Mançesterdə bir “Sabah” 

Bir azərbaycanlı jurnalist üçün bəlkə də ən yaddaqalan məqamlardan biri Azərbaycan klubunun İngiltərənin nəhəng komandalarından biri ilə qarşılaşmasını yerində işıqlandırmaqdır.

Bu il artıq üçüncü dəfədir ki, Azərbaycan klubunun Britaniyada İngiltərə təmsilçisinə qarşı oyununu işıqlandırıram. İlin əvvəlində “Qarabağ”ın “Nyukasl” və “Liverpul”la qarşılaşmalarında olmuşam. İndi isə yolum Mançesterə düşüb. “Sabah”ın “Mançester Yunayted”lə oyununu işıqlandırmağa...

Londondan Mançesterə qatarla təxminən iki saat yarımlıq yoldur. Sentyabrın 9-da, oyundan bir gün əvvəl şəhərə çatıram. İlk ünvanım “Mançester Yunayted”in Karrinqtondakı məşq bazasıdır. Burada komandanın oyunöncəsi mətbuat konfransı keçiriləcək.

Məni Karrinqtona aparan taksi sürücüsü Mançesterdə doğulub böyüyüb. “Sabah” haqqında eşidib-eşitmədiyini soruşuram. Məşq bazasına getdiyimi biləndə dərhal cavab verir: “Bəli, eşitmişəm. Sizin baş məşqçiniz televiziya şousunda qalib gəlib”.

Bu qısa söhbət belə göstərir ki, bu gün Mançesterdə diqqət təkcə “Sabah”ın deyil, onun baş məşqçisi Valdas Dambrauskasın da üzərindədir. Onun “Kim milyonçu olmaq istəyir?” televiziya şousunda qalib gəlməsi həm Azərbaycan, həm də xarici mediada geniş maraq doğurub. Dünən “Mançester Yunayted”in mətbuat konfransından sonra da ingilis jurnalistlər bu barədə öz aralarında müzakirələr edirdilər.

“Sabah”ın qarşısında çətin bir sınaq var: “Old Trafford”… Dambrauskas özü də komandasını hansı səviyyədə rəqiblərin gözlədiyini çox yaxşı anlayır. O, mətbuat konfransında “Sabah”ın olduqca çətin rəqiblərlə üz-üzə gələcəyini, “Arsenal”, “Mançester Yunayted”, “Barselona” kimi dünya futbolunun nəhənglərinə qarşı oynayacaqlarını vurğuladı.

Biz də bunun fərqindəyik. Bilirik ki, “Sabah”ın işi asan deyil. İngiltərə və dünya futbolunun ən böyük klublarından birinin qarşısına “Old Trafford”da çıxmaq özü böyük sınaqdır.

Amma bəzən futbol yalnız nəticədən ibarət olmur.

Azərbaycan klubunun bu səviyyədə, belə stadionlarda, belə rəqiblərə qarşı meydana çıxması özü böyük hadisədir. Dünən axşam “Old Trafford”da “Sabah”ın oyunöncəsi məşqini izləyərkən bunu bir daha hiss etdim. Azərbaycan komandasının bu əfsanəvi stadionda məşq etməsini görmək, bunu lentə almaq, həmin anların içində olmaq və ölkəyə çatdırmaq jurnalist kimi mənim üçün xüsusi hiss idi. Bəzən bunu sözlə ifadə etmək həqiqətən çətindir.

İndi Mançesterdə oyuna hələ saatlar var. Şəhər öz adi ritmindədir, amma “Sabah” üçün bu, adi bir gün deyil.

Matçı izləmək üçün təxminən 300 azərbaycanlının stadiona gələcəyi gözlənilir. Artıq Niderlanddan, Qlazqodan, başqa şəhər və ölkələrdən Mançesterə gələn tanışlarla qarşılaşırıq. Onlar nəticədən asılı olmayaraq, komandaya dəstək olmaq üçün buradadırlar. Heç kim qarşılaşmanın asan olacağını düşünmür. “Mançester Yunayted” kimi futbol nəhənginin qarşısına çıxmaq çətindir. Amma Valdas Dambrauskasın dediyi kimi, bu, futbolçular üçün də böyük təcrübədir. Belə oyunlardan komanda çox şey öyrənə bilər. Baş məşqçi mətbuat konfransında bu təcrübədən zövq almağa çalışacaqlarını söylədi.

Bəlkə də bu gün bizim üçün də ən doğru yanaşma elə budur.

Bir jurnalist kimi “Old Trafford”dan Azərbaycan klubunun oyununu işıqlandırmaq, tribunada Azərbaycan bayraqlarını görmək, meydanda ölkəmizi təmsil edən komandanı izləmək və bütün bunları oxuculara çatdırmaq özü zövq alınacaq bir hadisədir.

İşimiz asan deyil, oyun da asan olmayacaq. Amma bu gün bir şeyi əminliklə deyə bilərəm: Azərbaycan futbolunun “Sabah”ı çox parlaq və ümidvericidir. Əminəm ki, qarşıdakı illərdə Azərbaycan klublarının belə böyük oyunlarının hələ çoxunu işıqlandırmaq imkanım olacaq.