Gəncə şəhər Şəhidlər xiyabanında 20 Yanvar faciəsində Azərbaycanın müstəqilliyi və suverenliyi uğrunda həlak olmuş şəhidlərin xatirəsinə həsr edilən anım mərasimi təşkil olunub.
AZƏRTAC-ın bölgə müxbiri xəbər verir ki, mərasimdə Gəncə Şəhər İcra Hakimiyyətinin başçısı Niyazi Bayramov, Gəncədə səfərdə olan Türkiyə Respublikasının Prezidenti Rəcəb Tayyib Ərdoğanın oğlu, iş adamı Nəcməddin Bilal Ərdoğan, Türkiyənin Gəncədəki baş konsulu Recep Öztop, Gürcüstanın Gəncədəki baş konsulu Kaxaber Abdaladze, YAP Gəncə şəhər təşkilatının sədri Bayram Aslanov, millət vəkili Pərvin Kərimzadə, Gəncə Şəhər Məhkəməsinin sədri Xaqani Tağıyev, Qafqaz Müsəlmanları İdarəsinin Qazılar Şurasının üzvü Hacı Tahir Abbasov, hüquq-mühafizə orqanlarının rəhbərləri, ali təhsil müəssisələrinin rektorları, Gəncə Şəhər İcra Hakimiyyəti başçısı Aparatının məsul əməkdaşları, bələdiyyə sədrləri, idarə, müəssisə və təşkilat rəhbərləri, ictimai birlik nümayəndələri, şəhid ailələri, müharibə iştirakçıları və şəhər sakinləri iştirak ediblər.
Anım mərasimi hərbi orkestrin ifasında Dövlət Himninin səsləndirilməsi ilə başlayıb.
Niyazi Bayramov “Əbədi məşəl” abidəsinin önünə əklil qoyub.
Daha sonra tədbirin aparıcısı 20 Yanvar faciəsi ilə bağlı məlumat verib. Mərasimdə Hacı Tahir Abbasov şəhidlərin ruhuna dualar oxuyub, Bilal Ərdoğana “Qurani-Kərim” kitabını hədiyyə edib.
Qeyd edək ki, bu gün saat 12:00-da Gəncə şəhərində şəhidlərin xatirəsi bir dəqiqəlik sükutla yad olunub.
Xatırladaq ki, 1990-cı il yanvarın 19-dan 20-nə keçən gecə sovet ordusunun hərbi birləşmələri tərəfindən Azərbaycanda törədilmiş qanlı faciədən 36 il keçməsinə baxmayaraq, xalqımız həmin hadisənin ağır nəticələrini bu gün də dərin hüznlə xatırlayır.
Həmin gecə Bakıda törədilən faciə zamanı yüzlərlə insan öldürülüb və yaralanıb, qanunsuz həbs olunublar. Həmçinin evlər, avtomaşınlar, o cümlədən təcili yardım maşınları, dövlət və şəxsi əmlak məhv edilib. Ümummilli Lider Heydər Əliyev faciəyə ilk siyasi və hüquqi qiymət verib. Ulu Öndər 1990-cı il yanvarın 21-də Moskvada Azərbaycanın daimi nümayəndəliyində çıxış edərək bu qanlı hadisəni hüquqa, demokratiyaya və humanizmə zidd olan ağır cinayət kimi qiymətləndirib. Ümummilli Lider Heydər Əliyevin təşəbbüsü ilə 1990-cı ilin noyabrında Naxçıvan Muxtar Respublikasının Ali Məclisində, 1994-cü il martın 29-da isə Azərbaycan Respublikası Milli Məclisi səviyyəsində 20 Yanvar faciəsinə dövlət səviyyəsində siyasi-hüquqi qiymət verilib.
Prezident, Müzəffər Ali Baş Komandan İlham Əliyevin rəhbərliyi ilə ərazi bütövlüyümüzün bərpası və suverenliyimizin tam təmin olunması 20 Yanvar şəhidlərinin də ruhunu şad edən tarixi hadisələrdir.
20 Yanvar faciəsi Azərbaycan xalqının iradəsini sındıra bilməyib, əksinə, azadlıq və müstəqillik əzmini daha da gücləndirib. Xalqımız şəhidlərini qalib, bütöv və suveren Azərbaycanın vətəndaşları kimi dərin ehtiramla yad edir.
jpg_1770645879.jpg)
jpeg_1770645280.jpeg)
