Özəl klinikalarda onkoloji xəstələrin müalicə imkanlarının genişləndirilməsi gözlənilir
Xəbər verildiyi kimi, parlamentin yaz sessiyasının ilk iclasında "Əhalinin sağlamlığının qorunması haqqında" və "Onkoloji yardım haqqında" qanunlarda dəyişiklik edilməsi barədə layihə (birinci oxunuş) müzakirə olunub.
Milli Məclisin Səhiyyə komitəsinin sədri Əhliman Əmiraslanov qanun layihəsini təqdim edərək diqqətə çatdırıb ki, müvafiq qanunvericiliyə əsasən onkoloji xidmət yalnız onkoloji xidmət göstərilməsi üçün ixtisaslaşmış dövlət müəssisələri tərəfindən həyata keçirilir. Təklif edilən dəyişikliklərdə isə onkoloji xəstələrə göstərilən tibbi yardımın dövlət onkoloji tibb müəssissələri ilə yanaşı, özəl tibb müəssisələri tərəfindən də həyata keçirilməsi ehtiva olunur.
Ə.Əmiraslanov daha sonra qeyd edib ki, bu gün Azərbaycanda onkoloji xəstələrə keyfiyyətli tibbi xidmət göstərə biləcək özəl müəssisələrin sayı çox azdır. "Bu qanunun qəbulu o demək deyil ki, bütün özəl tibb müəssisələri onkoloji xəstələrə tibbi yardım göstərəcək. Bununla bağlı özəl klinikalarda monitorinqlər aparılacaq. Artıq müvafiq icra hakimiyyəti orqanları ilə əlaqə saxlanılıb, danışıqlar aparılıb. Monitorinqdən sonra hansı özəl klinikanın maddi-texniki bazası, kadr potensialı onkoloji xəstələrə keyfiyyətli tibbi yardım göstərə biləcəksə, klinik protokollara uyğun yardım həyata keçiriləcəksə, o xəstəxanalara da lisenziya veriləcək. Bunların hesabatlılığı isə Dövlət Onkoloji Tibb Müəssisələrinin qarşısında olacaq. Onkoloji Elmi Mərkəz bütövlükdə əhaliyə göstərilən onkoloji xidmətə cavabdeh olan bir orqandır və bütün statistika, hesabatlar dövlət tibb müəssisələrindəki kimi özəl tibb müəssisələrindən də onkoloji xəstəxanalara veriləcək. Bu məsələyə son dərəcədə ciddi yanaşılmalıdır. Hansı özəl xəstəxananın buna imkanı varsa, o da həmin tibbi xidməti göstərəcək", - deyə o bildirib.
Qeyd edək ki, müzakirəyə çıxarılan qanunvericilik dəyişiklikləri onkoloji yardımın göstərilməsi sahəsində yeni yanaşmaların tətbiqini nəzərdə tutur.
Mövzu ilə bağlı Milli Məclisin Səhiyyə komitəsinin üzvü Müşfiq Məmmədli "Azərbaycan" qəzetinə açıqlamasında bildirib ki, onkoloji yardımın həyata keçirilməsi özəl tibb müəssisələrində yalnız Səhiyyə Nazirliyi tərəfindən müəyyən edilmiş standartlara cavab verən müəssisələr üçün mümkündür. Bu standartlara uyğunluq təsdiq edildikdən sonra həmin müəssisələr müvafiq qaydada lisenziyalaşdırılır və onkoloji xidmət göstərmək üçün xüsusi lisenziyaya malik olmalıdırlar. Sözügedən lisenziyada onkoloji xidmətin göstərilməsinə ayrıca icazə verilməlidir.
Deputat qeyd edib ki, ümumilikdə tibb fəaliyyəti lisenziyalaşdırılan sahədir və onun tərkibində onkoloji xidmətlərin göstərilməsi üçün xüsusi meyarlara cavab vermək tələb olunur. Yalnız bu meyarlara uyğun olan tibb müəssisələri onkoloji xidmət göstərə bilər. Bu məsələlər mövcud qanunvericilikdə öz əksini tapıb.
M.Məmmədli diqqətə çatdırıb ki, hazırda onkoloji xəstələrə yardım, əsasən, dövlət proqramı çərçivəsində dövlət tibb müəssisələrində həyata keçirilir. Dövlət proqramı ilə nəzərdə tutulan müalicə sistemləri yalnız dövlət müəssisələri tərəfindən icra olunur. Onkoloji xidmətlər icbari tibbi sığortanın əsas Xidmətlər Zərfinə daxil deyil. Yalnız bəzi müayinə və diaqnostik metodlar icbari tibbi sığorta çərçivəsində təmin edilir.
Deputat əlavə edib ki, özəl klinikaların onkoloji xidmət göstərməsi üçün cavab verməli olduğu meyarlar qanunvericilikdə qismən əks olunub. Belə ki, bu sahədə fəaliyyət göstərmək üçün müasir tibbi-texniki tələblərə cavab verən avadanlıqlar, diaqnostik tədbirlərin aparılması üçün uyğun infrastruktur, eləcə də kifayət qədər ixtisaslı kadr, elmi potensial və orta tibb işçiləri mövcud olmalıdır. Konkret və detallı meyarlar isə qanun qüvvəyə mindikdən sonra Səhiyyə Nazirliyi tərəfindən hazırlanacaq müvafiq təlimat və qaydalarda əksini tapacaq. Çünki qanunvericilik ümumi müddəaları müəyyən edir, detallı tənzimləmələr isə icraedici normativ sənədlərlə həyata keçirilir.
"Qanunun qəbulu ilə onkoloji yardımın göstərilməsində çeşidlilik artırılır. Strateji məqsəd gələcəkdə bütün tibbi xidmətlərin icbari tibbi sığorta ilə əhatə olunmasıdır. Hazırda dövlət tibb müəssisələri məhdud sayda və spesifik xidmətlər göstərdiyi üçün ciddi xəstə yükü mövcuddur. Ödənişli müalicə almaq istəyən vətəndaşların özəl sektora müraciət etməsi dövlət müəssisələrinin yükünün azalmasına xidmət edəcək. Bununla belə, bütün proseslər, prosedurlar və müalicə protokolları Səhiyyə Nazirliyinin, eləcə də müvafiq ixtisaslaşmış onkoloji mərkəzlərin tibbi və elmi tövsiyələri çərçivəsində həyata keçiriləcək", - deyə Müşfiq Məmmədli əlavə edib.
Təhminə VERDİYEVA,
"Azərbaycan"
