Milli mətbuatımızın 150 illiyi ölkəmizdə geniş qeyd olunacaq

Bu barədə Prezidentin sərəncamı KİV nümayəndələri və ictimaiyyət tərəfindən  razılıqla qarşılanıb

Xəbər verildiyi kimi, Prezident İlham Əliyev Azərbaycan milli mətbuatının 150 illik yubileyinin keçirilməsi haqqında sərəncam imzalamışdır. Sərəncamda qeyd edilir ki, XIX əsrin ikinci yarısında dünyanın neft və sənaye mərkəzlərindən birinə çevrilmiş və iqtisadi yüksəliş dövrünü yaşayan Azərbaycanın ictimai-siyasi və mədəni həyatında əsaslı dəyişikliklər baş vermiş, maarifçilik hərəkatı genişlənməyə başlamış, milli mətbuatın yaranması zərurəti meydana çıxmışdır. 

Məhz buna görə də 150 il əvvəl - 1875-ci il iyulun 22-də görkəmli ziyalı, təbiətşünas alim və maarifçi-publisist Həsən bəy Zərdabinin Azərbaycan dilində nəşr etdirdiyi "Əkinçi" qəzeti milli mətbuatımızın ilk nümunəsi və ölkəmizin həyatında mühüm hadisə kimi tarixə düşmüşdür. "Qəzetin muradı xalqın gözünü açmaqdır, həyatda olan işləri ayna kimi xalqa göstərsin ki, xalq da onun əlacının dalınca getsin" deyən Həsən bəy Zərdabinin "Əkinçi"si  əzm, fədakarlıq, mübarizə məktəbi  kimi  ötən 150 ildə mətbuatımıza işıq salan əqidəli jurnalist və maarifçi ziyalı ordusu yetişdirmişdir. 

1998-ci ildə senzuranı ləğv edən Ulu Öndər Heydər Əliyev hər zaman  mətbuatın cəmiyyətə təsir gücünü diqqətə almış, mətbuat və söz azadlığı, kütləvi informasiya vasitələrinin maddi-texniki bazasının möhkəmləndirilməsi istiqamətində ardıcıl tədbirlər həyata keçirmişdir. Jurnalist əməyini hər zaman yüksək qiymətləndirən Ümummilli Lider 2000-ci ildə mətbuatımızın tarixi ilə bağlı "Azərbaycanda milli mətbuatın yaradılmasının 125 illiyi haqqında" ilk fərman imzalamışdır. Azərbaycan jurnalistləri də dövlət başçısının bu diqqətinə, qayğısına laqeyd qalmamış, onu 2002-ci ildə "Jurnalistlərin dostu" seçmişlər. 

Son 20 ildə isə media azadlığı, jurnalist sərbəstliyi geniş şəkildə təmin olunmuşdur. Bu təminatın müəllifi Prezident İlham Əliyevdir. Azərbaycanda bu gün jurnalistlərin azad informasiya toplamaq, onu sərbəst şəkildə yaymaq, cəmiyyətdə baş verən hadisələr haqqında sərbəst fikir mübadiləsi aparmaq üçün hər cür şərait mövcuddur. Jurnalistlərə istənilən sahələr üzrə məqalələr yazmaq, ictimai əhəmiyyət kəsb edən məsələləri cəmiyyətin müzakirəsinə çıxarmaq və sərbəst fikir mübadiləsi aparmaq imkanları yaradılmışdır. Bunlardan əlavə, dövlət xüsusi təşəbbüslə çıxış edərək mətbuatın inkişafını şərtləndirən proqram qəbul etmişdir. İndi Azərbaycanda mətbuatın inkişafına dövlət dəstəyi verən Medianın İnkişafı Agentliyi - MEDİA kimi qurum var.

İllərdir digər sahələrdə olduğu kimi, mətbuatın, ümumilikdə KİV-in inkişafı istiqamətində də Ulu Öndərin siyasətini davam etdirən Prezident İlham Əliyev bu gün ölkə jurnalistlərinin yaxın dostu və himayədarıdır. Hələ 2009-cu ildə dövlət başçısının sərəncamı ilə qəzetlərin "Azərbaycan" nəşriyyatına olan borcları silinmiş,  "Əməkdar jurnalist" fəxri adı bərpa olunmuşdur. Bundan sonra mətbuatın 135 illik yubileyi münasibəti ilə 100-dən çox jurnalist "Əməkdar jurnalist", "Əməkdar mədəniyyət işçisi" fəxri adlarına, "Tərəqqi" medalına layiq görülmüşdür. 2013-cü il iyulun 22-də - Milli Mətbuat Günündə Bibiheybət qəsəbəsində tikilmiş 17 mərtəbəli binadakı 156 mənzilin açarları jurnalistlərə təqdim olunmuşdur. Elə həmin gün dövlət başçısı jurnalistlər üçün daha bir çoxmənzilli yaşayış binasının təməlini qoymuş və həmin bina da bir neçə ildən sonra jurnalistlərin ixtiyarına verilmişdir. İndi həmin binalarda Prezidentin qayğısı sayəsində onlarla jurnalist ailəsi yaşayır.

Mətbuat işçilərinin sosial vəziyyətinin yaxşılaşdırılması istiqamətində atdığı bu addımlar Prezident İlham Əliyevin də jurnalistlərin dostu olduğunu göstərir. Xatırladaq ki, dövlət başçısı ilk dəfə 2010-cu ildə "Jurnalistlərin dostu" olmuşdu. İkinci dəfə isə KİV nümayəndələri Prezidenti özlərinin dostu 2013-cü ildə seçmişlər. Bu münasibətlə keçirilən tədbirdə dövlət başçısı demişdir:  "Müasir dünyada inkişaf etmiş ölkələrdə azad medianın səviyyəsi hər bir ölkənin səviyyəsini göstərir. Azərbaycanın qarşısında isə belə məqsəd qoyulub ki, Azərbaycan gələcəkdə inkişaf etmiş ölkələrin sırasına daxil edilsin. Belə olan halda Azərbaycanda media ilə bağlı məsələlər ən yüksək səviyyədə öz həllini tapmalıdır. Mən də jurnalistlərin  dostu kimi çalışacağam ki, bundan sonra da azad jurnalistikanın inkişafı üçün öz səylərimi əsirgəməyim. Mən dostluqda sadiq adamam və hesab edirəm ki, bizim dostluğumuz bundan sonra da uğurla davam edəcək".

Bütün bunlar o deməkdir ki,  Azərbaycanda mətbuata dəstək və qayğı dövlətin prioritet siyasətidir. Bu baxımdan ölkəmizin iqtisadi imkanlarının artdığı, demokratikləşmə prosesinin keyfiyyətcə yeni mərhələyə qədəm qoyduğu indiki zamanda mətbuatın da üzərinə düşən vəzifələr xüsusi mahiyyət kəsb edir. Yeni mərhələnin siyasi reallıqları mətbuatın cəmiyyətdə təkcə rolunu deyil, həmçinin sosial öhdəliklərini, məsuliyyətini artırıb. Dövlətin yüksək diqqət və qayğısı əvəzində bu gün obyektivlik, operativlik, peşəkarlıq, milli təəssübkeşlik və nəhayət dövlətçilik Azərbaycan mətbuatının əsas keyfiyyət göstəriciləri olmalıdır. Bunu bizdən həm də 150 yaşlı mətbuatımızın şərəfli tarixi tələb edir.

Züleyxa ƏLİYEVA,

"Azərbaycan"