Azərbaycan-İƏT tərəfdaşlığı strateji xarakter daşıyır 

Ölkəmiz İslam həmrəyliyinin və mədəniyyətlərarası dialoqun möhkəmlənməsinə misilsiz töhfələr verir  

    Azərbaycan İslam dünyası ilə əlaqələrin qurulması və inkişaf etdirilməsini xarici siyasətinin prioritet istiqamətlərindən biri kimi müəyyənləşdirib. Ölkəmiz İslam dininin mənəvi dəyərlərinə sarsılmaz sadiqlik nümayiş etdirməklə yanaşı, həm də dünyəvi inkişaf modelini uğurla qoruyub saxlayan modern və nümunəvi bir dövlət kimi tanınır. Ölkəmiz müasir dövrdə İslam dünyasının birliyini, həmrəyliyini və sivilizasiyalararası dialoqu fəal şəkildə dəstəkləyən, mədəni-dini irsin qorunmasına və gələcək nəsillərə ötürülməsinə böyük töhfələr verən həlledici mərkəzlərdən birinə çevrilib. 

    Oktyabrın 26-da Azərbaycan Prezidenti İlham Əliyev İslam Əməkdaşlıq Təşkilatının (İƏT) Baş katibi İsmayıl Ould Şeyx Əhmədi qəbul edib. Dövlətimizin başçısı İƏT-in Baş katibinin bu vəzifəyə seçildikdən sonra Azərbaycana səfərə gəlməsinin böyük əhəmiyyət kəsb etdiyini, bunun ölkəmizlə təşkilat arasında mövcud olan güclü tərəfdaşlığın bariz nümunəsi olduğunu diqqətə çatdırıb. Prezident İlham Əliyev Azərbaycanın həmişə İslam Əməkdaşlıq Təşkilatının fəal üzvü olduğunu deyərək, bunun gələcəkdə də davam edəcəyini vurğulayıb. Təşkilat çərçivəsində ölkəmizdə bir çox siyasi, iqtisadi, idman tədbirlərinin təşkil olunduğunu xatırladan Prezident İlham Əliyev gələn il Azərbaycanın İslam Əməkdaşlıq Təşkilatının Zirvə görüşünə evsahibliyi edəcəyini deyib və bu tədbirə fəal hazırlıq işlərinin getdiyini bildirib. 

     Qeyd olunub ki, Azərbaycan həm İslam dünyasında, həm də İƏT daxilində islam həmrəyliyinin gücləndirilməsi prosesində aparıcı rol oynayır. Bu çərçivədə, islam dünyasına və Azərbaycana qarşı yönələn dezinformasiyalara qarşı üzv ölkələrin birgə və koordinasiyalı fəaliyyət göstərməsinin vacibliyi xüsusi vurğulanıb. Keçirilən görüş və səslənən fikirlər Azərbaycanın İslam dünyasındakı mərkəzi rolunun, habelə dövlətimizin qlobal miqyasda həyata keçirdiyi islam həmrəyliyi siyasətinin növbəti təzahürü kimi dəyərləndirilir. 

     Azərbaycanın təşkilatla münasibətlərinin tarixi köklərinə nəzər salsaq görərik ki, İƏT ölkəmizin müstəqilliyini bərpa etdikdən sonra qoşulduğu ilk beynəlxalq təşkilatlardan biridir və bu il Azərbaycanın İƏT-ə üzv olmasından 35 il ötür. Ölkəmiz ötən dövr ərzində təşkilatın fəal üzvü kimi çoxsaylı siyasi, iqtisadi və idman tədbirlərinə evsahibliyi edib. Prezident İlham Əliyevin müvafiq sərəncamı ilə 2017-ci il Azərbaycanda “İslam Həmrəyliyi İli” elan olunub. Həmin ilin mayında ölkəmizdə IV İslam Həmrəyliyi Oyunları yüksək səviyyədə təşkil edilib. Bununla yanaşı, Prezident İlham Əliyevin təşəbbüsü olan Ümumdünya Mədəniyyətlərarası Dialoq Forumu İƏT tərəfindən fəal şəkildə dəstəklənir. Azərbaycanın BMT Təhlükəsizlik Şurasına sədrliyi dövründə, 28 oktyabr 2013-cü il tarixində BMT tarixində ilk dəfə olaraq ölkəmizin təşəbbüsü ilə “Birləşmiş Millətlər Təşkilatı və İslam Əməkdaşlıq Təşkilatı arasında tərəfdaşlıq əlaqələrinin gücləndirilməsi” mövzusunda yüksək səviyyəli iclas keçirilib.

      Ermənistanın Azərbaycana qarşı 30 ilə yaxın davam edən işğalçılıq siyasəti zamanı və postmüharibə dövründə İƏT hər zaman qətiyyətli və ədalətli mövqe nümayiş etdirərək işğalı şiddətlə qınayıb. Azərbaycanın haqq işini, suverenliyini və ərazi bütövlüyünü dəstəkləyən çoxsaylı qətnamə və bəyanatlar qəbul edib. Ərazilərimiz işğaldan azad olunduqdan sonra İƏT bu torpaqlarda aparılan bərpa və quruculuq işlərini alqışlayan sənədlər qəbul edib. 2021-ci və 2023-cü illərin sentyabr aylarında İƏT Müstəqil Daimi İnsan Hüquqları Komissiyasının nümayəndə heyəti işğaldan azad edilmiş Ağdam və Füzuli rayonlarında, habelə Gəncə şəhərində faktaraşdırıcı missiyalar həyata keçirərək, Ermənistan tərəfindən dini-mədəni abidələrin, azərbaycanlılara məxsus qəbiristanlıqların dağıdılması, raket hücumları nəticəsində vurulan zərərlə bağlı yerində araşdırmalar aparıb. 

     Azərbaycan həm ölkə daxilində, xüsusilə işğaldan azad edilmiş torpaqlarımızda dağıdılmış məscid və ziyarətgahların bərpasını həyata keçirir, həm də Heydər Əliyev Fondunun xətti ilə xarici ölkələrdə İslam mədəniyyət abidələrinin təmiri və qorunması missiyasını uğurla icra edir. Eyni zamanda, ölkəmiz islamofobiya ilə mübarizə mövzusunun beynəlxalq gündəmdə təşviqinə böyük töhfələr verir və 2023-cü ildən etibarən Prezidentin himayəsi altında Bakıda bu mövzuya həsr olunmuş beynəlxalq konfranslar təşkil olunur. 

     Təşkilatın institutlaşması sahəsində də ciddi addımlar atılıb. Ölkəmizin təşəbbüsü ilə 2004-cü ildə İslam Əməkdaşlığı Gənclər Forumu və onun Avrasiya Regional Mərkəzi yaradılıb, 2023-cü ildə isə Bakıda İƏT Əmək Mərkəzi təsis edilib. Azərbaycan ilə İƏT arasında tərəfdaşlıq getdikcə daha dinamik xarakter alır. Şuşa şəhərinin İƏT-in 2026-cı il üzrə turizm paytaxtı seçilməsi, 2026-cı ilin iyununda Bakıda İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci Sessiyasının keçirilməsi bunun bariz nümunələridir. 

     Qarşıdakı illərdə də bu əməkdaşlıq yüksələn xətlə davam edəcək. 2027-ci il iyunun 1-2-də Azərbaycanda İƏT İnformasiya Nazirləri Konfransının 13-cü sessiyasının təşkili, həmin ilin iyunun 23-24-də isə ölkəmizin İslam Zirvə Konfransının 16-cı Sessiyasına evsahibliyi edərək İƏT-də sədrliyi öz üzərinə götürməsi nəzərdə tutulur.

     Azərbaycan bundan sonra da islam həmrəyliyinin möhkəmləndirilməsinə, dinlər və mədəniyyətlər arasında qarşılıqlı anlaşmaya, eləcə də regional və qlobal təhlükəsizliyə, sabitliyə töhfə vermək üçün öz fəal səylərini əsirgəməyəcək. Ölkəmizin İƏT ilə qurulmuş sarsılmaz tərəfdaşlığı və qarşıda duran möhtəşəm planlar Azərbaycanın İslam dünyasındakı liderlik mövqeyini daha da möhkəmləndirəcək. 

İsmayıl QOCAYEV, 

“Azərbaycan”