Neftçalada pambıqçılıqla bağlı geniş müşavirə keçirilib
Neftçalada rayon icra hakimiyyətinin təşəbbüsü ilə Dövlət Aqrar İnkişaf Mərkəzinin, Statistika İdarəsinin, Su Meliorasiya Sistemləri İstismarı İdarəsi rəhbərlərinin, inzibati ərazi dairəsi üzrə nümayəndələrin, bələdiyyə sədrlərinin, xam pambıq tədarük edən şirkətlərin yerli nümayəndələrinin, pambıqçı fermerlərin, Sudan İstifadəedənlər birliklərinin sədrlərinin iştirakı ilə "Pambıqçılıqda mövcud vəziyyət və qarşıda duran vəzifələr" mövzusunda növbəti seminar-müşavirə keçirilib.
Seminar-müşavirə "Elektron kənd təsərrüfatı informasiya sistemi haqqında Əsasnamə"nin təsdiq edilməsi barədə Azərbaycan Respublikası Prezidentinin 23 dekabr 2019-cu il tarixli fərmanına əsasən, "kənd təsərrüfatı subyektlərinin qeydiyyatı" altsistemi vasitəsilə fermerlərin, kənd təsərrüfatı sahəsində fəaliyyət göstərən subyektlərin qeydiyyatının aparılması, onların fəaliyyəti üzrə tələb olunan məlumatların və sənədlərin daxil edilməsi, torpaq sahələrinin xəritələşdirilməsinin təmin edilməsi ilə bağlı pambıqçı fermerlərin və pambıq tədarük edən şirkətlərin yerli nümayəndələrinin məlumatlandırılması üçün təşkil olunmuşdur.
Rayon icra hakimiyyəti başçısının müavini - Sosial-iqtisadi inkişafın təhlili və proqnozlaşdırılması şöbəsinin müdiri Burcalı Ağayev tədbiri giriş sözü ilə açaraq ölkəmizdə qeyri-neft sektorunun, o cümlədən kənd təsərrüfatının strateji sahələrindən hesab olunan pambıqçılığın inkişafı ilə bağlı Prezident İlham Əliyevin qəbul etdiyi qərarlar, verdiyi tapşırıq və tövsiyələr sayəsində ölkəmizdə pambıqçılığın sürətli inkişafına qısa müddətdə əlverişli şərait yaradıldığını, sahibkarlığa dövlət dəstəyinin gücləndirilməsini, pambıqçılığın inkişafı ilə bağlı aparılan siyasətin bütün regionlarda olduğu kimi, Neftçala rayonunda da öz bəhrəsini verdiyini qeyd edərək bir sıra məqamları diqqətə çatdırmışdır.
Seminar-müşavirədə Elektron Kənd Təsərrüfatı İnformasiya Sistemi (EKTİS) üzərindən pambıq əkininin bəyan edilməsi ilə yanaşı, torpaq sahəsinin xəritələrinin çəkilməsinin təmin olunması, su ehtiyatlarından səmərəli istifadə edilməklə pambıq sahələrinə vegetasiya suyunun vaxtında verilməsi, rayonun su limitini nəzərə alaraq taxıl biçinindən sonra pambıq əkininin aparılması, fərdi qaydada pambıq əkini aparan fermerlərin maarifləndirilməsi, xam pambıq tədarük edən şirkətlərin fermerlərlə bağlanmış pambıq müqavilələrinin şərtlərinə əməl olunması, sudan istifadə ilə bağlı müqavilə əsasında pambığın vegetasiya suyunun növbəlilik prinsipinə əsasən təmin edilməsi mövzusunda geniş müzakirələr aparılmış, müvafiq təlimatlar, tövsiyələr verilmişdir.
Neftçala Dövlət Aqrar İnkişaf Mərkəzinin direktor vəzifəsini müvəqqəti icra edən - direktor müavini Elsevər Əsədov çıxış edərək pambıq əkini həyata keçirən fermerlərin bəyan zamanı xəritələrin çəkilməsi zərurəti, habelə bu istiqamətdə atılmış addımlar, xəritələrin çəkilməsi proseduru, bu zaman yarana biləcək texniki və ya digər çətinliklər, xəritələrin çəkilmədiyi halda məhsul subsidiyasının verilməsində yarana biləcək problemlər barədə pambıqçı fermerləri ətraflı məlumatlandırmışdır.
Neftçala Su Meliorasiya Sistemləri İstismar İdarəsinin müdiri Təbriz Eyyubov isə 2025-ci ildə rayon ərazisində xam pambıq tədarükü edən şirkətlər - "Prime Cotton", "P-Aqro", "Azərpambıq ASK", "Aztəsərrüfat" MMC ilə bağlanmış müqavilələr əsasında 1415 fermerin becərdiyi 7 min 116 hektar pambıq əkininin suvarma suyu ilə təmin olunmasından, fərdi qaydada becərilən pambıq sahələrinin su ilə təmin edilməsindən, o cümlədən suvarma dövründə görülən işlərdən geniş söhbət açaraq bir sıra məsələləri diqqətə çatdırmışdır.
Həmin şirkətlər adından çıxış edən "P-Aqro" MMC Neftçala rayon bölməsinin müdiri Mustafa Əliyev 2025-2026-cı ilin məhsulu üçün rayon ərazisində 335 nəfər fermerlə 1300 hektar sahədə pambıq əkini ilə əlaqədar müqavilə bağlandığını, bəyan olunmuş 1300 hektar torpaq sahəsində şirkət tərəfindən naturada torpaq sahələrinin xəritələrinin çəkilərək başa çatdırılmasını, vegetasiya suyunun verilməsində çətinliklərin olmamasını, fermerlərlə bağlanmış müqavilə şərtlərinə əsasən müvafiq tədbirlərin görülməsini diqqətə çatdırmışdır.
Tədbirdə pambıq əkini bəyan olunmuş torpaq sahələrinin xəritələşdirilməsinin təmin edilməsi ilə bağlı pambıqçı fermerlərə, xam pambıq tədarük edən şirkətlərin yerli nümayəndələrinə müvafiq tövsiyələr verilmiş, xəritəçəkmə prosesi ilə bağlı sual doğuran fikirlərə aydınlıq gətirilmişdir. Sudan İstifadəedənlər birliklərinin sədrlərinə, pambığın vegetasiya dövründə fermerlərə suyun vaxtında və növbəlilik əsasında verilməsi, su müqaviləsinin şərtlərinə əməl olunması ilə əlaqədar müvafiq tövsiyələr verilmiş, eyni zamanda fermerləri düşündürən, narahat edən məsələlər dinlənilmiş, qarşılıqlı fikir mübadiləsi aparılmış, səsləndirilən təkliflər nəzərə alınaraq tədbirlərin görüləcəyi bildirilmişdir.
Seyran CAVADOV,
"Azərbaycan"
