Ölkəmizdə əhalinin etibarlı ərzaq təminatı dövlətin iqtisadi siyasətinin başlıca istiqamətlərindən birini təşkil edir. Kənd təsərrüfatının əsasını təşkil edən taxılçılıq bu sahədə mühüm yer tutur.
Çünki taxılçılıq həm əhalinin çörək və çörək məmulatlarına olan tələbatını ödəyir, həm də heyvandarlığın qüvvəli və qaba yemə olan təlabatının ödənilməsində böyük rol oynayır.
Dövlət başçısının taxılçılığın inkişaf etdirilməsi ilə bağlı qarşıya qoyduğu vəzifələr, verdiyi tapşırıq və tövsiyələrə Qazax rayonunda da əməl edilir. Hər cür dövlət dəstəyini hiss edən fermerlər bu vacib ərzaq məhsulunın istehsalını ildən-ilə artırmaq üçün bütün imkanlardan maksimum istifadə edirlər.
2025-ci ilin məhsulu üçün payızlıq və yazlıq olmaqla, rayonda 11480 hektar sahədə taxıl əkilmişdir ki, bunun da 6835 hektarı arpa, 4645 hektarı buğda sahələridir. Artıq bir neçə gündür ki, rayonda arpa biçini aparılır. Aqrotexniki tədbirlərin vaxtında və keyfiyyətlə həyata keçirilməsi hesabına zəmilərdə bol məhsul yetişmişdir. Biçinin mütəşəkkil keçirilməsi və optimal müddətdə başa çatdırılması, eləcə də biçin zamanı təhlükəsizlik tədbirlərinə əməl edilməsi indi fermerlərin qarşısında duran əsas məsələlərdəndir. Hazırda Kəmərli, Qaymaqlı, Aslanbəyli, Birinci Şıxlı, İkinci Şıxlı, Yuxarı Salahlı, Orta Salahlı, Aşağı Salahlı, Daş Salahlı, Alpout, Ağköynək, Xanlıqlar kəndlərində biçin gedir. Əldə olunan son məlumata görə, 6835 hektar arpa sahəsinin 1382,6 hektarında biçin aparılmışdır. Biçinə 15 kombayn cəlb edilmişdir.
Sabir ƏLİYEV,
"Azərbaycan"
jpg_1776435425.jpg)
jpg_1775472819.jpg)
