Qadın hərəkətverici qüvvədir

Hər bir dövlətin, xalqın inkişafında əsas hərəkətverici qüvvələrdən biri qadındır. Əsrlər boyu Azərbaycan qadını milli kimliyini qorunub saxlanılması nəsildən-nəsilə ötürülməsi, milli dəyərlər sisteminin yaradılmasında müstəsna rol oynayıb. Azərbaycan qadının istər torpaqlarımızın müdafiəsində, milli dövlətşiliyin formalaşmasında və idarə olunmasında, istərsə də xalqımıza məxsus dəyərlər sisteminin yaradılmasında misilsiz xidmətləri var. Azərbaycanda qadınlarla bağlı hüquqi bazanın təkmilləşdirilməsi, bərabər hüquqların təmin edilməsi üçün Azərbaycan Respublikasının Birinci vitse-prezidenti Mehriban Əliyeva öz geniş fəaliyyəti ilə həm ölkədə, həm də beynəlxalq aləmdə Azərbaycan qadının nüfuzunu daha da yüksəklərə qaldırır. Yüksək mənəviyyat və humanizm ideallarına sadiqlik çoxəsrlik tariximizdən süzüb gələn Azərbaycan qadınına xas ən ali keyfiyyətlərdir. Birinci xanım Mehriban Əliyeva də öz əməlləri ilə bu ali dəyərləri yaşadır. 
Azərbaycanda qadın hüquqlarının qorunması, təbliğ olunması, qadınların dövlət siyasətinin həyata keçirilməsində və qanunların qəbul edilməsində iştirakının artırılması dövlət siyasətinin ayrılmaz tərkib hissəsidir.
Qadınlarla bağlı məsələlərin həlli üçün bir çox qanunların qəbul olunması, fərman və sərəncamların imzalanması, beynəlxalq təşkilatlara üzv olaraq mühüm sənədlərin ölkəmizdə tətbiq olunması qadın hüquqlarının reallaşması və təminatı istiqamətində inkişafın əldə olunmasına təkan verib.
Azərbaycan 1995-ci ildə “Qadınlara qarşı ayrı-seçkiliyin bütün formalarının ləğv olunması haqqında” BMT Konvensiyasını, həmçinin Beynəlxalq Əmək Təşkilatının (BƏT) qadın əməyi sahəsində qəbul etdiyi “Yeraltı işlərdə qadın əməyinin tətbiqi haqqında”, “Bərabər əməyə görə kişilərə və qadınlara bərabər haqq verilməsi haqqında”, “Analığın mühafizəsi haqqında”, “Əmək və məşğulluq sahəsində ayrı-seçkilik haqqında” və “Ərdə olan qadının vətəndaşlığı haqqında” Konvensiyalarını qəbul edib.
Dövlət qadın siyasəti bu gün Prezident İlham Əliyev tərəfindən yeni meyarlarla zənginləşdirilərək yüksək səviyyədə davam etdirilir. Gender bərabərliyinin təmin edilməsi ilə bağlı sosial sifarişlərə uyğun olaraq milli qanunvericiliyin təkmilləşdirilməsi, yeni normativ aktların qəbul edilməsi, gender bərabərliyi mədəniyyətinin təbliği prosesi aparılır.
Məhz görülən işlərin, qanunvericiliyin təkmilləşdirilməsi Azərbaycanda bu sahədə müsbət nəticələr əldə olunub.
Gender bərabərliyinin təmin olunması istiqamətində həyata keçirilən tədbirlərin davamlılığının təmin edilməsi üçün “Azərbaycan Respublikasında Gender Bərabərliyi üzrə 2022-2025-ci illər Milli Fəaliyyət Planı”nının layihəsi hazırlanıb.
Gender bərabərliyinin təmin edilməsinə ciddi əngəl yaradan amillərdən biri də məişət zorakılığının qarşısının alınmasıdır. Bu məqsədlə "Azərbaycan Respublikasında məişət zorakılığı ilə mübarizəyə dair 2020–2023-cü illər üçün Milli Fəaliyyət Plan"ı icra olunur.
Görülən işlərin nəticəsi olaraq Azərbaycanda məişət zorakılığı ilə mübarizə sahəsində normativ hüquqi baza beynəlxalq təcrübəyə uyğunlaşdırılır. Bu istiqamətdə maarifləndirici tədbirlərin sayı artırılıb, məişət zorakılığından əziyyət çəkmiş şəxslərin aşkarlanaraq onlara tez bir zamanda yardımların göstərilməsi təmin olunur.
Azərbaycan qanun vericiliyinə görə, cinsi mənsubiyyətə görə ayrı-seçkilik qadağandır. Ölkədə gender bərabərliyi mədəniyyətinin təbliği istiqamətində də əsaslı işlər görülür. Azərbaycan Respublikasının "Gender bərabərliyinin təminatları haqqında" qanunda da bu məsələ öz əksini tapıb. Bu istiqamətdə müxtəlif dövlət qurumlarl tərəfindən layihələr və tədbirlər, seminarlar, təlimlər, maarifləndirmə işləri aparılır.
Azərbaycanda eyni zamanda qadın sahibkarlığın inkişafı üçün də əməlli addımlar atılır. Görülən işlərin son illərdə nəticəsi olaraq qadın sahibkarıların sayı əhəmiyyətli dərəcədə artıb. Azərbaycanın iqtisadi potensialının artırılmasında qadın sahibkarların böyük rolu var. Müasir iqtisadiyyatda qadın sahibkarlığı kiçik və orta sahibkarlığın daha dinamik hissəsini təşkil edir.

Sevil Mikayılova,
Milli Məclisin deputatı