Ötən həftə dünyada ilk dəfə olaraq Pekində həm insanların, həm də robotların iştirak etdikləri yarımarafon keçirilib. 21 km məsafəyə qaçışda minlərlə iştirakçıya 21 ədəd insanabənzər robot da qoşulub. Çində daha əvvəl də robotlar üçün qaçış yarışları təşkil olunsa da, bu, insanlar və robotların birgə qatıldığı ilk marafon olub.
Robotların yarışda iştirak etməsi üçün əsas şərt insanabənzər konstruksiyaya malik olmaq, təkərsiz, iki ayaq üzərində hərəkət edə bilmək idi. İnsanlar birlikdə start götürdüyü halda, robotlar 1 dəqiqəlik fasilələrlə növbə ilə qaçışa başlayıblar. Onlar üçün ayrı zolaq ayrılıb. Yarış zamanı robotları “məşqçi” proqramçılar müşayiət ediblər. Qaydalar həm tam avtonom, həm də uzaqdan əl ilə idarəetməyə icazə verirdi. Qaydalara əsasən, robotlara batareyaları dəyişməyə də icazə verilirdi. Həmçinin, zərurət olduqda robotların özlərini də estafet formatında dəyişmək mümkün idi, lakin hər bir dəyişiklik üçün 10 dəqiqəlik cərimə əlavə olunurdu. Robotlar göstərilən marşrutdan ciddi şəkildə yayınmamalı, bütün texniki qaydalara riayət etməli, qaçış yolunu zədələməməli, rəqib robotlara və insanlara zərər verməməli idilər. Onlar 3 saat 30 dəqiqə yarışıblar.
Marafonda iştirak edən Çinin “DroidVP” və “Noetix Robotics” şirkətlərinin robotları müxtəlif forma və ölçülərdə, bəziləri 120 sm-dən alçaq, bəziləri isə 1.8 metr hündürlükdə olublar. Robotlardan biri qaçışa start xəttində üzü üstə yıxılaraq başlayıb, lakin bir neçə dəqiqə yerində qaldıqdan sonra hərəkətə keçib. Digəri isə bir neçə metr sonra məhəccərə çırpılıb, nəticədə onu müşayiət edən proqramçı da yerə yıxılıb.
Robotlar arasında yarışı birinci olaraq “Tiangong Ultra” robotu başa vurub. O, 2 saat 40 dəqiqə 42 saniyə nəticə göstərərək ən yaxın rəqibinə təxminən 1 saat fərq atıb. Qalib robota mükafatı başqa bir insanabənzər robot təqdim edib. İnsan iştirakçılar arasında kişilər üçün ən yaxşı nəticə 1 saat 2 dəqiqə 36 saniyə, qadınlar üçün isə 1 saat 11 dəqiqə 7 saniyə olub.
Ülkər XASPOLADOVA,
“Azərbaycan”
jpg_1765544597.jpg)
