Ermənistanda revanşistlər yenidən fəallaşıb
Ermənistanda siyasi müstəvidə müşahidə edilən qütbləşmə getdikcə dərinləşməkdə, bu kontekstdə iqtidar və müxalifət arasında münasibətlər tam gərginləşməkdədir. Tərəflərin biri-birlərinə qarşı kompromat xarakterli hücumlarının artması, gözdənsalma kampaniyasını genişləndirmələri vəziyyəti daha kritik həddə çatdırır. İndi həm hakimiyyət, həm də revanşistlər 2026-cı ilin parlament seçkilərinə hazırlaşırlar. Belə bir gərgin vəziyyət isə qarşıdakı dövrdə Ermənistanda xaosun qaçılmaz olduğunu deməyə əsas verir.
Artıq kilsə və revanşistlər yenidən fəallaşıb. Onlar açıq şəkildə Paşinyan hakimiyyətinə qarşı mübarizəyə başlayıblar. Ölkənin ikinci böyük şəhəri Gümrüdə keçirilən yerli seçkilərdəki nəticə də revanşistləri bir qədər ruhlandırıb. Paşinyana gəldikdə, isə hələlik o, mövqeyini qoruyub saxlamaqdadır. Amma Qərbdən, xüsusən də ABŞ-dən gələn yardımların kəsilməsindən sonra Paşinyanın da vəziyyəti ağırlaşıb. O, revanşistlərdən çəkindiyindən yenə də bir sıra məsələlərdə qəti addımlar atmaq istəmir.
Bütün bunlar azmış kimi Ermənistanda baş nazir Nikol Paşinyanın impiçmenti tələb olunur. "Biz yatmırıq" vətəndaş hərəkatının təşəbbüskarları Edqar Kazaryan və Narek Malyan Paşinyana etimadsızlıq təşəbbüsü ilə çıxış edərək parlamentin deputatlarına məktublar göndəriblər.
E.Kazaryan parlamentdə baş nazir Paşinyana etimadsızlığın ifadəsi olan impiçment prosesinin uğurlu olacağına əminliyini bildirib: "Məndə belə təəssürat yaranıb ki, impiçmentin əleyhinə olanlar onun uğursuzluğundan deyil, uğurundan narahatdırlar. Bu proses mütləq müvəffəqiyyətlə başa çatacaq - bütün rəqibləri məğlub etməklə. Heç kim öz xırda ambisiyalarını, maraqlarını rəhbər tutaraq xalqın iradə və istəyi qarşısında müqavimət göstərə bilməz. Xalq isə Nikol Paşinyanın istefasını istəyir".
Ermənistan parlamentinin keçmiş deputatı Ruben Hakopyan isə öz "Facebook" səhifəsində yazıb ki, bu günlərdə müxalifət meydanında açıq seçki kampaniyası gedir, bunun kulminasiya nöqtəsi hazırda Nikolun impiçmenti təşəbbüsüdür. Onun sözlərinə görə, indiki məqamda impiçmentin reallığa çevrilmək şansı demək olar ki, yoxdur: "Edqar Kazaryanın səmimiliyinə şübhə etmədən, düşünürəm ki, o da əmindir ki, indiki məqamda bunun reallığa çevrilmək şansı demək olar yoxdur. Söhbət ondan getmir ki, baş nazirliyə namizəd yoxdur. Ancaq mən həm də düşünmürəm ki, təşəbbüsün praktiki qeyri-reallığına görə baş nazirliyə namizəd kimi hansısa ictimai xadim bu təşəbbüsdə iştiraka razı olar. Əgər impiçment uğursuzluğa düçar olarsa, bu, parlament müxalifətinin onsuz da kifayət qədər aşağı olan reytinqinə təsir edəcək və bu, hazırkı baş nazirin mövqelərinin möhkəmlənməsinə birbaşa töhfə verəcək", - deyə Hakopyan qeyd edib.
Bütün bunların fonunda erməni diasporu ilə Hayastan hakimiyyəti arasında fikir ayrılıqları, qarşılıqlı narazılıqlar artır. Diaspor yalnız hakim dairələrin, bir qrup məmurun faydalandığını əsas gətirərək yardımını azaldıb. Bu yardımların azalması, bəzən isə dayanması ölkədə iqtisadi vəziyyəti də pisləşdirir. Məlumatlara görə, Rusiya KİV-ində Paşinyan əleyhinə yer alan məqalələrin sifarişçisi də erməni diasporudur. Diasporun dəstəyinin itirilməsi isə Paşinyanın hakimiyyətdəki mövqeyini sürətlə laxladır. Bu da Paşinyan iqtidarı üçün əsas zərbələrdən biri hesab olunur. Məhz bu səbəbdən müxalifət Paşinyan rejimini yıxmaq üçün əlavə imkanlar qazanır.
Beləliklə, Ermənistanda hazırda baş verənlər bu ölkəni sürətlə hərtərəfli iflasa doğru aparır. Çünki İrəvan xarici himayədarları olmadan yaşaya bilmək iqtidarında olan ölkə deyil.
Elçin CƏFƏROV,
"Azərbaycan"
