Fevralın 17-si Psixologiya Elmi-Tədqiqat İnstitutu üçün əlamətdar olub. Belə ki, institutun Əlavə təhsil və innovasiyalar şöbəsində psixologiya ixtisası üzrə yenidənhazırlanma təhsili almış tələbələrə Elm və Təhsil Nazirliyi tərəfindən rəsmi təsdiq olunmuş diplomların təqdimatı ilə bağlı tədbir keçirilib.
Təqdimatda Psixologiya Elmi-Tədqiqat İnstitutunun sədri, f.ü.f.d. Elnur Rüstəmov, Azərbaycan Dövlət Pedaqoji Universitetinin Ümumi psixologiya kafedrasının müdiri, p.ü.e.d., prof. Ramiz Əliyev, institutun Ümumi və eksperimental psixologiya şöbəsinin müdiri, p.ü.f.d., dos. Məhərrəm Əliyev, Əlavə təhsil və innovasiyalar şöbəsinin müdiri, psixoloq Ülviyyə Nəhmətova və Ümumi şöbənin müdiri Aynur Kərimova, həmçinin institutun digər mütəxəsissləri, məzun olan tələbələr iştirak ediblər.
Tədbiri açan sədr Elnur Rüstəmov bu günün əlamətdar tarix olduğunu vurğulayaraq bu münasibətlə institutun əməkdaşlarını və tələbələri təbrik edib. Göstərdikləri etimada görə Elm və Təhsil Nazirliyinə, mütəxəssislərə və tələbələrə öz təşəkkürünü bildirib.
Sədr əlavə təhsil (yenidənhazırlanma) proqramı üzrə təhsil almış tələbələrdən institutun elmi-tədqiqat işlərində məlumatların toplanılması və təhlil edilməsi prosesində, Psixoloji Xidmət və Reabilitasiya Mərkəzində və digər mərkəzlərdə psixoloq kimi fəaliyyət göstərənlərin olduğunu da diqqətə çatdırıb.
E.Rüstəmov institutun elmi-tədqiqat işlərindən, müəssisənin təşkil etdiyi və əlavə təhsilə aid olan ixtisasartırma kurslarından və simpoziumlarından bəhs edib.
Daha sonra Azərbaycan Dövlət Pedaqoji Universitetinin Ümumi psixologiya kafedrasının müdiri, p.ü.e.d., prof. Ramiz Əliyev sədr Elnur Rüstəmovu, mütəxəssisləri və İnstitutun ilk tələbələrini təbrik edib. Prof. Ramiz Əliyev İnstitutun gördüyü işləri, apardığı tədqiqatları müsbət dəyərləndirib. Bu sahədə Psixologiya Elmi-Tədqiqat İnstitutunun aparıcı müəssisə olduğunu vurğulayaraq uğurlar arzulayıb.
Professor R. Əliyev bu tarixi anın yaşanmasında onun da əməyi olduğu üçün çox şad olduğunu bildirib.
Yenidənhazırlanma təhsilinin təşkilində yaxından iştirak etmiş
Ümumi və eksperimental psixologiya şöbəsinin müdiri, p.ü.f.d., dos. Məhərrəm Əliyev isə çıxışında tədrisin keyfiyyətlə keçirildiyini bildirib, qeyd edib ki, tələbələr tədris prosesində aktivlikləri ilə xüsusi seçilirdilər.
Əlavə təhsil və innovasiyalar şöbəsinin müdiri, psixoloq Ülviyyə Nəhmətova iş bu işin həyata keçirilməsinin ona tapşırılmasına görə rəhbərliyə minnətdarlığını bildirib, söyləyib ki, yenidənhazırlanma təhsili almış tələbələr tədris prosesində həm şəxsi inkişaf, həm də peşəkar təcrübə üçün fürsət qazandılar. Buradan öyrəndikləri bilik və təcrübəni öz fəaliyyətlərində tətbiq edərək uğur əldə etmələri çox sevindiricidir. Şöbə müdiri həmçinin tələbələri diplom almaları münasibətilə təbrik edib, gələcək fəaliyyətlərində uğurlar arzulayıb.
Sədr təqdimatda iştiraklarına görə başda prof. Ramiz Əliyev olmaqla bütün mütəxəssislərə təşəkkürünü bildirib.
Sonra əlavə təhsil (yenidənhazırlanma) proqramında təhsil almış tələbələr başda sədr Elnur Rüstəmov olmaqla bütün müəllimlərinə öz təşəkkürlərini ifadə ediblər.
Tədbirin yekununda tələbələrə diplomlar təqdim olunub və xatirə şəkli çəkdirilib.
