COP31-in prezidenti, Türkiyənin ətraf mühit, şəhərsalma və iqlim dəyişikliyi naziri Murat Kurumun sədrliyi ilə Banqladeş, Misir, İndoneziya, İran, Malayziya, Nigeriya, Pakistan, Azərbaycan və Türkiyədən ətraf mühit və iqlim üzrə məsul nümayəndələr COP31 çərçivəsində D-8 təşkilatı nazirlərinin görüşü üçün bir araya gəliblər.
AZƏRTAC “Anadolu” agentliyinə istinadla xəbər verir ki, görüşün açılışında çıxış edən M. Kurum Türkiyənin COP31 sədrliyinə hazırlaşdığı tarixi dövrdə D-8 ətraf mühit nazirləri görüşünün İstanbulda keçirilməsinin son dərəcə əhəmiyyətli olduğunu bildirib.
O, iyulun 16-da başlayan məsləhətləşmələrin bu gün nazirlər səviyyəsində davam etdiyini və D-8 ölkələri arasında ətraf mühit və iqlim sahəsində əməkdaşlığı daha da inkişaf etdirmək üçün birgə addımların birlikdə qiymətləndiriləcəyini qeyd edib.
M. Kurum COP31 prosesində ortaq yanaşmanın həm də inkişaf etməkdə olan ölkələrin qlobal iqlim gündəliyində rolu ilə bağlı güclü bir mesaj göndərəcəyinə inandığını bildirib.
Nazirlər iqlim dəyişikliyinin artıq gələcək üçün risk deyil, iqtisadi inkişafa, şəhərlərə, ərzaq təhlükəsizliyinə, enerji sistemlərinə, cəmiyyətlərin rifahına birbaşa təsir edən qlobal problem olduğunu qeyd ediblər. Bununla belə, onlar iqlim dəyişikliyi ilə mübarizənin bir çox sahəsində verilən vədlərlə onların yerindəcə həyata keçirilməsi arasında hələ də əhəmiyyətli bir fərq olduğunu vurğulayıblar.
Nazir Kurum bildirib ki, Türkiyə inkişaf etmiş və inkişaf etməkdə olan ölkələr arasında etimad qurmağa, müxtəlif coğrafiyalarda dialoqu inkişaf etdirməyə çalışır.
D-8-in təsis prinsiplərinin bu gün də qüvvədə qaldığını, təşkilatın ölkələr arasında əməkdaşlığı gücləndirdiyini və bu əməkdaşlığın iqlim dəyişikliyi ilə mübarizə, davamlı inkişaf sahələrində daha da inkişaf etdirilməsini hədəflədiyini bildirən Kurum, çıxışını yekunlaşdırıb: “Asiyadan Afrikaya və Yaxın Şərqə qədər uzanan geniş coğrafiyası və bir milyardı aşan əhalisi olan D-8 ailəsi qlobal iqlim gündəliyində xüsusi yerə və transformativ gücə malikdir. D-8-in nümayiş etdirəcəyi ortaq iradə COP31-in praktik yanaşması baxımından xüsusi əhəmiyyət kəsb edir. Bu gün keçirəcəyimiz görüşlərdə bütün bunları qiymətləndirəcək və ortaq prioritetlərimizi, əsasən iqlim dəyişikliyinə uyğunlaşma, itki və zərər, iqlim maliyyəsi, ədalətli keçid və D-8 ölkələri arasında əməkdaşlığın gücləndirilməsini müzakirə edəcəyik. Burada nümayiş etdirəcəyimiz ortaq iradənin konkret əməkdaşlıq mexanizmlərinə çevrilməsini hədəfləyirik. İnanıram ki, bu görüşün ən vacib nəticələrindən biri olan İstanbul Bəyannaməsi D-8 ölkələrinin ətraf mühit və iqlim sahəsindəki ortaq vizyonunu ortaya qoyan və keçiriləcək COP31-ə əhəmiyyətli töhfələr verəcək güclü bir siyasi iradə bəyannaməsi olacaq.
Qeyd edək ki, Azərbaycan 2024-cü il dekabrın 19-da D-8 təşkilatının doqquzuncu üzvü seçilib.
