Arpa üzrə məhsuldarlıq 40 sentnerin üstündə, buğda üzrə 50 sentnerə yaxındır
Ərzaq məhsulları sırasında taxılın strateji əhəmiyyət daşıdığını təkrarlamağa ehtiyac yoxdur. Amma indiki vaxtda bu qiymətli ərzağa olan tələbatın yerli istehsal hesabına ödənilməsinin ikiqat əhəmiyyəti olduğunu dönə-dönə deməyə ehtiyac var.
Məhz buna görə də dövlət səviyyəsində istər əhalinin un və un məmulatları ilə təminatına, istərsə də heyvandarlığın inkişafında əsas şərt sayılan yemə olan tələbatın ödənilməsinə xüsusi diqqət və dəstək verilir.
Hazırda ölkəmizdə taxıl biçini yekunlaşmaq üzrədir. Belə bir dövrdə samuxlular da zəmilərdə yetişdirdikləri məhsulu vaxtında yığıb başa çatdırmaq üçün əllərindən gələni əsirgəmirlər. Əvvəlki illərdə olduğu kimi, bu il də rayon taxılçıları yüksək göstəricilərə nail olurlar. Təsərrüfatlarda 11128,6 hektara taxıl toxumu səpilmişdi. Onun 5673,8 hektarı buğda, 5454,8 hektarı isə arpadır. Taxıl sahələrinin 5080,3 hektarı, yəni 45,7 faizi kənd təsərrüfatı müəssisələrinin, 6048,3 hektarı, yəni 54,3 faizi şəxsi təsərrüfatların payına düşür. Artıq arpa biçini başa çatmışdır. Sahələrdən 2135 ton arpa biçilmiş, hər hektarın məhsuldarlığı 43,3 sentner olmuşdur. Hazırda buğda biçilir. Son məlumata görə, 10405,2 hektardan 45099,3 ton məhsul yığılmışdır. Hər hektardan 49,3 sentner buğda biçilmişdir ki, bu da keçən ilki göstəricidən xeyli çoxdur.
Samuxda ən çox taxıl əkən "Aqro DAİRY" MMC, "Regionaqro" MMC və "Murovdağ" kəndli fermer təsərrüfatı bu il də yüksək məhsuldarlığa nail olmuşlar. Təsərrüfatlardan başqa, ayrı-ayrı fermerlər də məhsul istehsalında fərqlənirlər. Məsələn, Aşağı Ağasıbəyli kəndinin sakini Surxay Kərimov keçənilki göstəricisini təzələyərək 70 hektarda əkdiyi taxılın hər hektarından 40 sentner taxıl götürmüşdür.
Onu da qeyd edək ki, taxıl biçinində kombayna olan tələbat tam təmin olunmuşdur. Həmin hesaba havaların qeyri-sabit keçməsinə baxmayaraq, keçən ilin eyni dövründəkindən çox taxıl sahəsı biçilmişdir.
Sabir ƏLİYEV,
"Azərbaycan"
