Rusiya lideri Vladimir Putin İstanbulda Prezident Vladimir Zelenski ilə görüşməyə razılıq verərsə, Ukrayna onunla danışıqlara qoyulan qadağaya düzəliş edə bilər.
AZƏRTAC xəbər verir ki, bunu Ukrayna Prezidenti aparatı rəhbərinin müşaviri Mixaylo Podolyak “The Breakfast Show” verilişinin efirində deyib.
Putinin İstanbula gedəcəyi təqdirdə Kiyevin onunla danışıqlara qoyulan qadağanı ləğv edə biləcəyi sualına Podolyak belə cavab verib: “Hesab edirəm ki, sənədi imzalasaq, Ukrayna Milli Təhlükəsizlik və Müdafiə Şurasının qərarına dəyişiklik ediləcək”.
O əlavə edib: “Haqlısınız, biz Putini legitim Prezident hesab etmirik, amma əslində, o, Rusiyaya təkbaşına nəzarət edir. Ona görə də burada qanuni olaraq, Milli Təhlükəsizlik və Müdafiə Şurasının qərarında dəyişiklik etmək kifayət edəcək və müvafiq qanunvericilik aktları qəbul olunacaq”.
Qeyd edək ki, 2022-ci ilin oktyabrında Volodimir Zelenski Milli Təhlükəsizlik və Müdafiə Şurasının Rusiya Prezidenti Vladimir Putinlə danışıqların “mümkünsüz” olduğu barədə qərarını qüvvəyə mindirən Fərman imzalayıb.
Mayın 11-nə keçən gecə Putin atəşkəs təklifini rədd edərək mayın 15-də İstanbulda Ukrayna ilə birbaşa danışıqların bərpası təklifini irəli sürüb.
Elə həmin səhər Zelenski Rusiya ilə dialoqa razılaşıb, lakin vurğulayıb ki, əsas şərt mayın 12-nə planlaşdırılan atəşkəs rejiminə əməl olunmasının təsdiqi olmalıdır. Bu təşəbbüs əvvəllər Ukrayna, Amerika Birləşmiş Ştatları (ABŞ) və İstəklilər Koalisiyasından dəstək alıb.
Daha sonra Türkiyə rəsmi olaraq Ukrayna ilə Rusiya arasında danışıqlarda vasitəçi kimi çıxış etməyə hazır olduğunu bəyan edib.
