Kanada Ukraynanın hava hücumundan müdafiə sistemləri üçün raketlərin alınmasına 350 milyon Kanada dolları (təxminən 218 milyon avro) ayıracaq. Bu barədə Baş nazir Mark Karni Kalqaridə Ukrayna Prezidenti Volodimir Zelenski ilə birgə mətbuat konfransında bildirib.
Karninin sözlərinə görə, raketlər ABŞ-nin Jumpstart mexanizmi vasitəsi ilə təchiz ediləcək. "Bu avadanlıq paketi Ukrayna xalqını, ölkənin infrastrukturunu və səmasını qorumağa kömək edəcək", - deyə o əlavə edib. Kanadanın Baş naziri həmçinin qışdan əvvəl Ukraynanın Rusiyanın hücumuna məruz qalan enerji şəbəkəsinə yardım üçün tədbirləri açıqlayıb: Ottava qışda qazın alınması və çatışmazlıq dövrlərində elektrik enerjisi istehsalı da daxil olmaqla enerji təhlükəsizliyini dəstəkləmək üçün Avropa Yenidənqurma və İnkişaf Bankına (AYİB) ümumilikdə təxminən 435 milyon Kanada dolları (təxminən 271 milyon avro) məbləğində yeni kredit zəmanətləri verəcək.
Bundan əlavə, Kanada Ukraynanın bərpası üçün 200 milyon Kanada dolları (təxminən 125 milyon avro) güzəştli kredit, eləcə də Ukrayna Silahlı Qüvvələri veteranlarının reabilitasiyası üçün 40,1 milyon Kanada dolları (25 milyon avro) və Rusiya tərəfindən qanunsuz olaraq aparılmış ukraynalı uşaqların geri qaytarılması səylərini dəstəkləmək üçün 6 milyon Kanada dolları (3,75 milyon avro) ayıracaq.
Kalqaridə V.Zelenski və M.Karni 100 illik tərəfdaşlıq haqqında bəyannamə də imzalayıblar. Sənəddə müdafiə innovasiyası sahəsində əməkdaşlıq nəzərdə tutulur. M.Karni vurğulayıb ki, Ottava növbəti iki il ərzində dron istehsal gücünü 1 milyon PUA-ya çatdırmağı planlaşdırır. Kanada onların üçdə birini Kiyevə bağışlamağı öhdəsinə götürür.
Ukraynanın xarici işlər naziri Andrey Sibiqa isə DW radiostansiyası müxbirinə verdiyi şərhdə vurğulayıb ki, Ukrayna təhlükəsizlik məsələlərində unikal təcrübəsini, eləcə də döyüş meydanında hər gün sınaqdan keçirilən hərbi texnologiyalarını Kanada ilə bölüşəcək. Ölkələr həmçinin kəşfiyyat, kibermüdafiə, hibrid təhdidlərə qarşı mübarizə və dezinformasiya sahələrində əməkdaşlığı dərinləşdirəcəklər. Kanada həm də Ukraynanın digər müttəfiqləri ilə birlikdə Rusiyanın gələcək təcavüzünün qarşısını almaq üçün təhlükəsizlik zəmanəti mexanizminin yaradılmasında iştirak etməyə hazır olduğunu bəyan edib.
Rizvan CƏFƏROV,
"Azərbaycan"
jpg_1789895578.jpg)
