BMT PKK terror təşkilatının tərk-silah edilməsini alqışlayır
Birləşmiş Millətlər Təşkilatının sözçüsü Stefan Düjarrik PKK-nın silahlı mübarizədən əl çəkməsini alqışlayıb. Düjarrik mətbuat konfransında deyib: "Biz razılaşmanın həyata keçirilməsini, ən azı ilk addımı (PKK-nın silahı yerə qoymasını) alqışlayırıq". O, ümid etdiyini bildirib ki, bu hadisə regionda davamlı sülhə doğru gələcək addımlar üçün stimul olacaq: "Lazım gələrsə, biz bu prosesə hər cür dəstək verməyə hazırıq".
Türkiyə dövlətinə qarşı 40 illik silahlı mübarizədən sonra iyulun 11-də İraqın Süleymaniyyə şəhərində PKK terror təşkilatı döyüşlərin dayandırılması və silahların yerə qoyulması istiqamətində ilk addım olacaq simvolik mərasim keçirib. PKK-nın tərk-silahı İraq Kürdüstanında ciddi təhlükəsizlik tədbirləri altında həyata keçirilir. Prosesin ən azı yayın sonuna qədər davam edəcəyi gözlənilir. Türkiyə Prezidenti Rəcəb Tayyib Ərdoğan bu addımı ölkə üçün "qanlı buxovların qırılması" adlandırıb.
PKK terroru nəticəsində 40 minə yaxın insan həlak olub. Ekspertlərin fikrincə, ABŞ, Aİ və Böyük Britaniya tərəfindən terror təşkilatları siyahısına salınan PKK-nın tərk-silah olunması təkcə Türkiyədə deyil, İraq, Suriya və İranda da hiss ediləcək.
Həbsdə olan PKK lideri Abdullah Öcalan bu günlər yayımlanan videoda bunun "silahlı qarşıdurma mərhələsindən demokratik siyasət və hüquq mərhələsinə könüllü keçid" olduğunu bildirib. Xatırladaq ki, o, 1999-cu ildə həbs olunduqdan sonra İmralı adasındakı həbsxanada cəza çəkir.
Onu da qeyd edək ki, bu, Türkiyə ilə PKK arasında sülhə nail olmaq üçün atılan ilk addım deyil. Amma indiyə qədər 1984-cü ildə başlayan silahlı mübarizənin, nəhayət, bitəcəyinə dair ən böyük ümid verən cəhddir.
2013-cü ildə Öcalan PKK tərəfindən atəşkəs elan edib və tərəflər yenidən danışıqlar masası arxasında oturublar. Onlar Dolmabaxça Konsensusu kimi tanınan sülh nizamlanması üçün ümumi prinsiplər hazırlayıblar. 2015-ci ildə Öcalan silahlı mübarizədən əl çəkməyə yeni çağırış edib. Amma danışıqlar yarımçıq qalıb. Diplomatik prosesin pozulması xüsusilə cənub-şərqdə - kürdlərin çoxluq təşkil etdiyi şəhərlərdə, o cümlədən Diyarbəkirdə yeni toqquşmalara səbəb olub.
Son illərdə Türkiyə Hərbi Hava Qüvvələri İraqın şimalındakı dağlarda PKK bazalarına dəfələrlə zərbələr endirib. Ankara həmçinin Suriyada kürd terrorçularına qarşı bir neçə hərbi kampaniya həyata keçirib. Eyni zamanda Ankara kürdlər silahı yerə qoyana qədər PKK ilə növbəti danışıqları istisna edib. İndi PKK silahı buraxmağa razılaşdığı üçün danışıqlar real perspektivə çevrilə bilər.
2024-cü ilin oktyabrında millətçi hərəkatın lideri və Ərdoğanın əsas müttəfiqlərindən biri olan Dövlət Baxçalı hökumətin PKK-nın tərksilah edilməsini nəzərdə tutan "Terrorsuz Türkiyə" təşəbbüsünü açıqlayıb. O, PKK-nın həbsdə olan lideri Abdullah Öcalanı partiyanı buraxmağa çağırıb. Baxçalının açıqladığı kimi, təşkilat özünü buraxandan sonra Öcalanın da azadlığa çıxması mümkün olacaq.
Türkiyə hökuməti kürdyönümlü Demokrat Partiyası vasitəsilə Öcalanla danışıqlara başlayıb və daha sonra o, fevral ayında tərəfdarlarına PKK-nı ləğv etmək üçün tarixi çağırış edib. Partiya liderinin çağırışı iki millət vəkili tərəfindən İmralı adasındakı həbsxanada Öcalanla görüşdən sonra oxunub. Öcalanın məktubunda deyilir: "Bütün qruplar silahı yerə qoymalı, PKK isə özünü buraxmalıdır". Bundan sonra Türkiyə Prezidenti bildirib ki, PKK-nın qərarı "terror divarını yıxmaq istiqamətində tarixi addım atmaq üçün fürsət" verib.
Rizvan CƏFƏROV,
"Azərbaycan"
jpg_1765706081.jpg)
