Tovuz: ilin sonu yaxınlaşsa da, işin sonu görünmür

Son illər dünyanı rahatsız edən məsələlərdən biri də ərzaq təhlükəsizliyidir. 

Bu sahədə mövcud olan problemlər ölkələrdən həmin istiqamətdə əsaslı dönüş yaratmağı tələb edir. Bu baxımdan, Azərbaycan da istisna deyil. 

Ölkə üzrə bu istiqamətdə həyata keçirilən islahatlar Tovuzda da uğurlu nəticələr verir. Xüsusilə son illər kənd təsərrüfatı məhsulları istehsalı sahəsində əldə olunan nailiyyətlər bunu deməyə əsas verir.

Payızın, necə deyərlər, oğlan çağıdır. Qarşıdan qış gəlir. Belə bir vaxtda əkinçilər yetişdirdikləri kənd təsərrüfatı məhsullarını qısa vaxt ərzində yığıb başa çatdırmaq üçün əllərindən gələni əsirgəmirlər. İli uğurla yola salmaq əzmində olan tovuzlular bu il də yüksək göstəricilər qazanırlar. Aldığımız məlumata görə, cari ilin ötən dövrü ərzində rayonda kənd təsərrüfatı məhsulları istehsalının faktiki qiymətlərlə dəyəri 310 milyon 616,8 min manat olmuşdur ki, onun da 70 milyon 947,5 min manatlığı heyvandarlıq, 239 milyon 669,3 min manatlığı bitkiçilik məhsullarının payına düşür. Əvvəlki illərdə olduğu kimi, bu il də kənd təsərrüfatı bitkilərinin becərilməsinə diqqət artırılmış, aqrotexniki tədbirlər optimal müddətdə başa çatdırılmış, xəstəlik və ziyanvericilərə qarşı mübarizə tədbirləri vaxtında aparılmışdır. Bunların hesabına sahələrdən 38 min 802 ton buğda, 7 min 500 ton arpa, 8 min 950,7 ton dən üçün qarğıdalı, 485,4 ton dən üçün günəbaxan, 27 min 729,8 ton tərəvəz, 1 min 129,7 ton bostan, 24 min 28,5 ton yem bitkiləri istehsal olunmuşdur. Əvvəlki ilin müvafiq dövrü ilə müqayisədə buğda istehsalı 5 min 30, arpa istehsalı 73, dən üçün günəbaxan istehsalı 7,8 ton çox olmuşdur. 

Rayonda heyvandarlıq məhsulları istehsalı da əvvəlki ilə nisbətən xeyli artmışdır. Son məlumata görə, qoyun və keçilərin sayı 122,3 min, qaramalın sayı 14,4 min başa çatmışdır ki, bu da keçən illə müqayisədə 15,2 faz çoxdur. İlin ötən dövrü ərzində ət istehsalı (diri çəkidə) 6 min 31,6, süd istehsalı 25 min 610,3 tona, yumurta istehsalı 15 milyon 53 min ədədə çatmışdır.

Tovuzda kartofçuluğun da inkişafına diqqətlə yanaşılır. Ölkənin böyük kartof istehsalçılarından olan Tovuzda bu il 136 min 803,1 ton kartof yığılmışdır ki, bu da əvvəlki ildəki göstəricidən çoxdur. Hər hektarın məhsuldarlığı 300 sentnerə yaxın olmuşdur. İstehsal olunan kartofun saxlanmasında da elə bir problem yaşanmır. Rayonda 22 min 500 ton tutumu olan soyuducu anbar kompleksi var. Logistik mərkəz kimi fəaliyyət göstərən bu obyekt rayonda kartofçuluğun inkişafına əhəmiyyətli dərəcədə təsir göstərmişdir.

Üzümçülüyə də maraq çoxdur. Hazırda rayonda 1150 hektar üzüm bağı var ki, onun da 20 hektarı keçən il salınıb. Elə ötən il bağlardan 30 min 441,5 ton məhsul götürən bağbanlar cari ildə bu rəqəmi xeyli artırmış, hər hektardan 284,5 ton üzüm yığmışlar. İstehsal olunan üzümün emalı və satışının təşkili istiqamətində də bir sıra işlər görülmüşdür. Məsələn, Aşağı Quşçu kəndində 3 min tonluq üzüm emalı müəssisəsi istifadəyə verilmişdir. 

Hazırda iqtisadiyyatının əsasını aqrar sahə təşkil edən Tovuzda növbəti kənd təsərrüfatı ilinə geniş hazırlıq işləri görülür. Məhsulu yığılmış sahələr şumlanır, əkin aparılmış sahələrə müxtəlif mineral gübrələr verilir. 

Sabir ƏLİYEV,

"Azərbaycan"