2050-ci ilədək qlobal miqyasda məlumat mərkəzlərinə investisiyaların ümumilikdə 31,6 trilyon dollara çatacağı gözlənilir.
AZƏRTAC xəbər verir ki, bu barədə “PwC” şirkətinin hesabatında deyilir.
Bildirilir ki, buna səbəb süni intellektə sürətlə artan tələbatdır. Lazımi, etibarlı və əlverişli elektrik enerjisinə çıxışın investisiyaların istiqamətində müəyyənedici amil olacağı proqnozlaşdırılır. Belə ki, cari ildə məlumat mərkəzi binaları, serverlər, saxlama, şəbəkə və qabaqcıl emal avadanlıqları da daxil olmaqla yatırılan investisiyaların təxminən 800 milyard dollar olması, 2030-cu ildə illik 1,1 trilyon dollara, 2050-ci ildə isə illik 1,8 trilyon dollara yüksəlməsi gözlənilir. Beləliklə, investisiyalar 2026-2050-ci illər arasında ümumilikdə 31,6 trilyon dollara çata bilər.
Qeyd olunub ki, süni intellektə tələbat mövcud elektrik şəbəkələrinə təzyiqi artırır və planlaşdırılan investisiyaların reallaşdırılması getdikcə məlumat mərkəzlərinə elektrik enerjisinin nə qədər tez və etibarlı şəkildə çatdırıla biləcəyindən asılı olacaq.
“PwC” məlumat mərkəzi investisiyalarının hansı ölkələrdə və bölgələrdə həyata keçiriləcəyini müəyyən edən əsas amil kimi elektrik enerjisini görür. Hesabata görə, genişmiqyaslı məlumat mərkəzləri üçün qənaətcil, etibarlı və aşağı karbonlu elektrik enerjisinin təmin edilməsi bir çox bazarlar üçün ən çətin şərtlərdən birinə çevrilir. Xüsusilə, ötürmə gücü, yarımstansiyalara çıxış və transformatorların təchizat müddəti yeni layihələrin harada və nə vaxt istifadəyə veriləcəyini müəyyən edən maneələr arasındadır. Buna görə də, ölkələr üçün yalnız yeni elektrik enerjisi istehsal gücü yaratmaq deyil, həm də istehsal olunan elektrik enerjisini məlumat mərkəzlərinin yerləşdiyi ərazilərə eyni sürətlə nəql edə bilən şəbəkə infrastrukturunu inkişaf etdirmək getdikcə daha vacib hala gəlir.
Bildirilir ki, bəzi məlumat mərkəzi operatorları obyektlərinin yerləşdiyi ərazilərdə öz elektrik enerjisi istehsal güclərini inkişaf etdirməyə başlayıb. Bu da yalnız fərdi layihələrin ehtiyaclarını ödəməyə kömək edə bilər. Lakin sektorda genişmiqyaslı artım üçün zəruri olan şəbəkə investisiyalarını əvəz edə bilməz. Ənənəvi bulud infrastrukturu mərkəzi emal vahidlərindən çox asılı olsa da, süni intellekt iş yüklərində istifadə olunan qrafik emal vahidləri və sürətləndiricilər daha çox enerji istehlak edir və daha sürətli texnoloji yenilənmə dövrünə malikdir. Serverlər və qrafik emal vahidləri adətən hər 4-6 ildən bir dəyişdirilməlidir.
“PwC”nin hesablamalarına görə, məlumat mərkəzinə qoyulan ümumi investisiyalarda informasiya və kommunikasiya texnologiyaları avadanlıqlarının payının bu il 70 faizdən 2050-ci ildə 93 faizə yüksələcəyi gözlənilir. Məlumat mərkəzinin tikintisinə qoyulan hər 1 dollar gələcəkdə təxminən 12 dollar dəyərində informasiya və kommunikasiya texnologiyaları avadanlığına investisiya ehtiyacına səbəb ola bilər.
