Sentyabrın 16-da Türkiyənin İğdır vilayətində “Zəfərin ruhunda birləşənlər” adlı görüş keçirilib. Tədbirdə Türkiyə və Azərbaycandan olan şəhidlərin ailə üzvləri, yaxınları, eləcə də bir qrup qazi iştirak edib.
AZƏRTAC xəbər verir ki, görüşün təşkilinə İğdır-Azərbaycan Dil, Tarix və Mədəniyyət Həmrəyliyini Yaşatma və Dəstəkləmə Dərnəyi, İğdır Azərbaycan Evi, Türkiyə Müharibə Əlilləri, Qaziləri və Şəhidləri Cəmiyyəti, həmçinin “Naxçıvan Şəhid Ailələri” İctimai Birliyi dəstək göstərib. Tədbir İğdır Mədəniyyət və Turizm İdarəsinin binasında baş tutub.
Proqram çərçivəsində Azərbaycanın işğaldan azad olunmuş torpaqları uğrunda mübarizədən bəhs edən film nümayiş etdirilib, şəhidlərin xatirəsinə dualar oxunub.
Türkiyənin Naxçıvan Muxtar Respublikasındakı baş konsulu Asip Kaya çıxış edərək Türkiyə və Azərbaycan xalqlarının müstəqillik və bütövlük uğrunda mübarizəsindən, iki qardaş ölkə arasındakı qardaşlıq və dəstək münasibətlərindən danışıb.
Azərbaycanın Qarsdakı baş konsulu Zamin Əliyev isə 44 günlük Vətən müharibəsində Azərbaycanın qazandığı tarixi Qələbənin əhəmiyyətini vurğulayıb. O qeyd edib ki, “44 günlük müharibə və 2023-cü il antiterror tədbirləri iştirakçılarının qəhrəmanlığı Azərbaycan dövlətinin tarixinə qızıl hərflərlə yazılıb”. Diplomatın sözlərinə görə, işğaldan azad olunmuş torpaqlar Türk dünyasının tarixində dönüş nöqtəsinə çevrilib və türk dövlətlərinin birliyinin möhkəmlənməsinə mühüm təkan verib. “Azərbaycan xalqı bütün dünyaya nümayiş etdirdi ki, birlik və haqq-ədalət uğrunda mübarizəyə heç bir qüvvə müqavimət göstərə bilməz”, - deyə o əlavə edib. Baş konsul, həmçinin vurğulayıb ki, Vətən müharibəsində qazanılan Qələbə Bakı ilə Ankara arasında əməkdaşlığın daha da dərinləşməsinə zəmin yaradıb.
Tədbir çərçivəsində Azərbaycan və Türkiyədən olan şəhid ailələrinin üzvləri, eləcə də qazilər İğdırın simvollarından biri olan muzeyi və 1915–2015-ci illərdə Şərqi Anadoluda erməni silahlı dəstələrinin cinayətlərinin qurbanı olmuş dinc sakinlərin xatirəsinə ucaldılmış beş qılınc formasındakı abidəni ziyarət ediblər.
Sonda İğdır Sosial Elmlər Liseyinin həyətində Azərbaycan və Türkiyə qəhrəmanlarının xatirəsinə ağac tingləri əkilib.
jpg_1775472819.jpg)
