TƏBİB sistemində 72 mindən çox tibb işçisini əhatə edən yeni əməkhaqqı islahatı sentyabrın 1-dən tətbiq olunur
Səhiyyənin inkişafı yalnız müasir tibb müəssisələrinin yaradılması, yeni texnologiyaların tətbiqi və xidmət imkanlarının genişləndirilməsi ilə məhdudlaşmır. Sistemin əsas dayağı olan tibb işçilərinin əməyinin layiqincə qiymətləndirilməsi, onların sosial müdafiəsinin gücləndirilməsi və peşəkar fəaliyyət üçün daha əlverişli şəraitin yaradılması da bu inkişafın mühüm tərkib hissəsidir. Azərbaycanda son illər səhiyyə sahəsində aparılan islahatlarda məhz insan amilinə xüsusi diqqət yetirilməsi bu baxımdan mühüm əhəmiyyət daşıyır.
Tibb işçilərinin sosial rifahının daha da yaxşılaşdırılması istiqamətində növbəti mühüm addım TƏBİB sistemində çalışanların əməkhaqlarının artırılmasıdır. 2026-cı il sentyabrın 1-dən tətbiq olunan yeni qaydalar TƏBİB-in tabeliyindəki tibb müəssisələrində çalışan 72212 tibb işçisini əhatə edir. Bununla da on minlərlə səhiyyə əməkdaşının gəlirlərinin artırılması və əməyin qiymətləndirilməsində daha çevik mexanizmlərin tətbiqi nəzərdə tutulur. Yeni sistemin mühüm xüsusiyyətlərindən biri əməkhaqqı artımlarının diferensial yanaşma əsasında müəyyənləşdirilməsidir. Belə ki, artımlar zamanı tibb işçisinin vəzifəsi, ixtisası, iş yükü və fəaliyyət göstəriciləri ilə yanaşı, regionlarda mövcud kadr təminatı da nəzərə alınacaq. Bu yanaşma görülən işin həcmi və xüsusiyyətləri ilə əməkhaqqı arasında daha çevik əlaqənin yaradılmasına xidmət edir.
İslahat xüsusilə ilkin səhiyyə, təcili tibbi yardım, anesteziologiya-reanimatologiya xidmətlərində çalışanlar, həmçinin regionlarda kadr çatışmazlığı müşahidə edilən dar ixtisaslar üzrə həkimlər üçün əhəmiyyətlidir. Bu istiqamətlərdə çalışan mütəxəssislər üçün nəzərdə tutulan artımlar həm onların əməyinin stimullaşdırılması, həm də səhiyyə sistemində mövcud kadr ehtiyaclarının qarşılanması baxımından mühüm rol oynayacaq.
Lökbatan Tibb Mərkəzinin Təcili Təxirəsalınmaz Tibbi Yardım həkimi Mehman Bağırov bildirib ki, əməkhaqlarının artırılması ilə bağlı verilən qərara görə, cənab Prezident İlham Əliyevə, Birinci vitse-prezident Mehriban xanım Əliyevaya, eləcə də aidiyyəti qurumların rəhbərliyinə dərin minnətdarlığımızı bildiririk. Tibb işçilərinin əməyinə verilən yüksək dəyərin növbəti göstəricisi olan bu mühüm addım maddi rifahımızın daha da yaxşılaşdırılmasına xidmət edir. Əməkhaqlarının artırılması eyni zamanda tibb işçilərinin məsuliyyətli və şərəfli fəaliyyətinə göstərilən diqqət və qayğının nümunəsidir. Biz tibb işçilərinə göstərilən davamlı dövlət qayğısını yüksək qiymətləndirir, bu təşəbbüsün həyata keçirilməsində əməyi olan hər kəsə təşəkkürümüzü ifadə edirik".
Həkimlərin əməyinə verilən yüksək qiymətə, onların üzərinə düşən böyük məsuliyyətin nəzərə alınmasına və əməkhaqlarının artırılması ilə bağlı qəbul edilən qərara görə ölkə rəhbərliyinə təşəkkür edən həkim Ləman Əliyeva deyib ki, bu dəstəyin həkimlərin əmək fəaliyyətinin daha da yaxşılaşdırılmasına, peşəkar bilik və bacarıqlarının inkişaf etdirilməsinə, eyni zamanda tibbi xidmətin keyfiyyətinin yüksəldilməsinə əlavə stimul verəcəyinə əmindir. "Bu dəstək bizi bundan sonra da üzərimizə düşən vəzifələri daha böyük məsuliyyət və peşəkarlıqla yerinə yetirməyə ruhlandırır", - deyə mütəxəssis bildirib.
Həkim Şəfa Əliyeva isə bildirib ki, əməkhaqlarının artırılması səhiyyə sahəsində çalışan insanların gərgin və məsuliyyətli əməyinə göstərilən diqqətin, onların fəaliyyətinə verilən dəyərin mühüm göstəricisidir: "Tibb işçilərinin sosial təminatının gücləndirilməsi istiqamətində atılan bu addımı böyük məmnunluqla qarşılayırıq. Hesab edirik ki, tibb işçilərinin rifahının yaxşılaşdırılmasına yönələn belə təşəbbüslər peşə fəaliyyətinə də müsbət təsir göstərir. Göstərilən diqqət həkimlər üçün həm mənəvi dəstək, həm də bilik və bacarıqlarını daha da təkmilləşdirmək, pasiyentlərə yüksək səviyyədə xidmət göstərmək üçün əlavə motivasiyadır. Bizə göstərilən etimadı bundan sonra da məsuliyyətli fəaliyyətimiz, peşəkarlığımız və insan sağlamlığının qorunmasına layiqli töhfəmizlə doğrultmağa çalışacağıq. Tibb işçilərinə göstərilən davamlı diqqət və qayğıya görə təşəkkürümüzü ifadə edirik".
Ülkər XASPOLADOVA,
"Azərbaycan"
