Xalqın və dövlətçiliyimizin tarixi ilə bağlı əlamətdar günlər xalqımız üçün hər zaman əzizdir. 14 iyul da məhz belə tarixlərdən biridir. 1969-cu il iyulun 14-də Ümummilli Lider Heydər Əliyev Azərbaycana ilk dəfə rəhbər seçildi və bununla da respublikamızın tarixində yeni inkişaf mərhələsinin əsası qoyuldu.
Heydər Əliyev Azərbaycanın keçmiş SSRİ-nin tərkibində olduğu dövrdə müxtəlif məsul vəzifələrdə çalışmış, təhlükəsizlik orqanlarında general-mayor rütbəsinə qədər yüksəlmişdi. 1969-cu il iyulun 14-də Azərbaycan KP MK-nın birinci katibi seçilməsi isə respublikanın ictimai-siyasi və sosial-iqtisadi həyatında əsaslı dönüş yaratdı. Həmin dövrdə Azərbaycan iqtisadi və sosial göstəricilərinə görə ittifaq respublikaları arasında çox geri qalırdı. Zəngin təbii sərvətlərə və böyük iqtisadi potensiala malik olmasına baxmayaraq, respublikanın inkişaf tempi qənaətbəxş deyildi.
Heydər Əliyevin həyata keçirdiyi məqsədyönlü siyasət qısa müddət ərzində Azərbaycanda dinamik inkişafın əsasını qoydu. Onun rəhbərliyi ilə Azərbaycan SSRİ-nin ən qabaqcıl və inkişaf etmiş respublikalarından birinə çevrildi. Sənayenin müxtəlif sahələri sürətlə inkişaf etdirildi, yeni istehsal müəssisələri yaradıldı, əhalinin sosial rifahının və mənzil-məişət şəraitinin yaxşılaşdırılması istiqamətində mühüm addımlar atıldı.
Heydər Əliyevin təşəbbüsü ilə Bakı və respublikanın digər şəhərlərində onlarca iri sənaye müəssisəsi istifadəyə verildi. "Ozon" zavodu, Elektron Hesablayıcı Maşınlar zavodu, Məişət Kondisionerləri Zavodu, Sumqayıt Kompressor Zavodu, Üst Trikotaj Fabriki, Bakı Tikiş və Ayaqqabı Fabriki, Gəncə Əlvan Metallar Emalı Zavodu, Naxçıvan Şüşə Qablar Zavodu, Əli-Bayramlı Məişət Cihazları Zavodu və digər istehsal müəssisələri həmin dövrdə yaradılaraq Azərbaycanın sənaye potensialının gücləndirilməsində mühüm rol oynadı.
Ulu Öndər milli-mənəvi dəyərlərin qorunmasına və təbliğinə də xüsusi önəm verirdi. Bu istiqamətdə həyata keçirilən tədbirlər xalqın milli özünüdərkinin güclənməsinə xidmət edirdi. Ötən əsrin 70-ci illərində Nəriman Nərimanovun, İmadəddin Nəsiminin, Cəfər Cabbarlının, Hüseyn Cavidin, Mehdi Hüseynzadənin, Səttar Bəhlulzadənin və digər görkəmli şəxsiyyətlərin abidələri ucaldıldı. 1976-cı ildə Şuşanın sosial-iqtisadi inkişafı haqqında mühüm qərar qəbul edildi, Xurşidbanu Natəvanın abidəsi qoyuldu, Molla Pənah Vaqifin məqbərəsi inşa edildi. Bütün bunlar milli-mənəvi irsə verilən yüksək dəyərin və xalqın tarixi yaddaşına ehtiramın bariz nümunəsi idi.
Heydər Əliyevin bütün fəaliyyəti Azərbaycanın gələcəyinə hesablanmışdı. Onun təşəbbüsü ilə 1978-ci ildə qəbul edilən Azərbaycan SSR Konstitusiyasında ilk dəfə Azərbaycan dili dövlət dili kimi təsbit olundu. O dövrün mürəkkəb siyasi-ideoloji şəraitində belə bir qərarın qəbul edilməsi böyük siyasi iradənin və milli təəssübkeşliyin təzahürü idi.
Ümummilli Lider xalqın gələcəyini müəyyən edən əsas amillərdən biri kimi hərbi sahənin inkişafına da xüsusi diqqət yetirirdi. Sovet dövründə azərbaycanlı gənclərin hərbi təhsil almasına və peşəkar zabit kimi yetişməsinə müxtəlif maneələr yaradılırdı. Belə bir şəraitdə Heydər Əliyev azərbaycanlı gənclərin keçmiş SSRİ-nin nüfuzlu ali hərbi məktəblərində təhsil almalarına geniş imkanlar yaratdı. Həmin zabitlər sonralar müstəqil Azərbaycanın Silahlı Qüvvələrinin formalaşdırılmasında və Birinci Qarabağ müharibəsində mühüm xidmətlər göstərdilər.
Moskvanın ciddi etirazlarına baxmayaraq, 1971-ci ildə Bakıda Cəmşid Naxçıvanski adına Hərbi Məktəbin yaradılması da Heydər Əliyevin uzaqgörən siyasətinin nəticəsi idi. Bu məktəbin yetirmələri müstəqillik illərində Azərbaycan Ordusunun peşəkar zabit korpusunun formalaşmasında mühüm rol oynadılar.
1993-cü ildə xalqın təkidli tələbi ilə yenidən siyasi hakimiyyətə qayıdan Heydər Əliyev müstəqilliyini itirmək təhlükəsi ilə üz-üzə qalan Azərbaycanı ağır böhrandan xilas etdi, ölkədə ictimai-siyasi sabitliyi bərpa etdi, müasir Azərbaycan dövlətinin möhkəm təməlini yaratdı və davamlı inkişaf strategiyasını müəyyənləşdirdi.
Bu gün Azərbaycan Respublikasının Prezidenti İlham Əliyev Ümummilli Lider Heydər Əliyevin müəyyən etdiyi siyasi kursu uğurla davam etdirir. Məhz bu siyasət nəticəsində Azərbaycan öz ərazi bütövlüyünü və suverenliyini tam bərpa edib, regionun aparıcı dövləti kimi mövqeyini daha da möhkəmləndirib, iqtisadi, siyasi və hərbi gücünü davamlı şəkildə artırıb. Heydər Əliyev ideyaları yaşayır, onun müəyyən etdiyi inkişaf yolu isə Azərbaycan xalqını yeni uğurlara aparır. Buna görə də Ümummilli Liderin əziz xatirəsinə ehtiram xalqımızın qəlbində əbədi yaşayacaq.
Səbinə XASAYEVA,
Milli Məclisin deputatı
