Qəbiristanlıqlardakı vəziyyətlə bağlı bələdiyyələrə müvafiq tapşırıqlar verilmişdir

"Azərbaycan" qəzetinin 27 aprel 2023-cü il tarixli sayında dərc olunan "Qəbiristanlıqlardakı özbaşınalıqlar" sərlövhəli məqalədə qaldırılmış problemlərə dair müraciətə baxılmışdır.
Azərbaycan Respublikası Nazirlər Kabinetinin 2018-ci il 4 dekabr tarixli 522 nömrəli qərarı ilə yerli icra hakimiyyəti orqanlarına qəbiristanlıqların müvafiq bələdiyyələrə təhvil işinin təmin edilməsi tapşırılmışdır. Tapşırığın icrası istiqamətində işlərin qanunauyğun və vaxtında yerinə yetirilməsinə metodik kömək məqsədilə Ədliyyə Nazirliyinin Bələdiyyələrlə İş Mərkəzi tərəfindən bələdiyyələrə müvafiq tövsiyələr verilmiş və artıq bələdiyyələrin əksəriyyəti tərəfindən qəbiristanlıqlar təhvil alınmışdır. Hazırda bu istiqamətdə işlər davam etdirilməkdədir. 
Bələdiyyələrin müvafiq sahədə işinin səmərəli təşkilinə metodik yardım göstərilməsi məqsədilə "Qəbiristanlıqların salınması və idarə olunması Qaydaları haqqında" və "Qəbiristanlıqların qorunması və saxlanılması sahəsində bələdiyyələrin işinin təşkili barədə" tövsiyələr, eləcə də qəbiristanlıqların salınması və idarə olunması qaydaları haqqında "Yaddaş kitabçası" hazırlanaraq bütün bələdiyyələrə göndərilmişdir. Eyni zamanda müvafiq qanunvericiliyin tələblərinin dərindən mənimsənilməsi üçün "Qəbiristanlıqların saxlanılması, idarə olunması, abadlaşdırılması, köçürülməsi sahəsində bələdiyyələrin hüquq və vəzifələri" mövzusunda seminar-müşavirələr keçirilmişdir.
Qəbiristanlıqlar təhvil alındıqdan ötən müddət ərzində bələdiyyələr tərəfindən onların qorunması, saxlanılması və idarə olunması sahəsində bir çox tədbir görülmüş, o cümlədən abadlaşdırma və təmizlənmə işləri aparılmış, su xətti çəkilmiş və kanalizasiya sistemi qurulmuş, eləcə də müşahidə kameraları quraşdırılmışdır. 
Cari ildə Sabunçu rayonunun Balaxanı qəsəbəsindəki qəbiristanlıqda baş verən vandallıq ilə bağlı Balaxanı bələdiyyəsi tərəfindən aidiyyəti hüquq-mühafizə orqanlarına müraciət edilmiş və əməli törədən şəxs müəyyən edilərək barəsində cinayət işi açılmışdır. 
Bu sahədə maarifləndirici tədbirlərin davamı olaraq cari ildə mərkəz tərəfindən Bakı şəhəri üzrə bələdiyyələr, o cümlədən Sumqayıt və Xırdalan bələdiyyələrinin iştirakı ilə müşavirə keçirilərək qəbiristanlıqların müdiriyyətinin təşkili və qəbiristanlıqların qorunması ilə bağlı vəzifələrinin icrası üzrə görülən işlər müzakirə edilmiş, rastlaşdıqları problemlərin həlli istiqamətində tövsiyələr verilmişdir.
Bununla yanaşı, qəbiristanlıqlarda təmizliyə riayət edilməsi və abadlıq işlərinin aparılması ilə bağlı tədbirlərin genişləndirilməsinin, mövcud problemlərin aradan qaldırılmasının, eyni zamanda bu sahədə əhaliyə göstərilən xidmətin keyfiyyətinin artırılmasının vacibliyi diqqətə çatdırılmışdır. 

Emin HƏSƏNOV,
Ədliyyə Nazirliyi Bələdiyyələrlə İş Mərkəzi rəisinin müavini