Şamaxı növbəti dəfə Üzüm və Şərab Festivalına ev sahibliyi edir.
AZƏRTAC xəbər verir ki, festivalın məqsədi yerli üzüm və şərab istehsalının təşviqi, şərab məhsullarının ixrac potensialının artırılması, Azərbaycanda üzümçülük və şərab istehsalı tarixinin və bu sahədə görülən işlərin geniş ictimaiyyətə çatdırılmasıdır. Builki festivalın proqramına da üzüm istehsalı və şərabçılıq, ölkənin turizm potensialı ilə bağlı müxtəlif maarifləndirici və əyləncəli tədbirlər daxildir.
Azərbaycanın üzüm sortları – Ağ şanı, Qara şanı, Mədrəsə, Meysəri, Təbrizi və digərləri ölkəmizi nəinki sovet məkanında, bütün dünyada şərabçılıq və üzümçülük ölkəsi kimi məşhurlaşdırmışdı. Ancaq təəssüflər olsun ki, müstəqilliyimizin ilk illərində bu sahə tənəzzülə uğradı. Hazırda bu gün Azərbaycanda üzümçülük yenidən öz inkişaf dövrünü yaşayır. Prezident İlham Əliyev tərəfindən bu sahənin inkişafı ilə bağlı mühüm qərarlar, dövlət proqramları qəbul edilib. Aqrar sahənin digər istiqamətləri kimi, şərabçılığa da dövlət dəstəyi göstərilir, subsidiyalar, güzəştli kreditlər verilir.
Festivalın məkanı kimi Şamaxının seçilməsi heç də təsadüfi deyil. Şamaxı hələ qədimdən poeziyanın, musiqinin vətəni olmaqla yanaşı, həm də üzümçülüyün inkişaf etdiyi bölgələrimizdən biri, üzüm istehsalının paytaxtı kimi məşhurdur.
Şamaxıda üzümçülüyün inkişafı Ulu Öndər Heydər Əliyevin adı ilə bağlıdır. Ötən əsrin 70-80-ci illərində rayonda 37 min hektar üzüm bağı var idi. Məhsuldarlıq ildə 240 min tondan çox idi. Müstəqilliyimizin ilk illərində bu sahə diqqətdən kənarda qaldı, üzüm bağlarının əksəriyyəti məhv oldu. Amma bu gün Prezident İlham Əliyevin rəhbərliyi ilə üzümçülüyün inkişafı yenidən dövlət səviyyəsində dəstəklənir. Hazırda rayonda yeni salınan üzüm bağlarının ərazisi 1,7 min hektardan çoxdur.
Şamaxı Rayon İcra Hakimiyyətinin, "Abqora" restoranı və “Nəsimi bağları” kompleksinin təşkilatçılığı ilə növbəti dəfə təşkil olunan festival da bu regionda şərabçılıq və üzümçülüyün inkişafı üçün çox böyük əhəmiyyət kəsb edir. Meysəri kəndindəki “Şirvan şərabları” MMC-nin üzümçülük və şərabçılıq kompleksinin ərazisində təşkil olunan festivalda müxtəlif şərab brendləri iştirak edir.
Onların sırasında "Şərq ulduzu" Məhdud Məsuliyyətli Cəmiyyətin (MMC) istehsal etdiyi şərablar da var. MMC-nin əməkdaşı Qəhrəman Alrzayev AZƏRTAC-a müsahibəsində bildirib ki, "Şərq ulduzu" 2008-ci ildən Şəmkir rayonunda fəaliyyətə başlayıb. Əsasən meyvə araqları, konyak və sərab istehsalı ilə məşğuluq.
"Şamaxıda Üzüm və Şərab Festivalında artıq dördüncü dəfədir iştirak edirik. Festivalın təşkilindən çox razıyıq. Burada həm məhsullarımızı reklam edirik, həm də müştərilərlə birbaşa təmasda ola bilirik. Builki festivala demək olar ki, bütün məhsullarımızdan gətirmişik. Festivalda bizim məhsullara maraq çox yüksəkdir", - deyə həmsöhbətim bildirib.
Festivalda yerli və xarici istehsalçıların şərab məhsullarının dequstasiyaları təşkil edilir, şərab evlərinin maraqlı hekayələrini izləmək imkanı yaradılır. Bu da yerli sakinlər və turistlərin böyük marağına səbəb olur. Burada ziyarətçilər həm də, bəyəndikləri məhsulları ən sərfəli - zavod qiymətinə əldə edə bilirlər.
Festivalın iştirakçılarından olan "Regional Hüquqi və İqtisadi Maarifləndirmə" İctimai Birliyinin sədri Arzu Bağırova AZƏRTAC-a müsahibəsində bildirib ki, Üzüm və Şərab Festivalı Azərbaycanın kənd təsərrüfatı və turizm potensialının dünyaya təqdimatında mühüm platformadır.
"Bu gün ölkəmizin hər bir bölgəsində Prezident İlham Əliyevin diqqət və qayğısı nəticəsində kənd təsərrüfatının inkişafına, ənənələrin qorunmasına və ixrac potensialının gücləndirilməsinə xidmət edən tədbirlər təşkil olunur. Şamaxıda baş tutan Üzüm və Şərab Festivalı da məhz bu siyasətin bariz nümunəsidir. Festival həm istehsalçıların, həm də sahibkarların üzümçülük və şərabçılıq sahəsində əldə etdiyi nailiyyətlərin ictimaiyyətə tanıdılması üçün geniş imkanlar yaradır. Bununla yanaşı, yerli brendlərin beynəlxalq bazarlara çıxışı baxımından da əhəmiyyətli platforma rolunu oynayır. İlk növbədə, bu festival Şamaxı və ətraf rayonların sosial-iqtisadi inkişafına dəstək verir. Qonaqların və turistlərin axını yerli sahibkarlığın, turizmin, xidmət sektorunun canlanmasına səbəb olur. Digər tərəfdən, festival milli mətbəximizin, musiqimizin, qədim ənənələrimizin tanıdılmasına da geniş şərait yaradır. Bu festivalın artıq dördüncü dəfə keçirilməsi kənd təsərrüfatı siyasətində ardıcıllığın göstəricisidir. Əminəm ki, gələcəkdə də ölkəmizin müxtəlif bölgələrində bu qəbildən möhtəşəm tədbirlər keçiriləcək və Azərbaycanın zəngin kənd təsərrüfatı ənənələri dünya miqyasında tanıdılacaq", - deyə Arzu Bağırova söyləyib.
Üzüm və Şərab Festivalı əyləncə və məhsul bayramı ilə yanaşı, həm də şərab istehsalçılarına yeni işgüzar əlaqələr qurmaq, məhsullarını geniş auditoriyaya tanıtmaq üçün gözəl fürsətdir.
Bu fürsətdən yararlanmaq istəyənlər sırasında Ağsuda fəaliyyət göstərən “Az-Granata” şirə və şərab emalı zavodu da var. “Az-Granata”ın istehsalı olan şərablar da keyfiyyətinə görə qonaqların marağına səbəb olub. “Az-Granata” MMC-nin marketinq üzrə mütəxəssisi Niyazi İslamzadə dəyib ki, şirkət 2011-ci ildə fəaliyyətə başlayıb. "Az-Granata" Cənubi Qafqazın ən böyük içki istehsalçılarından biridir. “Həm alkoqollu, həm də alkoqolsuz məhsullar istehsal edirik. Məhsullarımız həm yerli bazara, həm də xaricə ixrac edirik. Festivalın şirkətimizə müsbət təsiri var. Festivala alkoqollu bütün məhsullarımızdan gətirmişik və onlara böyük maraq var. Hər dəfə bu festivalda iştirakdan sonra bizim məhsulların satışı daha da artır”,-deyə marketinq üzrə mütəxəssis söyləyib.
Festival ərazisində sərgi və məşhur restoranların pavilyonları quraşdırılıb. Ziyarətçilər üçün həm də rəssamların üzümçülük mövzusunda əsərləri sərgilənir.
Festivalda Azərbaycandan və digər ölkələrdən bir sıra sevilən sənətkarlar, qruplar çıxış edirlər.
Festivalın miqyası ildən-ilə genişlənir, bu da onu göstərir ki, Azərbaycan şərabçılığının ənənələri çox qədim və zəngindir. Hazırda Azərbaycan şərabçılığı yeni mərhələni yaşayır. Həmçinin Azərbaycan 20 ölkənin şərabçılıq marşrutunu özündə birləşdirən, Avropa Şurası və Avropa Mədəni Marşrutlar İnstitutu tərəfindən şərab irsi və şərabçılıq turizmini, eləcə də dayanıqlı turizm növlərini təşviq etmək məqsədini yaradılmış “İter Vitis” maddi və qeyri-maddi şərabçılıq mədəni marşrutunun üzvüdür.
Qeyd edək ki, artıq dördüncü dəfədir keçirilən Üzüm və Şərab Festivalına bu gün yekun vurulacaq.
jpg_1757851555.jpg)
