“Həqiqətən də həsəd aparılası bir yerdir” - Türk jurnalistlər Şuşada 

Türkiyə mediasının nümayəndələri noyabrın 8-də Şuşa şəhərinə gəliblər.

AZƏRTAC-ın bölgəyə ezam olunmuş əməkdaşı xəbər verir ki, türk jurnalistlər burada Yuxarı Gövhər Ağa məscidi və Qarabağ küçəsi ilə tanış olublar.

Noyabrın 8-nə - Zəfər Gününə təsadüf edən səfər zamanı qonaqlara məlumat verilib ki, Yuxarı Gövhər Ağa məscidi şəhərin ən qədim ibadətgahıdır. Məscid II Qarabağ xanı İbrahimxəlil xanın qızı, şair və rəssam Gövhərnisə bəyimin (Gövhər ağanın) şərəfinə adlandırılıb. Diqqətə çatdırılıb ki, vaxtilə işğal altında qalmış bütün ərazilərimizdə olduğu kimi, Şuşada da tarixi abidələr, o cümlədən məscidlər dağıdılıb və təhqir edilib. Şəhərdəki 17 məsciddən 16-sı işğalçılar tərəfindən dağıdılmışdı. Şuşa azad edildikdən dərhal sonra Azərbaycan Prezidentinin tapşırığı ilə məscidlərin bərpasına başlanılıb.

Erməni vandalizminə məruz qalan tarixi-dini abidələrdən biri də Yuxarı Gövhər Ağa məscidi olub. Heydər Əliyev Fondu tərəfindən burada aparılan bərpa işlərinə 2021-ci ilin sonlarında start verilib. 2023-cü il mayın 10-da isə Prezident İlham Əliyev, birinci xanım Mehriban Əliyeva və ailə üzvlərinin iştirakı ilə məscidin əsaslı yenidənqurma və bərpadan sonra açılışı olub.

Daha sonra jurnalistlər Şuşanın Qarabağ küçəsinə baş çəkiblər. Burada dövlət-özəl tərəfdaşlığı çərçivəsində yerli investorlar tərəfindən müxtəlif təyinatlı binalar inşa edilib. Tikinti zamanı keyfiyyətlə yanaşı, binaların Şuşanın ənənəvi memarlıq üslubuna və ümumi görünüşünə uyğunluğuna xüsusi diqqət yetirilib.

Bu layihənin icrası mədəniyyət paytaxtımız olan tarixi Şuşanın hərtərəfli inkişafı istiqamətində atılan mühüm addımlardandır. Yeni binalar şəhərin simasına xüsusi yaraşıq verməklə yanaşı, aparılan genişmiqyaslı bərpa-quruculuq işlərinin əhatəsini nümayiş etdirir.

Türkiyənin NTV kanalından Ahmet Örsoğlu Şuşa ilə bağlı təəssüratlarını bölüşərək deyib: “Sizi Zəfər Günü münasibətilə təbrik edirəm. Şuşanın siması dəyişib, şəhər tamamilə yenidən qurulub. Köhnə binalar bərpa edilib, yeniləri tikilib və şəhər müasir görkəm alıb. Lakin onun keçmişinə məxsus gözəl elementlər də qorunub saxlanılıb. Burada çox yaxşı iş görülüb.

“Haber Global” kanalından Murat Karataş isə bildirib ki, o da 44 günlük Vətən müharibəsini işıqlandıran jurnalistlərdən olub: “Biz o zaman burada idik və demək olar ki, hər bir azərbaycanlı Şuşadan danışırdı. "Şuşa azad olunmalıdır, biz oraya getmək istəyirik. Biz o şəhəri görmək üçün darıxırıq”. Ona görə də Şuşanın necə bir şəhər olması bizdə də maraq oyatdı. Sonra araşdırma apardıq və bir çox şairin, incəsənət nümayəndələrinin şuşalı olduğunu öyrəndik. Buna görə də Şuşa bizim üçün də böyük məna və dəyər kəsb etməyə başladı”.

Müharibədə qazanılan şanlı Qələbədən sonra Şuşaya səfər etmək imkanı qazandığını söyləyən Murat Karataş əlavə edib ki, o vaxt şəhərdə ermənilər tərəfindən törədilmiş vandalizmin izlərinin şahidi olub. “Gördük ki, ermənilər bu şəhərə qayğı göstərməyiblər, hər yer xarabalığa çevrilmişdi. Çox pis görünürdü, binalar, yollar dağılmışdı, xüsusilə məscidlər. İndi buraya vaxtaşırı gəlirəm. Hər dəfə gələndə Şuşanın daha da inkişaf etdiyini görürəm. Həqiqətən də həsəd aparılmalı bir yerdir. Hər kəs burada, bu şəhərdə yaşamaq istəyər. Hava bu gün yağışlı və dumanlı olsa da, bunun da öz gözəlliyi var. Şuşanı çox sevirəm.

Səfər çərçivəsində türk media nümayəndələri Şuşada aparılan bərpa və yenidənqurma tədbirlərindən məmnunluqlarını ifadə edərək şəhərin tarixi ruhunun uğurla dirçəldildiyini vurğulayıblar.