Avropanın bir neçə ölkəsi ABŞ administrasiyasının xahişlərinə baxmayaraq, Ukraynaya "Patriot" hava hücumundan müdafiə sistemi üçün əlavə tutucu raketlər verməkdən imtina edib. Bu barədə "The Washington Post" qəzeti danışıqlarla tanış mənbələrə istinadən məlumat yayıb.
Nəşrin məlumatına görə, bu ölkələrin hökumətləri silah-sursat ehtiyatlarının bir hissəsinin təhvil verilməsinin öz hava hücumundan müdafiə sistemlərinə mənfi təsir göstərəcəyindən ehtiyatlanırlar. NATO rəsmiləri həmçinin qeyd edirlər ki, "Patriot" sistemlərinin və digər müasir hava hücumundan müdafiə sistemlərinin istehsal həcmi dünyada silahlı münaqişələrin yaratdığı artan tələblərə uyğun gəlmir.
Anonimlik şərti ilə danışan yüksək vəzifəli Ukrayna rəsmisi nəşrə bildirib ki, tutucu raket ehtiyatları ilə bağlı vəziyyət kritik olaraq qalır. "Vəziyyət həqiqətən pisdir", - mənbə "The Washington Post" qəzetinə bildirib və əlavə edib ki, "təchizat artmazsa, qış üçün ən pis ssenari mümkündür". Bu azmış kimi, nəşrin məlumatına görə, ABŞ Prezidenti Donald Tramp da bu yaxınlarda Ukrayna Prezidenti Volodimir Zelenski ilə əvvəllər müzakirə edilən, tutucu raketlərin istehsalı üçün lisenziyaların Ukraynaya ötürülməsi ilə bağlı razılaşmadan imtina edib.
Hava hücumundan müdafiə vasitələrinin çatışmazlığı problemi xüsusilə Rusiyanın 5 avqust gecəsi baş verən kütləvi hücumu zamanı özünü daha aydın göstərib. Həmin vaxt Rusiya qüvvələri 24 ballistik raketdən və 4 "Tsirkon" və "Oniks" raketindən istifadə edib. Ukrayna Hərbi Hava Qüvvələrinin məlumatına görə, kifayət qədər ixtisaslaşmış hava hücumundan müdafiə sistemlərinin olmaması səbəbindən ballistik raketlərin heç biri zərərsizləşdirilməyib.
Hücumdan sonra Ukrayna Prezidenti Volodimir Zelenski müttəfiqlərini hava hücumundan müdafiə sistemlərinin çatdırılmasını sürətləndirməyə və Rusiya hərbi-sənaye kompleksinə sanksiya təzyiqini artırmağa çağırıb.
Rizvan CƏFƏROV,
"Azərbaycan"
