Cəlilabadın Kazımabad kənd tam orta məktəbində rayon icra hakimiyyətinin təşkilatçılığı ilə "Erkən nikahlar ailə dəyərlərinə xələl gətirir" mövzusunda maarifləndirici tədbir keçirilib.
Tədbirdə rayon icra hakimiyyəti başçısı aparatının Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Xumarə Xəlilova, həmin komissiyanın uşaqlarla iş üzrə məsləhətçi-psixoloqu Günay İbadova, Kazımabad kənd inzibati ərazi dairəsi üzrə nümayəndə Ceyhun Rəhimov, Göytəpə polis bölməsinin yetkinlik yaşına çatmayanların işləri üzrə inspektoru Behnam Əmirov, rayon təhsil sektorunun aparıcı-məsləhətçisi Tacəddin Əli, Dini Qurumlarla İş üzrə Dövlət Komitəsinin Masallı bölgəsi üzrə şöbənin baş məsləhətçisi Cavidan Rəşidov, rayon Gənclər və idman sektorunun əməkdaşı Salamat Nəcəfov iştirak ediblər.
Erkən nikahların həm sosial, həm mənəvi, həm də sağlamlıq baxımından zərərləri barədə geniş müzakirələrin aparıldığı tədbirdə vurğulanıb ki, yeniyetmə yaşında ailə quran insan həyatın ritmini pozmuş olur. Orta məktəbi bitirmək, təhsili ali və orta ixtisas məktəblərində davam etdirib mütəxəssis kimi yetişmək, bilik və bacarıqları cəmiyyətin inkişafı istiqamətində yönəltmək hər bir yeniyetmə və gəncin strateji hədəfi olmalıdır. Lakin erkən nikahlar bu hədəfə çatmaqda ən böyük maneədir. Bildirilib ki, erkən yaşda qurulan nikahlar yeniyetmələrin sağlamlığına, gələcək həyatlarına ciddi mənfi təsir göstərməklə yanaşı, ailədaxili zorakılıq hallarına da gətirib çıxarır. Çünki insanın dünyagörüşü 18 yaşından sonra formalaşmağa başlayır. İnsanda bu yaşadək ailə haqqında təsəvvürlər ya olmur, ya da yanlış olur. Son dövrlər artan intihar hadisələri, qadınlara qarşı şiddət hallarının böyük əksəriyyəti məhz müqəddəs ailə prinsiplərinin dağılmasının nəticəsidir. Çıxış edənlər həmçinin erkən yaşlarda nikaha daxil olan yeniyetmələrin reproduktiv sağlamlıqla bağlı problemlər yaşamasından, ana və uşaq ölümlərindən danışıblar. O da vurğulanıb ki, son illər Azərbaycanda həm erkən nikahların, həm də yeniyetmə dövründə dünyaya övlad gətirən qadınların sayı artıb. Gələcək nəsillərin sağlamlıq vəziyyəti isə yeniyetmə qızların - gələcək anaların sağlamlığından birbaşa asılıdır.
Tədbirdə, habelə erkən nikah problemi ilə bağlı aparılan elmi-analitik araşdırmalar və bu problemin qarşısının alınması məqsədilə son illər həyata keçirilən tədbirlər, eləcə də erkən nikahla mübarizə yolları barədə məlumat verilib. Sonda iştirakçıları maraqlandıran suallar cavablandırılıb. 
              
Ağaddin BABAYEV,
Cəlilabad rayon sakini