Neftçalada rayon icra hakimiyyətinin dəstəyi, təşəbbüsü və Kənd Təsərrüfatı Nazirliyi yanında Balıqçılıq və Akvakultura Mərkəzinin, Azərbaycan Dövlət Su Ehtiyatları Agentliyinin tabeliyindəki Regional Su Meliorasiya Xidmətinin, agentliyin yanında Suların İstifadəsinə və Mühafizəsinə Dövlət Nəzarəti Xidmətinin birgə təşkilatçılığı ilə "Akvakultura sahəsində nohur balıqçılıq təsərrüfatlarının inkişaf perspektivləri" mövzusunda maarifləndirici tədbir keçirilib.
Neftçala rayonunda fəaliyyət göstərən balıqçılıq təsərrüfatlarının nümayəndələrinin, fermer və sahibkarların, adı-çəkilən qurumların nümayəndələrinin iştirakı ilə keçirilən maarifləndirici tədbirdə balıqçılıq təsərrüfatlarının yaradılması, su hövzələrinin seçilməsi və balıqçılıq təsərrüfatlarının təşkili, akvakultura sahəsində səmərəli idarəetmə və ekoloji yanaşmalar, su təminatı, sudan istifadə ilə bağlı su müqavilələrinin bağlanması, akvakultura obyektlərinə əmtəə yetişdirilməsinə dair şəhadətnamələrin verilməsi barədə danışılıb. Sonra Balıqçılıq və Akvakultura Mərkəzinin direktor müavini Elşən Məcidov təmsil etdiyi qurumun yaranması və fəaliyyəti, balıqçılıq təsərrüfatlarının inkişafı ilə bağlı "Balıqçılıq haqqında" qanunun, Nazirlər Kabinetinin 2017-ci il 14 iyun tarixli qərarı ilə təsdiq edilmiş "Akvakulturanın həyata keçirilməsi Qaydası"nın müvafiq bəndləri üzrə ətraflı məlumat verib. Regional Su Meliorasiya Xidmətinin sektor müdiri Ömər İsmayılov isə yerlərdə fəaliyyət göstərən Su Meliorasiya Sistemləri İstismarı İdarəsi tərəfindən xidmət sahəsinə daxil olan suötürücü su kanalları vasitəsilə nohur təsərrüfatlarına suyun nohur təsərrüfat sahibləri ilə bağlanmış müqavilə əsasında verilməsinin hüquqi əsasları, sudan istifadə ödənişləri, qanunsuz sudan istifadə hallarının yaratdığı fəsadlar və bu istiqamətdə görülən tədbirlər barədə söhbət açıb. Tədbirdə Suların İstifadəsinə və Mühafizəsinə Dövlət Nəzarəti Xidmətinin sektor müdiri Zaur Kərimov da çıxış edib. O, "Meliorasiya və İrriqasiya haqqında" qanunun tələbləri, suların su obyektlərindən götürülməsinin, nəql edilməsinin, paylanmasının mahiyyəti, su obyektlərinə qanunsuz müdaxilələrin hüquqi tərəfləri barədə vacib məqamlara toxunub.
Sonra Neftçala Su Meliorasiya Sistemləri İstismarı İdarəsinin rəisi Təbriz Eyyubov çıxış edərək 2026-cı ilin məhsulu üçün əkilməsi planlaşdırılan 38 min 158 hektar əkin sahəsinin suvarılması məqsədilə nəzərdə tutulan illik 401,7 min kubmetr suyun həcminə uyğun olaraq əkin işlərinin planlaşdırıldığını diqqətə çatdırıb.
Tədbirin sonunda yığıncaq iştirakçılarının təklif və fikirləri dinlənilib, qarşılıqlı fikir mübadiləsi formatında müzakirələr aparılıb.
Seyran CAVADOV,
"Azərbaycan"
