Ukrayna-Rusiya müharibəsinin tənzimlənməsində dialoqun davam etməsi yaxşı haldır. ABŞ Prezidenti Donald Trampın andiçməsindən sonra 3 aylıq dialoq onun xarici siyasətinin əsas hədəfini göstərir. Bununla paralel olaraq Rusiya-Ukrayna münaqişəsində həllində sülhə yaxınlaşmasının olmasını söyləmək hələ ki mübahisə doğurur.
Bu fikri AZƏRTAC-a açıqlamasında ukraynalı siyasi şərhçi Oleksiy Buryaçenko söyləyib.
Ekspertin fikrincə, Avropa ölkələri başa düşürlər ki, Ukrayna bütün Avropanın təhlükəsizliyi üçün ümumi elementdir.
“Ona görə də Avropa Ukraynaya birbaşa maliyyə və hərbi yardımda maraqlıdır. Bu baxımdan Avropanın “istəklər koalisiyası” yaranıb. Məhz bu amili də Ukrayna-Rusiya müharibəsinin tənzimlənməsində aparılan dialoqun pozitivliyini göstərir”, - deyə Oleksiy Buryaçenko əlavə edib.
Onun sözlərinə görə, digər bir amil isə Ukraynanın özünün istehsal etdiyi hərbi sənayeni artırmaqdır.
“Hazırda Ukrayna cəbhə üçün özü istehsal etdiyi hərbi silah-sursat 30 faiz təşkil edir. Ukrayna Prezidenti hökumət qarşısında ilin sonuna qədər bu göstəricinin 50 faizə çatdırılması hədəfini qoyub. Cəbhə, ordu böyükdür, ona görə də bu, ambisiyalı hədəfdir. Ancaq neqativ fakt odur ki, əgər əvvəllər Amerika Ukraynaya aktiv şəkildə maliyyə və hərbi yardımlar edirdisə, hazırda Tramp Administrasiyası yeni paket yardımını elan etməyə belə hazırlaşmır. Bu, düzgün strategiya deyil. Çünki danışıqların nəticəsinin olması üçün Rusiyaya güc vasitəsilə təsir etmək mümkündür. Güc təsiri siyasi, iqtisadi, hərbi yolla ola bilər”, - deyə ukraynalı ekspert vurğulayıb.
