Masallının Banbaşı kəndində vətənimizin ərazi bütövlüyü uğrunda şəhid olmuş Akifzadə Elmir Gündüz oğlunun şəhadətinin 6-cı ildönümü ilə əlaqədar anım mərasimi keçirilib.
Mərasimdə rayon icra hakimiyyətinin kənd ərazi nümayəndəliyinin və bələdiyyəsinin əməkdaşları, şəhid ailələri, müharibə iştirakçıları, din xadimləri, ziyalılar və kənd sakinləri iştirak ediblər. İştirakçılar şəhidin məzarını ziyarət edib, məzarına gül dəstələri qoyublar. Şəhidin ruhuna dualar oxunub, Vətən uğrunda canından keçən qəhrəmanların xatirəsinin daim əziz tutulduğu vurğulanıb. Bildirilib ki, şəhid ailələri, müharibə əlilləri və iştirakçıları dövlətin daim diqqət və qayğısı ilə əhatə olunurlar.
Şəhidin ailə üzvləri göstərilən diqqət və qayğıya görə minnətdarlıqlarını bildiriblər.
***
Şirvanda şəhid Xəqani Füzuli oğlu Məmmədovun Şəhidlər xiyabanında anım günü ilə əlaqədar tədbir keçirilib. Tədbirdə şəhər icra hakimiyyətinin başçısı İlqar Abbasov, Polis Şöbəsinin rəisi Seymur Əfəndiyev, regional təşkilatların, idarə və müəssisələrin əməkdaşları, şəhid ailələrinin üzvləri, müharibə iştirakçıları və ictimaiyyət nümayəndələri iştirak ediblər.
Şəhidin xatirə guşəsi ziyarət edildikdən sonra çıxış edən ŞİH başçısı İlqar Abbasov Azərbaycan Ordusunun yüksək döyüş qabiliyyətindən, Vətən müharibəsi zamanı hərbçilərimizin nümayiş etdirdiyi qəhrəmanlıqdan söz açıb. Bildirib ki, Azərbaycanın tarixi Zəfərinin qazanılmasında canından keçən şəhidlərimizin əziz xatirəsi xalqımız tərəfindən daim ehtiramla yad olunur. İ.Abbasov həmçinin şəhid ailələri və müharibə iştirakçılarına göstərilən diqqət və qayğıdan danışıblar. Şirvan şəhərində də şəhid ailələri və müharibə iştirakçılarına xüsusi həssaslıqla yanaşıldığını, onların müraciət və problemlərinin həlli istiqamətində zəruri tədbirlərin həyata keçirildiyini diqqətə çatdırıb.
Sonra Şəhidlər xiyabanında dəfn olunan digər şəhidlərin məzarları ziyarət edilib, onların xatirələri ehtiramla yad olunaraq məzarları üzərinə gül dəstələri düzülüb.
Şəhid Xəqani Məmmədov ölümündən sonra “Vətən uğrunda” və “Suqovuşanın azad olunmasına görə” medalları ilə təltif edilib.
Seyran CAVADOV,
“Azərbaycan”
