Müharibə bitsə də, onun ağır fəsadları və acıları hələ də davam edir. Azərbaycan xalqı bu gün də müharibənin ağır nəticələri ilə üz-üzədir və mina təhlükəsi insanların həyat və sağlamlığı üçün ciddi təhdid olaraq qalır.
Bu fikirləri Milli Məclisin deputatı Ceyhun Məmmədov AZƏRTAC-a açıqlamasında bildirib.
Onun sözlərinə görə, müharibənin başa çatmasından sonra Azərbaycanda 400-dən artıq insan mina qurbanına çevrilib. Bu isə Azərbaycan vətəndaşlarının həyatını ciddi təhlükə altında qoyan və narahatlıq doğuran mühüm məsələlərdəndir.
“Müharibənin nəticələrinin aradan qaldırılması istiqamətində mühüm işlər görülsə də, mina təhlükəsi bu proses qarşısında ciddi problemlər yaradır. Məsələnin əsas ağır tərəflərindən biri Ermənistanın bu günədək Azərbaycana mina xəritələrini təqdim etməməsidir. Bu isə Azərbaycanda mina təhlükəsinin aradan qaldırılması prosesində əlavə problemlər yaradır. 400-dən artıq insanın mina qurbanı olması kifayət qədər böyük bir rəqəmdir və ciddi narahatlıq üçün əsas yaradan məsələdir. Təəssüf ki, Ermənistan bu məsələdə də öz üzərinə düşən addımları atmır və biz bu ağrı-acını yaşamağa davam edirik”, - deyə deputat bildirib.
O qeyd edib ki, Ermənistan mina xəritələrini Azərbaycana təqdim etsəydi, hazırda tamamilə fərqli vəziyyətin şahidi olmaq mümkün idi. Lakin xəritələrin təqdim olunmaması müharibənin nəticələrinin tam şəkildə aradan qaldırılmasını çətinləşdirir.
C.Məmmədov hesab edir ki, bu məsələdə beynəlxalq qurumların üzərinə də böyük məsuliyyət düşür: “Beynəlxalq qurumlar birmənalı şəkildə Ermənistandan mina xəritələrini Azərbaycana təqdim etməyi tələb etməlidirlər. Ermənistana qarşı bu istiqamətdə əsaslı addımlar atılmalı, mina xəritələrinin Azərbaycana təqdim edilməsi təmin olunmalıdır. Bu xəritələr bizim üçün strateji əhəmiyyət daşıyır. Burada iki əsas istiqamətə diqqət yetirmək lazımdır. Birincisi, Ermənistana təzyiqin artırılması, ikinci isə beynəlxalq əməkdaşlığın gücləndirilməsidir. Məqsəd mina probleminə beynəlxalq diqqətin daha da artırılması və bu məsələnin dünya birliyinin gündəmində saxlanılmasıdır”.
Deputat, eyni zamanda, davamlı maarifləndirmə və məlumatlandırma işlərinin aparılmasının vacibliyinə toxunub. O bildirib ki, əhalinin mina təhlükəsi barədə məlumatlandırılması, insanların zəruri təhlükəsizlik qaydaları ilə bağlı maarifləndirilməsi mühüm əhəmiyyət daşıyır. Bu istiqamətdə həm insanların təhlükəsizliyinin təmin olunması, həm də dünya birliyinin mina probleminə diqqətinin artırılması üçün ardıcıl və məqsədyönlü iş aparılmalıdır.
jpg_1790429423jpg_1790674709jpg_1792149847jpg_1792231597.jpg)
