Ölkədəki ictimai-siyasi vəziyyət yenidən mürəkkəbləşməyə doğru gedir
Ermənistanda keçmiş hərbi xunta təmsilçilərinin təşkilatçılığı ilə baş nazir Nikol Paşinyanın əleyhinə etiraz aksiyalarına yenidən start verilib. Əsas məqsəd iqtidara qarşı müqavimət və itaətsizlik təşkil etmək, bununla xaotik durumun yaradılmasına nail olmaq, güc yolu ilə olsa belə hakimiyyəti qəsb etməkdir. Burada əsas məqam da bu yürüşə yenə də erməni keşişin başçılıq etməsidir.
Nikol Paşinyan hakimiyyətdə qalmağa çalışdığı bir vaxtda keşiş Baqrat Qalstanyanın yenidən əsas fiqur kimi ortada görünməsi mitinqlərin məntiqi sonluğunun heç də revanşistlərin arzuladığı kimi olacağı ümidlərini doğrultmur.
O, yalnız dini lider kimi deyil, həm də getdikcə müxalifət düşərgəsində daha nüfuzlu siyasi oyunçu kimi tanınır. Bu fonda Qalstanyan özünü Ermənistanın gələcək lideri kimi görür və Paşinyanı baş nazir postunda əvəz etməyi hədəfləyir. Onun ritorikası "ənənəvi erməni dəyərlərinin" bərpasına və Ermənistanın hərbi güc kimi yenidən dirçəlməsinə yönəlib.
Bu arada yenidən etirazlara başlayan Qalstanyan və tərəfdarları Ermənistanın İctimai Televiziyasına tərəf üz tutmağa başlayıblar. Hərəkat üzvləri onlara efir vaxtının verilməsini tələb edirlər. Qeyd ediblər ki, bu onların ilk tələbidir: "Bundan sonra hansı addımları atacağımıza qərar verəcəyik. Bizi qarşıda çətin hadisələr gözləyir. Ölkədə hakimiyyət dəyişikliyi əsas məqsəd deyil. Əsas odur ki, təkcə emosiyalara deyil, həm də ağıla əsaslanan milli birlik yaradaq".
Erməni keşiş Baqrat Qalstanyan deyib ki, "Müqəddəs mübarizə" hərəkatı küçədə bir nəfər qalana qədər davam edəcək: "Mən fiziki olaraq küçədəyəm. Amma onlar (hakimiyyət - red) küçədə doğulublar və ruhən orada qalıblar".
Keşiş Baqrat açıq şəkildə xalqı N.Paşinyanın devrilməsinə çağırır, onu Qarabağı və sərhədyanı əraziləri təslim etməkdə ittiham edir. Onun müraciətlərində konstitusiya quruluşunun bərpasına və "şər hakimiyyətinə" qarşı mübarizəyə çağırışlar aydın görünür.
V.Qalstanyanın mitinqlərdəki çıxışları da Ermənistanın siyasi həyatında diqqətçəkən hadisələrə çevrilib. O, "müqəddəs mübarizədə" qələbə vəd edir və tərəfdarlarını etiraz aksiyalarına toplayır. İlin əvvəlində mitinqlərə 30 min adam toplaşırdısa, oktyabrın 2-də Respublika meydanında cəmi 2 minə yaxın adam var idi. Bu "Məlumatlı Vətəndaşlar Birliyi" tərəfindən aparılan aeroçəkilişlə təsdiqlənib. Bu fakt Qalstanyanın ictimai dəstəyinin, onun gurultulu bəyanatlarına baxmayaraq, zəifləməyə başladığını göstərir.
Görünən odur ki, Hayastanda daxili siyasi vəziyyət tədricən mürəkkəbləşməyə doğru gedir. Bununla da ölkə sonu görünməyən daxili siyasi böhrana qədəm qoyacaq.
Elçin CƏFƏROV,
"Azərbaycan"
