Onlar bu qatilin ədalət mühakiməsində cavab verməsini istəyirlər
Ermənilər 29 iyulda Laçın sərhəd-buraxılış məntəqəsində saxlanılaraq Bakıya gətirilən terrorçu Vaqif Çərkəzoviç Xaçaturyanın həbsi ilə əlaqədar siyasi şou düzəldir, mitinqlər təşkil edir, terrorçunun "xəstə" olduğunu, müalicə üçün Yerevana getdiyini, qətliamlar törətmədiyi iddiası ilə beynəlxalq təşkilatlara müraciət edib hay-həşir salıblar.
Ermənilərin yaratdıqları ajiotaj, terrorçunun Ermənistan dövləti tərəfindən müdafiəsi, deməyə əsas verir ki, Vaqif Xaçaturyan heç də sadə döyüşçü yox, azərbaycanlılara qarşı amansız divan tutmaqda xüsusi xidmətləri olmuş əsas fiqurlardan biridir. Azərbaycan Respublikası Baş Prokrorluğunun yaydığı məlumatda Vaqif Xaçaturyanın 1991-ci il dekabrın 22-də Xocalı rayonunun Meşəli kəndinin sakinlərinə qarşı törədilmiş soyqırımının, 8 qadın, 3 uşaq olmaqla, 28 nəfərin qətlə yetirilməsinin, 14 nəfərin yaralanmasının, eləcə də 400-ə yaxın azərbaycanlının doğma yurdlarından deportasiya olunmasının iştirakçısı və təşkilatçısı olduğu qeyd edilir.
Vaqif Xaçaturyana Meşəli kəndində Azərbaycan milliyyətindən olan şəxslərin soyqırımı, deportasiyası, kənd sakinləri və dövlətə məxsus çoxsaylı əmlakı məhvetmə və zədələməklə külli miqdarda maddi ziyanın vurulması faktları üzrə cinayət işi 1992-ci il yanvarın 11-də başlanıb. Terrorçu 12 noyabr 2013-cü ildən beynəlxalq axtarışa verilib.
Laçın sərhəd-buraxılış məntəqəsini "keçmək" istəyən "xəstə" terrorçunun şübhəli hərəkətlərindən, davranışından da hiss olunurdu ki, özü də, hətta onu "müalicəyə" aparanlar da sürprizlə üzləşə biləcəklərini hiss edirdilər.
Televiziya ekranlarında terrorçunu görən, vaxtilə ermənilərə əsir düşən soydaşlarımız redaksiyamızla əlaqə saxlayıb Vaqif Xaçaturyanın törətdiyi amansız vəhşiliklərdən danışdılar.
Hüseynov Valeh Sahib oğlu 1968-ci ildə Xocalıda anadan olub. 1992-ci il fevralın 25-dən 26-na keçən gecə Xocalı faciəsini yaşayanlardandır. Valeh Hüseynov 27 gün erməni əsirliyində olarkən Vaqif Xaçaturyanın etdiyi vəhşiliklərin canlı şahidi olub:
- Mən Vaqif Xaçaturyanı hələ Xocalı faciəsindən əvvəl tanıyırdım. Xocalının Badara kəndindən olan bu qatil "Kamaz" sürücüsü işləyirdi. Qarabağda separatçılıq hərəkatı başlayanda azərbaycanlılara qarşı xüsusi nifrəti ilə seçilən cəlladların bəlkə də ən amasızı Vaqif Xaçaturyan idi. Harada pislik var idisə, mütləq orada Vaqifin, Tosunun, Əsgəranın yanğınsöndürmə idarəsinin rəisi Karonun, Qərib adlı milis işçisi vardı, onların adı çəkilirdi. Xaçaturyan hələ 1988-ci ilin 18 sentyabrında Xocalıya basqın təşkil etmişdi. Meşəli soyqırımının da əsas təşkilatçısı Xaçaturyan idi. O zaman Xocalının müdafiəsi ilə Əlif Hacıyev məşğul olurdu. Xəbər gəldi ki, Xaçaturyanın dəstəsi Meşəlidə qırğın törədir. Əlif Hacıyev meşəlililərin müdafiəsi üçün oraya silahlı dəstə göndərdi...
Xocalı faciəsi baş verərkən ermənilər məni əsir götürdülər. Orada bizə zülm edən cəlladlardan biri Vaqif idi. Bu cəllad Azərbaycan dilində təmiz danışdığı üçün onu tanımayanlar azərbaycanlı olduğunu zənn edirdilər. Əsirlərin üstünə soyuq su tökür, çılpaq bədənlərinə dəmirlə vurur, dişlərini, dırnaqlarını çıxarırdı. Xocalıda məni prokuror, polis rəisi dindirəndə o da onların yanında idi. Bu cəlladı əsirlikdə olub tanımayan Xocalı sakini yoxdur. Xaçaturyan cəlladbaşı idi. Onun həbsini ilahi ədalət hesab edirəm.
Digər həmsöhbətimiz Meşəli kənd sakini, Meşəli polis bölməsinin əməkdaşı, sabiq döyüşçü Salmanov Ziyəddin Yepəki oğlu Vaqif Xaçaturyan barəsində danışarkən dedi:
- Vaqif Xaçaturyanı separatçılıq hərəkatının ilk günlərindən tanıyıram. Ağdamda separatçıların əleyhinə təşkil olunmuş mitinqdə mənim qardaşım da iştirak etmişdi. Ermənilər həmin mitinqdə olanların şəkillərinə baxıb kimliyini öyrənmişdilər. Mitinqin səhərisi günü əmimin "Niva"sı ilə Badaradan keçib Xocalıya gedirdik ki, öyrənək görək nə baş verir? Yolda xəbərimiz oldu ki, Badarada hərbi qərargah yaradılıb, kəndin girişində ermənilər silahlı post qurublar. Posta komandirliyi Vaqif Xaçaturyan edirdi. Şəxsən Vaqif bizim avtomobilimizi saxladıb hərbi qərargaha getməyə məcbur etdi. Qərargahın komandiri əvvəldən də yaxşı tanıdığım məktəb direktoru Armen Avenesyan idi. Bir də ən çox fəallıq edənlərdən biri Qasparyan Denik idi. Mən mitinqdə iştirak edən qardaşıma çox oxşayırdım. Bizi yalnız doğmalarımız bir-birimizdən ayıra bilərdilər. Ermənilər hesab edirdilər ki, mitinqdə iştirak edən mən olmuşam. Ona görə də Vaqif oraya toplaşan qadınlara deyirdi ki, maşının üstünə benzin töküb bunların üçünü də diri-diri yandırın. Qadınlar da onların dediklərini sözsüz etmək istəyirdilər.
Bu zaman bizim kənddə rus dili müəllimi işləyən Verdi müəllim özünü qabağa verib dedi ki, bunları Xocalıya getməyə qoymursunuz, bunu başa düşdük, daha niyə yandırırsınız ki? Əmimi göstərib dedi ki, bu Rafiq kişi sakit adamdır. İllərdir sizin kəndə çörək daşıyıb, imkan verin qayıtsınlar evlərinə.
Sonra Vaqifi Meşəlidəki dəhşətli hadisələr zamanı görmüşəm. Evlərimizi, öldürdüyü adamların meyitini yandıranda görmüşəm. Kəndçimiz Novruz kişinin ailəsini girov götürmüşdü. Bir ailənin 5 üzvünü Vaqif Xaçaturyan öldürüb, sonra da yandırmışdı. Cəlladın hobbisi əsirlərin sinəsinə xaç damğası basmaq idi. Tahir adında bir oğlan var idi, sinəsinə xaç çəkmişdi. Qənimət adlı qoca bir kişi var idi, başına bir avtomat darağı güllə vurmuşdu. Mən bunları öz gözümlə görmüşəm, canlı şahidiyəm. Vaqiflə sonra Xocalı hadisəsi zamanı vertolyotla meyitləri götürən zaman rastlaşmışam. Çingiz Mustafayev çəkiliş edəndə meyitləri yığan biz olmuşuq. Vertolyot meyitləri yığıb getdi. Yoldaşlarımızdan birinin anasını öldürmüşdülər. Biz qalıb onun meyitini axtarırdıq. Elə bu zaman ferma tərəfdən iki dənə "Uaz" markalı avtomobilin bizə tərəf gəldiyini gördük. Milləti əsasən bu fermanın yaxınlığında qırmışdılar. Bu zaman Vaqif, Ermənistanın sabiq prezidenti Serj Sarkisyan, bir də Abo gəlib fermanın yanında dayanıb bir qədər meyitlərə tamaşa edib getdilər. Bizim aramızdakı məsafə 50 metrdən də az olardı. Biz meyitlərin arasında gizlənib onlara baxırdıq. Mənim də baldızım orada idi. Allaha yalvarırdım ki, ölüsünü tapaq. Əgər girov düşübsə, başına nələrin gələcəyini təsəvvür edirdik.
Sonralar mən Ağdamın polis batalyonunda xidmətimi davam etdirdim. Gündəlik Qaraqayada postda dururdum. Hər gün Vaqif Xaçaturyanın şəhid olmuş əsgərlərimizin üzərində etdiyi vəhşiliklər barədə dəhşətli xəbərlər eşidirdim. Xocalıda da şəhid olanları tanınmaz hala o salırdı. Nəinki əsirlərimizə, şəhid olan insanlara işgəncə verməkdən, yandırmaqdan bu qatil zövq alırdı.
Bu, Ermənistanın dövlət səviyyəsində müdafiəsinə qalxdığı, beynəlxaq təşkilatların müdafiə etdiyi bir cəlladın azərbaycanlıların başına gətirdiyi münasibətlərin bir qismidir. Hələ neçə-neçə hadisənin təfərrüatı qalır...
Elşən QƏNİYEV,
"Azərbaycan"
jpg_1775219395.jpg)
