Heydər Əliyev Fondunun təşəbbüsü və təşkilatçılığı, Mədəniyyət Nazirliyi, Üzeyir Hacıbəyli adına Bakı Musiqi Akademiyası və “Gilan”ın dəstəyi ilə XV Qəbələ Beynəlxalq Musiqi Festivalı uğurla davam edir. Mədəniyyətlərarası dialoqun mühüm platformasına çevrilən, müxtəlif ölkələrin, fərqli mədəniyyətlərin ən parlaq təmsilçilərinin Azərbaycanın bu qədim bölgəsində bir araya gələrək ifalarını təqdim etməsi artıq ənənə halını alıb.
AZƏRTAC xəbər verir ki, festivalın növbəti günündə Qəbələ Konqres Mərkəzində “Kamera musiqisi axşamı” təşkil olunub. Avstriya və Vyetnamdan gələn tanınmış pianoçuların çıxışı tamaşaçılar tərəfindən alqışlarla qarşılanıb.
Avstriyalı pianoçu Aleksandr Maria Vaqner və Vyetnamda klassik musiqi və piano sənətinin tanınmış simalarından biri olan Luong To Nhu “Kamera musiqi axşamı”nda K.Debüssinin “Sevinc adası”, F.Şubertin “Dörd əl piano üçün Fantaziya f-moll, op.103”, A.M.Vaqnerin “Mohn” beş miniatür, A.Skryabinin “Fantaziya b-moll, op.28” və T.Quliyevin “Cəmilənin albomu” piano silsiləsi əsərlərini səsləndirib.
Fransamənşəli, Vyetnamda klassik musiqi və piano sənətinin tanınmış simalarından biri olan Luong To Nhu AZƏRTAC-ın bölgə müxbiri ilə söhbətində Qəbələ Beynəlxalq Musiqi Festivalına ilk dəfə qatıldığını və Azərbaycanla tanışlıqdan məmnunluğunu ifadə edib. Gənc olmasına baxmayaraq yetərincə tanınan Luong To Nhu dünyanın tanınan bəstəkar və musiqiçilərindən dərs alıb, bir sıra beynəlxalq müsabiqə və festivallarda iştirak edib. Qəbələ səhnəsində yer almağın onun gələcək taleyində mühüm rol oynayacağını deyən gənc pianoçu ölkəmizdən, qonaqpərvər insanların xoş rəftarından məmnun qaldığını, gələcəkdə də Azərbaycana gəlmək üçün çalışacağını bildirib.
Avstriyalı pianoçu Aleksandr Maria Vaqner də həmkarının bir çox fikirlərini bölüşür. O bildirir ki, Azərbaycanın bir çox bəstəkarlarının əsərlərini dinləyib. Hətta Tofiq Quliyevin əsərlərindən birini repertuarına daxil edib. Pianoçu bu istiqamətdə fəaliyyətini genişləndirməyi, daha bir neçə dünyaşöhrətli bəstəkarın əsərlərinə müraciət etmək istədiyini söyləyib.
Xatırladaq ki, gecənin daha bir özəlliyi – “Dünya kinofilmlərindən sevilən musiqi parçaları” adlı konsert proqramı təqdim olunacaq. Mustafa Mehmandarovun bədii rəhbərliyi və baş dirijorluğu ilə “Scorrendo” orkestri “Axırıncı aşırım”, “Yeddi oğul istərəm”, “Xaç atası”, “Görüş”, “Cangüdən“, “Şindlerin siyahısı”, “Ceyms Bond” və digər filmlərdən musiqi əsərlərini səsləndirəcək.
