Sentyabrın 19–21-də Bakı növbəti dəfə dünya miqyaslı idman tədbirinə ev sahibliyi edəcək.
AZƏRTAC xəbər verir ki, Formula 1 üzrə Azərbaycan Qran-Prisi bu il də avtoidman həvəskarlarının diqqət mərkəzində olacaq.
Formula 1 təqvimindəki mərhələlər arasında Azərbaycan Qran-Prisi unikal xüsusiyyətləri ilə seçilir. Yüksək səviyyədə təşkilatçılıq bu mərhələni təqvimin seçilən yarışlardan birinə çevirir.
Niyə fanatlar Azərbaycan Qran-Prisini seçir?
Bakı şəhər trası Formula 1 üzrə dünya çempionatının azsaylı traslarından biridir ki, marşrutun bir hissəsi UNESCO-nun Ümumdünya İrsi Siyahısına daxil edilmiş İçərişəhərin yaxınlığından keçir. Digər tərəfdə isə müasir memarlıq nümunələri və Xəzər sahili yerləşir. Bu coğrafi və vizual özəllik Bakı trasını digərlərindən fərqləndirir.
Yarışın özü qədər – nəticəsi də gözlənilməzdir
Azərbaycan Qran-Prisi son illərdə nəticələrin öncədən proqnozlaşdırıla bilmədiyi mərhələlərdən biri kimi tanınır. Bu yarışda qaliblər tez-tez dəyişir ki, bu da onu azarkeşlər üçün daha maraqlı və cəlbedici edir.
Sürətin zirvəsi – şəhər trası olsa da, döngələrdə sürət 350 kilometr-saatdır
Bakı trası şəhər trasları arasında ən yüksək sürətə malikdir. Yarış zamanı bəzi döngələrdə avtomobillər 350 kilometr-saat sürət həddinə çatır. Hər döngə strategiyadır. Bir sözlə, hər saniyə nəticəni dəyişə bilər.
Yarışla bərabər festival atmosferi
Yarışla yanaşı, şəhər boyu təşkil olunan fan-zonalar, musiqi proqramları və ictimai tədbirlər Azərbaycan Qran-Prisini, eyni zamanda, əyləncə və mədəniyyət platformasına çevirir. Bu amil yarış həftəsini ölkə vətəndaşları və turistlər üçün daha cəlbedici edir.
Formula 1 vasitəsilə Azərbaycan qlobal media səhnəsində
Yarış dünyanın 180-dən çox ölkəsində canlı yayımlanır. Hər il milyonlarla tamaşaçı Bakının siması, turizm imkanları və müasir infrastrukturu ilə tanış olur. Bu sürət yarışı, həmçinin ölkənin beynəlxalq imicinin formalaşmasına mühüm töhfə verir.
Regionda liderlik: Cənubi Qafqazda yeganə Formula 1 mərhələsi
Azərbaycan Qran-Prisi təkcə ölkə üçün deyil, bütün region üçün strateji hadisədir. Bu, region ölkələri üçün də idman baxımından əhəmiyyətli hadisəyə çevrilib. Minlərlə azarkeş məhz bu yarış vasitəsilə Formula 1-i birbaşa izləmək imkanı əldə edir.
Ölkə brendinə çevrilmiş beynəlxalq tədbir
Formula 1 Azərbaycan Qran-Prisi təkcə idman yarışı deyil, həm də ölkənin brendinə çevrilmiş beynəlxalq idman və mədəniyyət platformasıdır. Bu tədbir həm turizm, həm iqtisadiyyat, həm də beynəlxalq əlaqələrin inkişafı baxımından önəm kəsb edir.
