Türkiyə Prezidenti Rəcəb Tayyib Ərdoğan ABŞ-ın PBS telekanalına müsahibəsində uzun müddətdir ki, Birləşmiş Ştatlar Senatında Türkiyə və Azərbaycan əleyhinə fəaliyyət göstərən, Ağ evi Ankaraya F-16 döyüş təyyarələri satmamağa çağıran ermənipərəst senator Bob Menendezin növbəti anti-Türkiyə çıxışına sərt cavab verib: “Bob Menendez hələ Türkiyəni yaxşı tanımır, o, hələ Rəcəb Tayyib Ərdoğanı da yaxşı tanımır”.

AZƏRTAC Anadolu agentliyinə istinadla xəbər verir ki, amerikalı senatorun guya Türkiyənin Yunanıstanı təhdid etməsi iddialarına cavab verən Rəcəb Tayyib Ərdoğan əlavə edib: “Biz uzun onilliklərdir dostuq. Deyəsən, Menendez Türkiyəyə düşmən münasibət bəsləyib və bizi öz seçdiyi bəzi müzakirələrə cəlb etməyə çalışır. Ancaq biz bunun bir hissəsi olmayacağıq. Yunanıstanla dostluğumuz onların düşündükləri kimi deyil”.

Ukraynada müharibənin nə vaxt bitəcəyi sualına cavab verən Türkiyənin dövlət başçısı bildirib ki, bunu ancaq Rusiya və Ukrayna prezidentləri müəyyən edə bilər. Vladimir Putinlə müharibənin gedişi ilə bağlı müzakirələri haqqında danışan Prezident Ərdoğan qeyd edib ki, münaqişənin “uzun müddət” davam edəcəyi gözlənilir. O əlavə edib: “Müharibənin mümkün qədər tez bitməsi üçün biz çox ümidli olmaq istərdik. Putin, əslində bu müharibənin tez bir zamanda bitməsinin tərəfdarıdır. Rusiyaya güvənməmək üçün heç bir səbəbim yoxdur. Qərb nə dərəcədə etibarlıdırsa, Rusiya da eyni dərəcədə etibarlıdır. Son 50 ildir ki, biz Aİ-nin astanasında gözləyirik. Bu məqamda Qərbə güvəndiyim qədər Rusiyaya da güvənirəm. Türkiyə Aİ-nin qəbul etdiyi qərarlara böyük əhəmiyyət verir və irəliyə doğru hər hansı müsbət addımı alqışlayacaq. Ankara son beş onillikdə Aİ-nin astanasında dayanıb və biz həmişə özümüzü təmin etmişik. Biz heç vaxt Aİ-dən aldığımız töhfələrə və ya dəstəyə güvənməmişik, ona görə də İttifaqa üzvlük bizim üçün çox vacib deyil".