Prezident
İlham Əliyevin qlobal miqyaslı təşəbbüsləri ilə açıq dənizə çıxışı olmayan Azərbaycan
ölkələri birləşdirir
Əlverişli
coğrafi mövqeyindən yararlanaraq Avrasiya məkanının mühüm nəqliyyat-tranzit qovşaqlarından
birinə çevrilən Azərbaycan həm də Cənubi Qafqazın geoiqtisadi, logistik mərkəzi
kimi qəbul edilir.
Əlbəttə ki,
müxtəlif ölkələri birləşdirən nəqliyyat layihəsinin təməlində geosiyasət dayanır
və bu layihələr siyasi vəziyyətə təsir edir, sabitliyin təminatına töhfə verir.
Şərqdən Qərbə və Şimaldan Cənuba uzanan yolun üzərində yerləşən Azərbaycan isə bu
imkanından istifadə etməklə qitələri və ölkələri birləşdirir. Yəni artıq nəqliyyat-logistika
aspektində Azərbaycan regionun mərkəzi qovşağına
çevrilib. Ölkəmizin ərazisindən keçən "Şərq-Qərb”, "Şimal-Cənub” və "Cənub-Qərb”
beynəlxalq nəqliyyat dəhlizləri Azərbaycanın logistik mərkəzə çevrilməsi üçün real
imkanlar yaradır.
Azərbaycanın Avrasiyanın əhəmiyyətli nəqliyyat-logistika mərkəzlərindən
birinə çevrilməsinə yönəlmiş irimiqyaslı infrastruktur layihələri, ən yeni texnoloji
standartlar səviyyəsində Gəmiqayırma Zavodunun istifadəyə verilməsi, 2017-ci ildə
Bakı-Tbilisi-Qars dəmir yolunun açılışı və 2018-ci ildə Xəzərdə ən böyük Bakı Beynəlxalq
Dəniz Ticarət Limanının istifadəyə verilməsi son illər Azərbaycanda bu istiqamətdə
məqsədyönlü strateji planın uğurla reallaşdırılmasının bariz nümunəsidir. İpək yolu
üzərində geniş iqtisadi zolağın yaradılmasının fəal dəstəkçisi olan Azərbaycan müxtəlif
istiqamətlərə tranzit daşımalarının səmərəli təşkilinə də etibarlı təminat verir.
3 il öncə
hazırlanan logistika və ticarətin inkişafına
dair Strateji Yol Xəritəsində də bütün bunların reallaşması üçün hədəflər müəyyənləşib.
"Azərbaycan Respublikasında logistika və ticarətin inkişafına dair Strateji Yol
Xəritəsi” 2020-2025-ci illər və 2025-ci ildən sonrakı dövr üçün qısa, orta və uzunmüddətli
perspektiv istiqamətləri müəyyən edir. Sənəddə logistika üzrə inkişaf perspektivini
özündə əks etdirən strateji məqsəd və hədəflər konkret ifadəsini tapıb. Eyni zamanda
həmin məqsəd və hədəflərə çatmaq üçün prioritetlər müəyyənləşdirilib. Daha konkret
səviyyədə əsas və digər icraçıların, icra müddətlərinin, nəticə indikatorlarının
əks olunduğu təfsilatlı tədbirlər planı hazırlanıb.
Nəqliyyat-tranzit
imkanlarının genişləndirilməsi qarşıya qoyulan ən ümdə hədəflərdən biridir. Onu
da əlavə edək ki, bu gün Azərbaycan dəmir yolu infrastrukturunun müasirləşdirilməsinə
sərmayə yatırır. Çindən Avropaya və geriyə yükdaşımalar üçün ən qısa nəqliyyat marşrutu
olan, Asiya və Avropanı birləşdirən Bakı-Tbilisi-Qars dəmiryol xətti bunun əyani
sübutudur.
Cənab İlham
Əliyev bu istiqamətdə reallaşdırılan layihələri dəyərləndirərkən bildirib: "Coğrafi
yerləşməmizdən istifadə edərək biz ölkəmizin infrastruktur və nəqliyyat sektoruna
sərmayə yatırdıq və bununla da Azərbaycanı beynəlxalq nəqliyyat mərkəzlərinin birinə
çevirdik. Bizim ölkə tarixi İpək yolu üzərində yerləşir. Müasir infrastrukturun
yaradılması bizim əsas hədəflərimizdəndir. Biz əsas sərmayəni yolların, avtomagistralların
və hava limanlarının inşasına yönəldirik. Şərq-Qərb və Şimal-Cənub nəqliyyat dəhlizləri
ölkəmizin ərazisindən keçir. Azərbaycan hər iki layihədə fəal iştirak edir və bu
istiqamətdə bir sıra təşəbbüs irəli sürüb”.
Ölkənin tranzit
potensialının reallaşdırılması Prezident İlham Əliyevin iqtisadi şaxələndirmə siyasətində
mühüm yer tutur. Son 16 ildə etibarlı nəqliyyat dəhlizinin yaradılması istiqamətində
həyata keçirilən layihələrə nəzər yetirsək bunu aydın şəkildə görərik.
Bu gün mövcud
nəqliyyat-tranzit imkanları Azərbaycana iqtisadi dividendlər qazandırmaqdadır. Təkcə
bu ilin 6 ayında ölkə ərazisindən 4,1 milyon ton tranzit yük daşınıb. İqtisadiyyat
Nazirliyində keçirilən geniş kollegiya iclasında nazir, Tranzit Yükdaşımalar üzrə
Koordinasiya Şurasının sədri Şahin Mustafayev vurğulayıb ki, bu ilin birinci yarısında da ölkənin nəqliyyat-tranzit
imkanlarının genişləndirilməsi istiqamətində tədbirlər davam etdirilib.
Bu dövr ərzində
"Şimal-Cənub” nəqliyyat dəhlizi ilə daşınan yüklərin həcmində 63 faiz artım müşahidə
olunub, 131 min ton yük daşınıb. "Şimal-Qərb” və "Şərq-Qərb” nəqliyyat dəhlizləri
üzrə daşınan yüklərin həcmində də əhəmiyyətli dərəcədə artım qeydə alınıb. Belə
ki, 6 ayda "Şimal-Qərb” nəqliyyat dəhlizi ilə daşınan ümumi tranzit yükün həcmi
70 faiz artaraq 829 min ton təşkil edib. "Şərq-Qərb” nəqliyyat dəhlizi ilə daşınan
qeyri-neft məhsullarının həcmi isə 42,8 faiz artaraq 795 min ton olub.
Bu il aprelin
25-27-də Çin Xalq Respublikasının paytaxtı Pekində keçirilən "Bir kəmər, bir yol”
II Beynəlxalq Əməkdaşlıq Forumunda çıxış edən Prezident İlham Əliyev Azərbaycanın
nəqliyyat-tranzit imkanları və bu istiqamətdə reallaşdırılan layihələri dəyərləndirərkən
vurğulamışdır ki, Azərbaycan dövləti müasir nəqliyyat və logistika infrastrukturu
yaratmaqla yalnız ölkəni mühüm nəqliyyat mərkəzinə çevirməyib, eyni zamanda, "Şərq-Qərb”
və "Şimal-Cənub” dəhlizləri layihələrində iştirak edən dövlətlər arasında əməkdaşlığa
töhfə verib: "Beynəlxalq nəqliyyat layihələri ölkələr və xalqlar arasında əməkdaşlığın
möhkəmləndirilməsinə xidmət edir. "Bir kəmər, bir yol” təşəbbüsü nəqliyyat sahəsində
yeni imkanlar açmaqla yanaşı, ticarəti, turizmi, xalqlar arasında təmasları təşviq
edir və Avrasiya məkanında sabitliyin, təhlükəsizliyin və sülhün bərqərar olması
işinə xidmət göstərir”.
Çinin "Bir
kəmər, bir yol” təşəbbüsünü lap əvvəldən
dəstəklədiyini söyləyən cənab İlham Əliyev vurğulayıb ki, bu layihə yalnız nəqliyyat
bağlılığını təmin etmir, həmçinin müxtəlif ölkələr arasında əlaqələri gücləndirir,
dialoq və əməkdaşlığın möhkəmləndirilməsi işinə xidmət edir və beynəlxalq ticarət
üçün yeni imkanlar yaradır.
Xatırladaq
ki, Azərbaycan və Çin "İpək Yolu İqtisadi Kəməri”nin yaradılmasının birgə təşviqinə
dair Anlaşma Memorandumu imzalayıb və müasir nəqliyyat infrastrukturunun yaradılması
Azərbaycanın prioritetləri sırasındadır.
Prezident
İlham Əliyevin təşəbbüsü ilə gerçəkləşən beynəlxalq layihələr regional əməkdaşlığın
genişləndirilməsi üçün möhkəm əsaslar yaradıb. Lakin işğalçı Ermənistanla heç bir
əməkdaşlıqdan söhbət gedə bilməz. Azərbaycanın ərazisindən keçən bütün beynəlxalq
layihələrdən Ermənistan təcrid edilib. Bu siyasət münaqişə davam etdiyi müddətdə
dəyişməyəcək, işğalçı ölkə çox ağır durumda qalacaq.
Rəşad BAXŞƏLİYEV,
"Azərbaycan”
jpg_1779374776.jpg)
