Özbəkistan Respublikasının Prezidenti Şavkat Mirziyoyevin Vaşinqtona səfəri çərçivəsində iki ölkə arasında bir sıra ikitərəfli sənədlərin imzalanması mərasimi və birgə layihələrin təqdimatı keçirilib.
AZƏRTAC rəsmi UZA informasiya agentliyinə istinadla xəbər verir ki, Özbəkistan Prezidentinin iştirakı ilə keçirilən tədbirdə ABŞ hökumətinin və maliyyə qurumlarının nümayəndələri, o cümlədən ticarət nümayəndəsi Ceymison Qrir, ABŞ Prezidentinin xüsusi elçisi Paolo Zampolli, “Eximbank”ın prezidenti Con Yovanoviç və Amerika-Özbəkistan Ticarət Palatasının sədri Kerolin Lamm, həmçinin “Traxys”, “Valmont Industries”, “Gulf Oil”, “Aviagen Broiler Breeding Group”, “John Deere”, “BlackRock Financial Markets Advisory”, “Oppenheimer” və digər aparıcı şirkətlərin rəhbərləri iştirak ediblər.
Özbəkistanın regionlarının rəhbərləri də videokonfrans vasitəsilə keçirilən tədbirə qoşulublar.
Şavkat Mirziyoyev çıxışında qeyd edib ki, yeni, praktik formatda keçirilən görüş əvvəlki dəyirmi masanın məntiqi davamıdır və iqtisadi tərəfdaşlığın strateji etimad, qarşılıqlı maraq səviyyəsinə keçməsini əks etdirir. “Bu gün tərəfdaşların etibarlılığı, qaydaların proqnozlaşdırıla bilməsi və uzunmüddətli əməkdaşlıq üfüqləri ön plandadır. Məhz bu çərçivədə Amerika Birləşmiş Ştatları ilə qarşılıqlı fəaliyyətimizi qururuq”, - deyə Prezident vurğulayıb.
Dövlət başçısı iqtisadi gündəliyin Özbəkistan ilə ABŞ arasında strateji tərəfdaşlığın əsas sütunlarından biri olduğunu vurğulayıb. ABŞ ilə birgə iş üçün prioritet sahələr, o cümlədən vacib xammal, neft-kimya, enerji, kənd təsərrüfatı, quşçuluq və digər sahələr müəyyən edilib. Beynəlxalq İnkişaf Maliyyə Korporasiyasının və ABŞ “Eximbank”ının sistemli tərəfdaşlar kimi artan rolu xüsusilə vurğulanıb.
Birgə Biznes və İnvestisiya Şurasının potensialından fəal şəkildə istifadə etməyin vacibliyi də qeyd edilib. Regionlararası əməkdaşlığın dərinləşdirilməsi çərçivəsində Özbəkistanın regional liderlərinin tərəfdaş Amerika ştatlarına səfərlərinin təşkili nəzərdə tutulur. Dövlət başçısının iştirakı ilə yanacaqdoldurma məntəqələri şəbəkəsinin tikintisi, çiləyici suvarma texnologiyalarının tətbiqi, vacib mineralların çıxarılması və təchizatı, quşçuluq klasterinin yaradılması, aqrar-sənaye kompleksinin, maliyyə bazarının inkişafı və investisiya mühitinin yaxşılaşdırılması ilə bağlı ikitərəfli sənədlər imzalanıb.
