Türkiyə-Azərbaycan münasibətləri heç vaxt adi qonşuluq çərçivəsində olmayıb. Bu münasibətlər “bir millət, iki dövlət” prinsipi üzərində qurulub. Əgər beynəlxalq təcrübədə qonşuluq əlaqələri çox zaman qarşılıqlı maraqlara əsaslanırsa, Türkiyə ilə Azərbaycan arasındakı əlaqələr qardaşlıq və mənəvi bağlılıq üzərində formalaşıb. Bu münasibətlərin zirvəsi isə Şuşa Bəyannaməsinin imzalanması ilə təsdiq olunub.
Bu sözləri AZƏRTAC-a açıqlamasında türkiyəli siyasi şərhçi İsmayıl Cingöz deyib. O bildirib ki, Qarabağ müharibəsi dövründə Türkiyə həm siyasi, həm diplomatik, həm də texnoloji baxımdan Azərbaycana dəstək olub: “Bu, qardaşlıq münasibətinin təbii nəticəsi idi. Türkiyə Azərbaycanla eyni ideallar və milli dəyərlər əsasında hərəkət edərək, üzərinə düşən tarixi missiyanı layiqincə yerinə yetirdi. Eyni zamanda, müharibədən sonra azad edilmiş torpaqlarda yenidənqurma və infrastruktur layihələrində Türkiyənin rolu bu əməkdaşlığın davamı kimi dəyərləndirilir”.
Müsahibimiz əlavə edib ki, bu gün Türkiyə və Azərbaycan Türk Dövlətləri Təşkilatının iki aparıcı qüvvəsi kimi çıxış edirlər: “Şuşa Bəyannaməsi yalnız iki dövlət arasında strateji sənəd deyil, eyni zamanda, Türk Dövlətləri Təşkilatı üçün inteqrasiyanın və birgə hərəkətin nümunə modelidir. Bu sənədlə hər iki ölkənin təhlükəsizliyi, müdafiə və iqtisadi əməkdaşlığı hüquqi müstəvidə rəsmiləşdirilib. Yəni qardaşlıq təkcə mənəvi deyil, hüquqi zəmində də təsdiqini tapıb”.
Ekspertin fikrincə, gələcəkdə Türk Dövlətləri Təşkilatı çərçivəsində müdafiə və iqtisadi inteqrasiya proseslərinin istiqamətinin müəyyənləşdirilməsində Şuşa Bəyannaməsinin rolu həlledici olacaq.
“Yeni dünya düzənində birlikdə hərəkət etmək, qarşılıqlı etimada əsaslanan əməkdaşlıq modeli yaratmaq məhz Azərbaycan-Türkiyə münasibətlərindən keçir. Bu münasibətlər Türk dünyasının gələcək birliyinin və gücünün əsas sütunlarından biridir”, – deyə İsmayıl Cingöz vurğulayıb.
jpg_1765176825.jpg)
