxslərin maraqlarından asılı olmamalıdır.
Nazir qeyd edib ki, Bosniya və Herseqovina müharibənin ağır nəticələrinə baxmayaraq, itkin düşmüş şəxslərin axtarışı və identifikasiyası prosesində mühüm addımlar atıb. Onun sözlərinə görə, beynəlxalq dəstək, məhkəmə-tibbi metodlar, DNT analizi, məlumat mübadiləsi və axtarışları davam etdirmək əzmi mühüm əhəmiyyət daşıyır. Lakin texnologiyanın özü kifayət deyil. “DNT şəxsiyyəti təsdiq edə bilər, amma yalnız insan ailəyə ləyaqətini qaytara bilər”, – deyə o bildirib.
Sevlid Hurtiç etimadın vacibliyini xüsusi vurğulayıb. “Etimad olmadan zəruri əməkdaşlıq yoxdur, əməkdaşlıq olmadan məlumat mübadiləsi yoxdur, məlumat olmadan yeni izlər yoxdur, yeni izlər olmadan isə ailələr qeyri-müəyyənlik içində qalırlar”, – deyə nazir bildirib. O, itkin düşmüş şəxslərin ailələrinin prosesin mərkəzində olmasının, onların dinlənilməsinin, həqiqətin onlara çatdırılmasının və məlumatlara çıxış imkanlarının təmin edilməsinin vacibliyini qeyd edib.
Nazir beynəlxalq və regional əməkdaşlığın həlledici əhəmiyyət daşıdığını bildirib. Onun sözlərinə görə, qurumlar əməkdaşlıq etməli, məlumatlar mübadilə olunmalı, işlər bir-biri ilə əlaqələndirilməli və dövlətlər birgə fəaliyyət üçün imkan yaratmağa hazır olmalıdır. “Onları axtaraq, nə qədər ki, bir iz var. Onların adlarını qoruyaq, nə qədər ki, yaddaş var. Həqiqəti danışaq, nə qədər ki, sual var və hər bir ailə cavab alana qədər dayanmayaq”, – deyə Sevlid Hurtiç vurğulayıb.
jpeg_1791371462.jpeg)
jpeg_1792665417.jpeg)
