"Xocalı soyqırımının təşkilatçılarından və ən qəddar icraçılarından olan Vitali Balasanyanın yenidən "xortlamaq" cəhdi bir daha sübuta yetirir ki, o, Samvel Babayan və əlləri Azərbaycan xalqının qanına bulaşmış digər separatçı-terrorçular ədalət məhkəməsi qarşısında dayanmayınca və layiq olduqları cəzanı almayınca, əməllərindən əl çəkməyəcək, bu və ya digər şəkildə siyasi gündəmə gəlməyə çalışacaq, sülh prosesinə maneə yaratmaq üçün ən müxtəlif üsullara əl atacaqlar. Balasanyanın Rusiya prezidentinə məktubu rəzil, qorxaq, törətdiyi ağır cinayətlərin girovuna çevrilmiş bir terrorçunun kölə, qul təfəkkürünün bariz bir nümunəsidir".
Bu sözləri "Azərbaycan" qəzetinə Milli Məclisin deputatı Elçin Mirzəbəyli deyib. O bildirib ki, bu kağız parçası vaxtilə Ermənistan ordusunun işğalı nəticəsində Azərbaycanın nəzarətindən çıxan ərazilərdə elan edilən qondarma rejimin mahiyyətinin işğal prosesinin müxtəlif adlar altında legitimləşdirilməsi və növbəti mərhələdə isə tarixi və hüquqi Azərbaycan torpaqlarının Ermənistana birləşdirilməsindən ibarət olduğunu bir daha göstərir. "Azərbaycan ərazilərində 1988-ci ildən etibarən aktiv mərhələyə qədəm qoyan separatizm dalğasının "Miatsum" (Birləşmək) şüarı ilə başladılması da bunu təsdiqləyir. Balasanyan öz məktubunda İkinci Dünya müharibəsində 90 min "Qarabağ ermənisi"nin iştirak etdiyini yazmaqla, əslində, nə qədər şərəfsiz bir yalançı olduğunu təkrar xatırladır. Hitler Almaniyasının SSRİ-yə hücumundan 2 il öncə -1939-cu ildə SSRİ-nin mərkəzi hakimiyyət orqanlarında çalışan ermənilərin iştirakı ilə "aparılan" siyahıyaalınmadan sonra təqdim edilən şişirdilmiş rəqəmlərdə belə, həmin dövrdə "Dağlıq Qarabağ Muxtar Vilayəti"ndə yaşayan ermənilərin sayı 132 min nəfər göstərilir. Belə çıxır ki, 1941-1945-ci illərdə Azərbaycan torpaqlarında - Qarabağda yaşayan erməniəsilli qadınlar, qocalar və hətta uşaqlar da müharibədə "iştirak" ediblər. Əslində Balasanyan kimilər faşist cəlladı Qaragin Njdenin törəmələridirlər və onların azərbaycanlılara qarşı törətdikləri ağır müharibə cinayətləri, ağlasığmaz vəhşiliklər də bunu sübuta yetirir", - deyə o bildirib.
Deputat xatırladıb ki, Balasanyan kağız parçasında bildirir ki, o və cinayətkar ortaqları guya Azərbaycan torpaqlarının işğal altında olduğu zaman kəsiyində faşizm üzərində qələbənin şərəfinə ucaldılmış abidələri "bərpa" ediblər və "qoruyub"lar. Azərbaycan torpaqlarının işğalına son qoyulduqdan sonra dünyanın gözü qarşısında sərgilənən xarabalıqlar, əslində, hər şeyi deyir və bu, yaltaq gözəgirmə, ağlı, şüuru başında olan istənilən şəxsdə ən azı ikrah hissi doğurmalıdır.
E.Mirzəbəyli qeyd edib ki, bütün bunlar Vitali Balasanyanın, Samvel Babayanın və Azərbaycana, Azərbaycan xalqına qarşı dəhşətli cinayətlər törətmiş bütün müharibə canilərinin Ermənistanın hakimiyyət orqanları tərəfindən saxlanılaraq, Azərbaycana təhvil verilməli olduqlarını sübuta yetirir: "Azərbaycan ərazilərini könüllü şəkildə tərk edən ermənilər isə yalnız Qərbi Azərbaycandan qovulmuş və sayı 300 mindən çox olan azərbaycanlıların öz evlərinə ləyaqətli qayıdışı təmin edildikdən, həm də Azərbaycan vətəndaşlığını qəbul etdikdən sonra qayıda bilərlər. Təbii ki, bu zaman onların kimlikləri ciddi şəkildə araşdırılacaq və Azərbaycan ərazilərində cinayət törədənlər isə ədalət məhkəməsi qarşısında dayanacaqlar".
Əsmər QARDAŞXANOVA,
"Azərbaycan
