FIFA 2026-cı il dünya çempionatı üçün bilet satışlarında rekord səviyyədə müraciətlə üzləşib. Oyunların rəsmi cədvəli açıqlanmadan əvvəl, ötən ilin oktyabr və noyabr aylarında artıq 2 milyon bilet satılıb. Turnir üzrə ümumilikdə 4–5 milyon biletin hələ də satışda olduğu bildirilir.
AZƏRTAC xəbər verir ki, FIFA-nın açıqlamasına görə, son müraciət mərhələsində biletlər üçün 500 milyondan çox sifariş daxil olub. Bu isə dünya çempionatına marağın mövcud bilet sayından xeyli çox olduğunu göstərir.
Ən çox maraq göstərilən görüşlər Kolumbiya – Portuqaliya, Meksika – Koreya, dünya çempionatının final görüşü və Meksika – Cənubi Afrika açılış matçı olub. Həmçinin iyulun 2-də Torontoda keçiriləcək 1/32 final oyunu da azarkeşlərin böyük marağına səbəb olub.
Mütəxəssislər həlledici mərhələlərin matçlarına, eləcə də Meksika, Argentina, Kolumbiya və Portuqaliya kimi komandaların oyunlarına yüksək tələbatı normal hesab edir. Bununla belə, daha az tanınan komandaların qarşılaşmalarına bu qədər yüksək qiymətlərlə marağın necə olacağı sual altındadır.
FIFA artan tələbatı bilet qiymətlərinin yüksək olmasını əsaslandırmaq üçün arqument kimi göstərir. Lakin bir çox azarkeş qiymətləri həddindən artıq baha hesab edir. Bildirilir ki, bilet qiymətləri əvvəlki dünya çempionatları ilə müqayisədə xeyli artıb və bu səbəbdən bəzi azarkeşlər oyunları stadiondan deyil, evdən izləməyə üstünlük verirlər.
Buna baxmayaraq, ilkin satış mərhələsində FIFA-ya ayrılmış biletlər qısa müddətdə tükənib. Qiymətlər artırılsa da, biletlər yenidən satış platformalarında daha baha məbləğə təklif olunur.
DÇ-2026 iyunun 11-də Meksika şəhərində start götürəcək və iyulun 19-da ABŞ-ın Nyu-Cersi ştatında başa çatacaq. Turnirin oyunları ABŞ, Kanada və Meksikanın 16 şəhərində keçiriləcək.
