Gəncə şəhər nümayəndə heyətinin Çin Xalq Respublikasına səfəri çərçivəsində "Gəncə Avtomobil Zavodu" İstehsalat Birliyi ilə Çinin iki şirkəti arasında əməkdaşlığa dair sənədlər imzalanıb.
İmzalanma mərasimindən əvvəl keçirilən hər iki görüşdə Gəncə ŞİH-in başçısı Niyazi Bayramov Azərbaycanda həyata keçirilən islahatlar nəticəsində ölkəmizdə formalaşan əlverişli biznes və investisiya mühitindən danışıb. Qeyd edib ki, qədim İpək yolu üzərində yerləşən Gəncə tarixi mövqeyini qoruyaraq bu gün də "Şərq-Qərb" nəqliyyat dəhlizinin mühüm mərkəzlərindən birinə çevrilib və bu, şəhərin həm daxili bazar, həm də ixracyönümlü istehsal üçün böyük potensiala malik olduğunu göstərir.
"Gəncə Avtomobil Zavodu" İB haqqında məlumat verən müəssisənin rəhbəri Xanlar Fətiyev bildirib ki, zavodun əsası 1986-cı ildə Ümummilli Lider Heydər Əliyevin təşəbbüsü ilə qoyulub, 2004-cü ildə isə Prezident İlham Əliyevin tapşırığı ilə fəaliyyətə başlayıb. Hazırda təxminən 500 nəfərin çalışdığı müəssisə yük və minik avtomobilləri, avtobuslar, traktorlar və xüsusi təyinatlı nəqliyyat vasitələrinin istehsalı üçün müasir yığım xətləri ilə təchiz olunmuş böyük sənaye kompleksidir. O, həmçinin müəssisənin istehsal imkanları və beynəlxalq əlaqələri barədə məlumat verərək Çin şirkətləri ilə əməkdaşlığın hər iki tərəf üçün faydalı olacağına əminliyini ifadə edib.
Sonra "CLW Chengli Group" şirkəti ilə əməkdaşlıq sazişi imzalanıb. Sazişə əsasən, Azərbaycanda ticarət və yük avtomobillərinin yığımına başlanılması barədə razılıq əldə olunub. Razılaşmaya görə, "Gəncə Avtomobil Zavodu" İB şirkətin Azərbaycanda elektrik şassilərinin satışı və satışdan sonra xidmət, orijinal ehtiyat hissələri, sürtkü yağları və aksesuarların satışı, eləcə də təmir xidmətləri üzrə eksklüziv distribütoru olacaq. İstehsal ediləcək avtomobillərin ilkin olaraq daxili bazar üçün nəzərdə tutulması, növbəti mərhələdə isə ixracının həyata keçirilməsi planlaşdırılır. Sənədlər Xanlar Fətiyev və "CLW Chengli Group" şirkətinin baş meneceri Don Şunquo tərəfindən imzalanıb.
İkinci əməkdaşlıq sazişi isə "Shaanxi Automobile Group Commercial Vehicle Co Ltd" (SAGMOTO) ilə bağlanıb. Bu razılaşmaya əsasən, Azərbaycanda ticarət avtomobillərinin yığımı nəzərdə tutulur. Eyni zamanda "Gəncə Avtomobil Zavodu" İB "SAGMOTO"nun elektrik və dizel şassilərinin, ehtiyat hissələrinin, sürtkü yağlarının və aksessuarlarının satışı, həmçinin satış sonrası xidmət və təmir işləri üzrə eksklüziv distribütor hüququ əldə edib. Sənədləri Xanlar Fətiyev və "SAGMOTO" şirkətinin baş direktor müavini He Vencun imzalayıblar.
Hər iki görüş zamanı Gəncəyə və Çin şirkətlərinin fəaliyyətinə dair videomateriallar nümayiş olunub.
Sabir ƏLİYEV,
"Azərbaycan"
