Prezident İlham Əliyev dünyada Azərbaycanın ərazi bütövlüyünü bərpa edən və milli maraqlarını qətiyyətlə qoruyan güclü lider kimi qəbul olunur. Bu, dövlətimizin başçısının qüdrətli siyasətçi kimi beynəlxalq imicini formalaşdırıb. Prezident İlham Əliyevin siyasəti daxili sabitliyə, ölkənin inkişafına və Azərbaycanın mühüm regional aktor kimi tanınmasına yönəlib. Dövlətimizin başçısının qətiyyət, iradə, prinsipiallıq, alicənablıq kimi keyfiyyətləri bu strateji məqsədlərə çatmaq üçün əsas olub.
Burada alman dövlət xadimi Otto fon Bismarkın bir fikrini qeyd etmək istərdim. O deyirdi: "Bir millətin taleyi onun liderinin xarakteri ilə müəyyən edilir". Azərbaycan üçün bu tezis mücərrəd deyil, praktikdir. Mürəkkəb regional və qlobal mühitdə dövlətimizə siyasətin davamlılığını, daxili sabitliyi və milli maraqların ardıcıl qorunmasını təmin etməyi bacaran bir lider - Prezident İlham Əliyev rəhbərlik edir.
Dövlət strategiyasını müəyyən edən bütün bu göstəricilərin beynəlxalq səviyyədə yüksək qiymətləndirilməsi sevindirici haldır. Bunun bariz nümunəsi Birləşmiş Ərəb Əmirliklərinin (BƏƏ) nüfuzlu Şeyx Zayed Fondu tərəfindən 2026-cı il "İnsan Qardaşlığı üzrə Zayed Mükafatı"nın Azərbaycan Prezidentinə verilməsidir. Xüsusilə diqqətəlayiqdir ki, fondun rəsmi saytında yerləşdirilən məlumatda bu mükafatın Qafqazda onilliklər boyu davam edən münaqişələrə və humanitar əzablara son qoyan "Azərbaycan Respublikası ilə Ermənistan Respublikası arasında Sülhün Qurulması və Dövlətlərarası Münasibətlər haqqında Saziş"in paraflanmasına görə verildiyi vurğulanır. "İnsan Qardaşlığı üzrə Zayed Mükafatı" münsiflər heyətinin üzvü və mükafatın baş katibi Məhəmməd Əbdülsəlamın vurğuladığı kimi, "Bu il İnsan Qardaşlığı üzrə Zayed Mükafatı Komitəsi Ermənistan və Azərbaycan arasında tarixi sülh müqaviləsini seçdi. Bu müqavilə mükafatın dialoq və birgəyaşayış mədəniyyətinin təşviqi və inkişaf etdirilməsi missiyasını və məqsədlərini təcəssüm etdirir. Bu, qlobal sülhün inkişafında mühüm mərhələ və böyük diplomatik nailiyyət hesab olunur". Bu qiymətləndirməyə yalnız əlavə etmək olar ki, bu nüfuzlu mükafat təkcə Prezident İlham Əliyevin şəxsi liderlik keyfiyyətlərini əks etdirmir, həm də münaqişədən sonrakı dövrdə Azərbaycan dövləti tərəfindən hazırlanmış sülh gündəliyinin qlobal miqyasda tanındığını nümayiş etdirir.
2020-ci ilin payızında Vətən müharibəsində qalib gələn və 2023-cü ilin sentyabrında birgünlük antiterror əməliyyatını uğurla həyata keçirən Azərbaycan ərazi bütövlüyünü və suverenliyini tam şəkildə bərpa etdi və dünyaya ərazi mübahisələrinin beynəlxalq hüququn norma və prinsipləri əsasında həll edilə biləcəyini göstərdi. Bütün bunlar Azərbaycan dövlətinin həm əməkdaşlıq mühitinin yaradılması üçün ilkin şərtlərin yaradıldığı Cənubi Qafqaz regionunda, həm də qlobal miqyasda mövqeyini gücləndirdi.
Sonrakı dövrdə rəsmi Bakı sülh və təhlükəsizliyə yönəlmiş gündəliyini məqsədyönlü şəkildə irəli sürdü. Bu yolda Cənubi Qafqazda yeni gərginlik ocağı yaratmağa çalışan Ermənistandakı revanşist qüvvələr müqavimət göstərməyə çalışsalar da, niyyətlərinə çata bilmədilər. Prezident İlham Əliyev bu prosesdə Azərbaycanın maraqlarını qətiyyətlə təmin etdi.
Prezident İlham Əliyev bəyan etdiyi mövqelərdən bir an və ya bir addım da olsun yayınmadan beynəlxalq səviyyədə Bakının sülh gündəliyinin fundamental prinsiplərini ardıcıl olaraq təmin etdi. Bu, 8 avqust 2025-ci ildə "Azərbaycan Respublikası ilə Ermənistan Respublikası arasında sülhün qurulması və dövlətlərarası münasibətlər haqqında Saziş" layihəsinin paraflanması ilə nəticələndi.
Bu hadisə Azərbaycanın qlobal səhnədə qalib ölkə kimi statusunu bir daha təsdiqlədi. Prezident İlham Əliyevin qətiyyəti sayəsində Cənubi Qafqaz və bəlkə də daha geniş region üçün mövcudluq təhlükəsi yaradan münaqişə tarixin arxivinə göndərildi.
Prezident İlham Əliyevin təşəbbüsləri regionda sülhün və sabitliyin təmin edilməsinə yönəlmişdir və dövlətimizin başçısı bunu real addımlarla nümayiş etdirir. Onun Azərbaycanın ərazi bütövlüyünün və suverenliyinin bərpasındakı rolu qlobal səhnədəki mürəkkəb problemlərin uğurla həll edilməsinin nümunəsi kimi vurğulanır.
Bu gün Azərbaycanda sabitlik hökm sürür. Bu, onun milli liderinin böyük şəxsiyyət olduğunu göstərir. Liderin siyasi iradəsi və qətiyyəti həm inkişaf vektorlarını, həm də daxili sabitliyi, eləcə də ölkənin beynəlxalq arenadakı qələbələrini müəyyən edir. Prezident İlham Əliyevə nüfuzlu Şeyx Zayed Fondu tərəfindən "Zayed İnsan Qardaşlığı Mükafatı"nın verilməsi Azərbaycana bütün beynəlxalq ictimaiyyət tərəfindən hörmət edilən bir lider tərəfindən rəhbərlik edildiyini bir daha təsdiqləyir.
Ümummilli Liderimiz Heydər Əliyev deyib: "Biz nazik sapın üstü ilə gedirik. Odur ki, biz gərək bu siyasəti o qədər ağılla, o qədər məharətlə aparaq ki, Azərbaycanın milli mənafeləri müdafiə olunsun, ərazi bütövlüyümüz təmin edilsin, Azərbaycan müharibə şəraitindən çıxa bilsin". Ulu Öndərin özü qədər inandığı Prezident İlham Əliyev 2003-cü ildən başlayaraq, bu tarixi missiyanı yüksək vətəndaşlıq mövqeyi və vətənpərvərlik hissi ilə uğurla həyata keçirdi. Hər kəs Prezident İlham Əliyevin ikili standartlara, ədalətsizliyə, bərabərsizliyə qarşı apardığı mübarizəni və onun real nəticələrini təsdiq edir.
Hicran HÜSEYNOVA,
Milli Məclisin komitə sədri, professor
